"მოტივირებული ვართ, ძალიან მალე გავხდეთ ნატო-ს წევრები, საერთოა ჩვენი სწრაფვაც ევროკავშირისკენ" - უკრაინის პრემიერის ვიზიტის დეტალები და ძირითადი მესიჯები

საქართველოს უკრაინის პრემიერ-მინისტრი დენის შმიგალი სტუმრობს. უკრაინელ კოლეგას საქართველოს პრემიერ-მინისტრი ირაკლი ღარიბაშვილი მასპინძლობს.

მთავრობის ადმინისტრაციაში უკრაინის პრემიერ-მინისტრის დახვედრის ოფიციალური ცერემონია გაიმართა. შესრულდა ორივე ქვეყნის სახელმწიფო ჰიმნები, რის შემდეგაც პრემიერებს შორის ორმხრივი შეხვედრა დაიწყო.

"ჩვენი შეხვედრის ერთ-ერთი მთავარი საკითხი იყო ჩვენი სწრაფვა ევროკავშირისკენ, - ამის შესახებ, საქართველოს პრემიერ-მინისტრმა ირაკლი ღარიბაშვილმა დენის შმიგალთან ერთობლივი ბრიფინგისას განაცხადა.

ირაკლი ღარიბაშვილის თქმით, შეხვედრაზე ასევე განხილული იყო საქართველოსა და უკრაინის ნატო-ში ინტეგრაციის საკითხები.

„მე მოხარული ვარ, რომ იგი დღეს სტუმრობს ჩვენს ქვეყანას. მოგეხსენებათ, ჩვენს ქვეყნებს აქვს ძალიან მჭიდრო ურთიერთობა და თანამშრომლობა. ჩვენს ხალხებს შორის არსებობს ძალიან თბილი მეგობრული ურთიერთობა და ამას ადასტურებს ჩვენი დღვანდელი ვიზიტიც. უკრაინა-საქაართველოს აქვს ძალიან ბევრი გამოწვევა, ძალიან ბევრი საერთო ინტერესი და ჩვენ დღეს განვიხილეთ არაერთი საკითხი, რომელიც ეხება არამხოლოდ ორმხრივ, არამედ მრავალმხრივ ურთიერთობებს. რა თქმა უნდა, ჩვენ საერთო გამოწვევებიც და პრობლემების გაგვაჩნია, როგორიც არის რუსეთის მხრიდან მომდინარე საფრთხეები და ოკუპაციიის მძიმე შედეგები. ჩემს კოლეგასთან, რა თქმა უნდა, მე გამოვხატე ჩვენი ღრმა შეშფოთება უკრაინის საზღვრებთან და დროებით ოკუპირებულ ყირიმში რუსეთის სამხედრო გააქტიურების გამო. მე მას დავუდასტურე ჩვენი მტკიცე მხარდაჭერა უკრაინის სუვერენიტეტისა და ტერიტორიული მთლიანობისადმი.

ჩვენი შეხვედრის მთავარი საკითხი იყო ჩვენი სწრაფვა ევროკავშირისკენ, რა თქმა უნდა, ორივე ქვეყანა არის მკაფიოდ ჩამოყალიბებული, რომ გახდეს ევროკავშირის წევრი ქვეყანა და ჩვენ ამ საკითხზე ბუნებრივია, ბევრი ვისაუბრეთ. მოგეხსენებათ, რომ 17 მაისს, საქართველომ, უკრაინამ და მოლდოვამ ხელი მოაწერა მემორანდუმს „ასოცირებული ტრიოს“ დაფუძნების შესახებ, რაც ძალიან მნიშვნელოვანი პოლიტიკური განაცხადია. ჩვენ ასევე განვიხილეთ საქართველოსა და უკრაინის ნატო-ში ინტეგრაციის საკითხი, ორივე ქვეყანა ასევე ვართ ძალიან მოტივირებული, რომ მალე გავხდეთ ნატო-ს სრულფასოვანი წევრები. მოგეხსენებათ, რომ ბუქარესტის სამიტზე მოკავშირეებმა მიიღეს გადაწყვეტილება - საქართველო და უკრაინა გახდებიან ნატო-ს წევრები და წლების განმავლობაში ჩვენმა ქვეყნებმა ამ გზაზე მნიშვნელოვან პროგრესს მიაღწიეს. ჩვენ, რა თქმა უნდა, განვიხილეთ სავაჭრო-ეკონომიკური საკითხები. ჩვენ შევთანხმდით, რომ აუცილებელია ამ მიმართულებით გააქტიურება. უკრაინა არის საქართველოს ერთ-ერთი მთავარი სავაჭრო პარტნიორი, რომელიც ტოპ ათეულში შედის და ჩვენი ამოცანაა, რომელიც ჩემს კოლეგასთან ერთად დავისახეთ, რომ გავაორმაგოთ სავაჭრო ბრუნვა ჩვენს ქვეყნებს შორის.

ასევე აღვნიშნეთ, რომ აუცილებელია გააქტიურება ტრანსპორტის, ლოგისტიკის მიმართულებით, სხვადასხვა პროექტის მიმართულებით. მინდა ასევე აღვნიშნოთ, რომ ტურიზმი არის ძალიან მნიშვნელოვანი ჩვენი ქვეყნისთვის. ძალიან ბევრი ტურისტი გვყავს უკრაინიდან და მოხარული ვიქნებით კიდევ მეტი უკრაინელი ტურისტის მიღებით საქართველოში. ასე რომ, კიდევ ერთხელ, მინდა დღევანდელი შეხვედრა შევაჯამო - ჩვენ გვაქვს აბოსლუტურად ყველა მექანიზმი, ძალიან ძლიერი ფუნდამენტი იმისთვის, რომ კიდევ უფრო მეტად გავაძლიეროთ ჩვენს შორის არსებული ისედაც ძალიან ძლიერი ურთიერთობები და კიდევ უფრო მეტად გავაძლიეროთ ჩვენი ორმხრივი თანამშრომლობა და პარტნიორობა. მადლობას ვეტყვი ჩემს კოლეგას, მეგობარს ჩამობრძანებისთვის“, - აღნიშნა პრემიერ-მინისტრმა.

"უკრაინა და საქართველო სტრატეგიული პარტნიორები არიან, ეს არ არის მხოლოდ სიტყვები, ეს დასტურდება კონკრეტული საქმეებით, ფაქტებით და რა თქმა უნდა, ჩვენი პარტნიორობით", - ამის შესახებ უკრაინის პრემიერ-მინისტრმა ირაკლი ღარიბაშვილთან შეხვედრის შემდეგ განაცხადა.

როგორც დენის შმიგალმა აღნიშნა, რუსეთის ფედერაციის მხრიდან დესტაბილიზაციისკენ მიმართული ქმედებები შავი ზღვის რეგიონში, აიძულებენ უკრაინას და საქართველოს უფრო მჭიდროდ ითანამშრომლონ უსაფრთხოების სფეროში, მათ შორის, ნატოს ქვეყნების ჩართულობით.

„უპირველესყოვლისა, მადლობა მინდა გადავუხადო ჩემს კოლეგას, ბატონ ირაკლი ღარიბაშვილს ტრადიციული სტუმართმასპინძლობისთვის, მეგობრული და კონსტრუქტიული ატმოსფეროსთვის, რომლითაც დახვდნენ უკრაინულ დელეგაციას თბილისში. ეს არის ჩემი პირველი ოფიციალური ვიზიტი საქართველოში, რომელიც დაემთხვა საქართველოს დამოუკიდებლობის დღეს, ეს ორმაგად სასიამოვნოა.

უკრაინის ხალხის სახელით, მინდა ქართველ ხალხს ვუსურვო მშვიდობა, კეთილდღეობა და ურთიერთშეთანხმება“, - განაცხადა უკრაინის პრემიერმა და ქართულად აღნიშნა: „საქართველოს გაუმარჯოს“.

მისივე თქმით, ამ რთული გლობალური გამოწვევების პირობებში, რომელიც პირველ რიგში უკავშირდება კორონავირუსს, მისი ვიზიტი საქათველოში იძენს განსაკუთრებულ მნიშვნელობას.

„ჩვენ ვხედავთ, რომ ურთიერთობა ჩვენს ხალხებს შორის უფრო დიდ იმპულსს იძენს, ეს არის ძალიან მნიშვნელოვანი სიგნალი ქვეყნების ბიზნესისთვის და ჩვენი მოქალაქეებისთვის.

უკრაინა-საქართველო სტრატეგიული პარტნიორები არიან, ეს არ არის მხოლოდ სიტყვები, ეს დასტურდება კონკრეტული საქმეებით, ფაქტებით და რა თქმა უნდა, ჩვენი პარტნიორობით.

დღევანდელი ურთიერთობები ჩვენს ქვეყნებს შორის ემაყრება, პირველ რიგში, უკრაინის და საქართველოს მთავრობების ერთობლივ მიზნებს, ევროკავშირში და ნატოში გაწევრიანების თვალსაზრისით.

დარწმუნებული, ვარ ევროკავშირსა და ნატო-ში ჩვენი ქვეყნების შესვლა ეს მხოლოდ დროის საკითხია, ჩვენი მხრიდან, საქართველოს და უკრაინის მთავრობები ყველაფერს აკეთებენ, რომ ამისთვის მიაღწიონ საჭირო კრიტერიუმს.

მინდა აღვნიშნო, ჩვენი პოზიციების, ქმედებების და ხედვების აღმოსავლეთ პარტიორობის შემდგომ განვითარებასთან დაკავშირებით.

რამდენიმე კვირის წინ, უკრაინამ, საქართველომ და მოლდოვამ შექმნეს „ასოცირებული ტრიო“, რომელიც, ერთის მხრივ, ხაზს უსვამს ევროპულ მისწრაფებებს ჩვენი ქვეყნების და მათ ამბიციებს, რომ გახდნენ ევროკავშირის წევრები. მეორე მხრივ, იძლევა საშუალებას, უფრო ეფექტურად მოემზადონ აღმოსავლეთ პარტნიორობის სამიტისთვის, კერძოდ რეგიონალური უსაფრთხოების განმტკიცების საკითხებთან უფრო დიდი ყურადღების გამახვილება.

რუსეთის ფედერაციის მხრიდან დესტაბილიზაციისკენ მიმართული მიმდინარე ქმედებები შავი ზღვის რეგიონში აიძულებენ უკრაინას და საქართველოს უფრო მჭიდროდ ითანამშრომლონ უსაფრთხოების სფეროში, მათ შორის, ნატოს ქვეყნების ჩართულობით“, - აღნიშნავს პრემიერი.

საქართველოში ოფიციალური ვიზიტის ფარგლებში, უკრაინის პრემიერ-მინისტრი ასევე შეხვდება საქართველოს პარლამენტის თავმჯდომარეს, კახა კუჭავას, ასევე სრულიად საქართველოს კათოლიკოს-პატრიარქს, უწმინდესსა და უნეტარესს ილია მეორეს.

დენის შმიგალი, დელეგაციის წევრებთან ერთად, პატივს მიაგებს საქართველოს ერთიანობისათვის დაღუპულ გმირთა ხსოვნას და გმირთა მოედანზე მემორიალს გვირგვინით შეამკობს.

დენის შმიგალი საქართველოში წუხელ ჩამოფრინდა. მას თბილისის საერთაშორისო აეროპორტში საქართველოს საგარეო საქმეთა მინისტრი, დავით ზალკალიანი დახვდა.

უკრაინის პრემიერ-მინისტრის პირველი ოფიციალური ვიზიტი საქართველოში ხვალ დასრულდება.