"უთქვამს, ხომ გაგაფრთხილე, ამ დროს ქუჩაში არ იაროო და მუშტი ჩაურტყია სახეში" - პოლიციელებს 27 წლის ბიჭის ცემაში ადანაშაულებენ, რას აცხადებს შსს?

ხონის რაიონული პოლიციის უფროსის მოადგილეს ახალგაზრდა მამაკაცის ცემაში ადანაშაულებენ. 27 წლის თორნიკე კაკაურიძის ოჯახის წევრების მტკიცებით, სამართალდამცავებმა ე.წ. კომენდანტის საათის დარღვევის გამო კაკაურიძე იმდენად სასტიკად სცემეს, რომ ქირურგიული ჩარევა გახდა საჭირო.

"გუშინ, 11 საათს იყო გადაცილებული, თორნიკე ნასვამ მდგომარეობაში მანქანით გადაადგილდებოდა. გაუჩერებია ხონის პოლიციის უფროსის მოადგილეს მიხეილ ქარჩხაძეს და მასთან მყოფ კიდევ ერთ პირს. ორივე მთვრალები ყოფილან. ქარჩხაძეს თორნიკესთვის უთქვამთ, ხომ გაგაფრთხილე ამ დროს ქუჩაში არ იაროო და მუშტი ჩაურტყია სახეში. შემდეგ გადმოუყვანიათ მანქანიდან, გზაზე დაუგდიათ და გამეტებით უცემიათ. მოტეხილი აქვს ფეხი, ჩატეხილი აქვს ცხვირის ძვალი. აწი კიდევ შინაგანი ორგანოების რა დაზიანებები გამოჩნდება, არ ვიცით. ამ წუთებში ქუთაისის კლინიკურ საავადმყოფოში უტარდება სასწრაფო ოპერაცია. საოცარი ის არის, რომ კიდევ აქეთ გვიჩივიან. პოლიციას წინააღმდეგობა გაუწიაო. შეიძლება კანონს არღვევდა ჩემი ძმისშვილი, მაგრამ გამოეწერათ ჯარიმა, ასე უნდა გაიმეტოს პოლიციელმა სასიკვდილოდ მოქალაქე ?! "- აცხადებს ambebi.ge-სთან თორნიკე კაკაურიძის მამიდა.

მისივე თქმით, ნაცემი მამაკაცის ოჯახი დღეს საჩივარით მიმართავს გენერალურ ინსპექციას და საქმის დროულ და ობიექტურ გამოძიებას მოითხოვს. მომხდარის შესახებ განხადება გაავრცელა შსს-მ.

უწყების ინფორმაციით, საქმე პოლიციის მიმართ წინააღმდეგობის გაწევის მუხლით არის აღძრული. შსს არ უარყოფს, რომ დაკავების დროს მოქალაქემ დაზიანებები მიიღო. თუმცა უწყების ინფორმაციით, დაშავებულია პოლიციის ერთი თანამშრომელიც, რომელიც კლინიკაშია გადაყვანილი. "გამოძიებით დადგინდა, რომ მიმდინარე წლის 21 ივნისს, ხონში, თ.კ. ალკოჰოლური თრობის პირობებში გადაადგილდებოდა და არღვევდა 23:00 სთ-ის შემდეგ გადაადგილების შეზღუდვის წესებს. პოლიციის მიერ შეჩერებულმა თ.კ.-მ სამართალდამცველებს წინააღმდეგობა გაუწია, სიტყვიერი და ფიზიკური შეურაცხყოფა მიაყენა მათ, რის შემდეგაც ის დაკავებული იქნა ბრალდებულის სახით. სამსახურებრივ საქმიანობასთან დაკავშირებით პოლიციელის მიმართ წინააღმდეგობის ფაქტზე გამოძიება საქართველოს სსკ-ის 353-ე მუხლის პირველი ნაწილით მიმდინარეობს”, – აღნიშნულია განცხადებაში.