"მთავარი ქართველი ხალხის გულისხმიერებაა" -  კარლ ჰარცელის გულწრფელი პასუხი კითხვაზე: რა ხიბლავს ყველაზე მეტად საქართველოში?

უკვე დაახლოებით სამი წელია, რაც კარლ ჰარცელი საქართველოში დიპლომატიურ საქმიანობას ეწევა - ევროკავშირის ელჩი აქტიურადაა ჩართული როგორც სხვადასხვა პროექტის განხორციელებაში, ისე პოლიტიკურ პროცესებში. დიპლომატიისა და პოლიტიკის მიღმა, საინტერესოა მისი დამოკიდებულება საქართველოსთან, როგორც ქვეყანასთან, სადაც ცხოვრობს - რა ახდენს მისთვის ყველაზე დიდ შთაბეჭდილებას საქართველოში? კარლ ჰარცელის მოსაზრებით, არის რამდენიმე მთავარი რამ, რის გარეშეც ქვეყნის დანარჩენი ღირსებები ნაკლებად მიმზიდველი იქნებოდა, ეს კი ადამიანების დამოკიდებულება და ხასიათია.

"სიმართლე გითხრათ, ბოლო თვეების განმავლობაში ჩემი დროის დიდ ნაწილს სწორედ პოლიტიკასა და დიპლომატიას ვუთმობდი. თუმცა, ამავე დროს, აქ ჩემი ყოფნის თითქმის 3 წლის განმავლობაში რამდენიმე საუკეთესო მომენტი მქონდა: როდესაც გავდიოდი და ხალხს ვხვდებოდი, ვნახულობდი სხვადასხვა კუთხეს საქართველოში, რომელსაც ულამაზესი პეიზაჟების ნამდვილი საგანძური აქვს, კულტურული მემკვიდრეობა, მომხიბლავი ისტორია, შესანიშნავ ღვინოებთან და სამზარეულოსთან ერთად. მაგრამ ჩემი აზრით, და ამას სრულიად გულწრფელად ვამბობ, ყველაზე მთავარი ქართველი ხალხის გულისხმიერება, მეგობრულობა და სტუმართმოყვარეობაა, რაც გასაოცარია. ვიტყოდი, რომ ეს ისაა, რის გარეშეც ყველაფერი დანარჩენი ნაკლებად მიმზიდველი იქნებოდა, თუმცა ამ ყველაფრის კომბინაცია ამ ქვეყანას, საქართველოს, ნამდვილად ძალიან განსაკუთრებულ და სასიამოვნო ადგილს აქცევს“, - აღნიშნავს კარლ ჰარცელი AMBEBI.GE-ს შეკითხვაზე.