"ყველას მოვუწოდებ, თუ სახლში ხართ ჩაკეტილები, დემოგრაფიაზე ვიზრუნოთ და გავმრავლდეთ" - გიორგი ყიფშიძე და ენი გასიევა მეოთხე შვილსა და ოჯახურ ცხოვრებაზე

მსახიობ გიორგი ყიფშიძესა და მის მეუღლეს ენი გასიევას მეორე შვილი - გოგონა შეეძინათ, რომელსაც ლუნა დაარქვეს. გიორგისთვის ეს მეოთხე შვილია, ის ბავშვების მოვლაში ძალიან ჩართული მამაა და როგორც ამბობს, მიხვდა, რომ თავისი მისია ბავშვების აღზრდაა. გიორგი და ენი AMBEBI.GE - ის ბავშვებსა და პირად ცხოვრებაზე უამბობენ:

გიორგი: მესამე და მეოთხე შვილი ერთი ტალღაა, ერთ ამოსუნთქვაზე გაჩნდნენ. უფროსს ჯერ რძე არ ჰქონდა ტუჩზე შემშრალი, რომ უკვე მეორე ჩნდებოდა. ბავშვის გაჩენა და მოვლა იმდენად დღის წესრიგში გვაქვს, რომ ვიკითხე - გაისად მესამე-მეთქი?

ენი: გოგო ძალიან გვინდოდა, მაგრამ მეორე ბავშვის გაჩენა ჯერ გადაწყვეტილი არ გვქონდა. დაუგეგმავად მოხდა, რაც ძალიან გაგვიხარდა. ნატალიას და გიორგის ერთდროულად ვუთხარი, რომ ფეხმძიმედ ვარ და ბედნიერებისგან ორივემ ტირილი დაიწყო, ეს მათთვის უდიდესი ემოცია და სიხარული იყო. ძალიან კარგი ორსულობა მქონდა, ყველაფერმა უმარტივესად ჩაიარა. რთული იყო ის ფაქტი, რომ მეორე წელი გადაბმულად ვიყავი ორსულად, არც ისე ადვილია, როცა ორი წელი გაბერილი დადიხარ.

- ენი, როგორი ფეხმძიმობა გქონდა, ღამით დაარბენინებდი მარწყვზე და ალუჩაზე გიორგის?

ენი: პოსტ-ფეხმძიმობის და ფეხმძიმობის პერიოდი მშვენიერი მქონდა. ჩემს ხასიათზე არ ასახულა, ისევ ის ტიპი ვიყავი, რაც მანამდე... მოთხოვნილებაც კი არ მქონდა არაფრის, გიორგი არ შემიწუხებია. ვერც კი ვიგრძენი რომ მშობიარობა მეწყებოდა, უბრალოდ შესამოწმებლად მივედით კლინიკაში, რადგან ეს იყო სავარაუდო მშობიარობის თარიღი. ექიმმა რომ გამსინჯა, მითხრა: - სამ თითზე ხარ გახსნილი და არ გტკივაო? საერთოდ არანაირი ტკივილი, არც დაჭიმულობა მქონდა, ექიმმა მითხრა: - მშობიარობა დაწყებულია, ვეღარ გაგიშვებო. გიორგი ძალიან ღელავდა, მაგრამ მშობიარობას არ ესწრებოდა, რადგან არ შეუძლია ასეთი რაღაცების ყურება და არც მითქვამს, დასწრებოდა.

გიორგი: ენი მოულოდნელად ძალიან მაგარი გოგოა. ახალგაზრდა გოგონებისთვის ძნელია სხვა ამპლუაში გადასვლა, ასეთი როლის მორგება და ენის შემთხვევაში ისე "საკაიფოდ" გამოვიდა, ვკითხე: - დედობაზე დადიოდი - მეთქი?

- შვილებს განსხვავებულ სახელებს არქმევთ...

ენი: კოსმოდან გამომდინარე მოგვაფიქრდა ლუნა, კოსმიური კაცი და ლუნა, უხდებიან ერთმანეთს და ეტყობათ, რომ და-ძმანი არიან.

- გიორგი რამდენად არის ჩართული ბავშვების აღზრდაში?

ენი: ყველაფერს გიორგი აკეთებს, გამოდის, რომ მე უბრალოდ იქეთ ვეხმარები.

გიორგი: მეტი არაფერს არ ვაკეთებ, გარდა ბავშვების მოვლისა. მივხვდი, რომ ეს ყოფილა ჩემს ცხოვრებაში მთავარი. ჩემი მისიაა, რომ ბავშვები კარგად გავზარდო, რაც მე არ მქონდა, ამათ ჰქონდეთ. მხოლოდ იმას ვფიქრობ, რა შეიძლება მაქსიმალურად კარგი გავუკეთო, რომ როცა აღარ ვიქნები, კარგ მამად მომიხსენიონ.

- გიორგი, რა განსხვავებაა როცა ადრეულ და გვიან ასაკში ხდები მამა?

გიორგი: ადრეულ ასაკში ბევრ რამეს ვერ ვხვდებოდი, ქალები ბავშვს არ მაძლევდნენ, შეიძლება ნდობა არ ჰქონდათ, რადგან პატარა ბიჭი ვიყავი. ახლა მე არ ვაკარებ არავის, პამპერსის გამოცვლაზე, დაბანაზე, თუ ჭამაზე იქნება საუბარი, ყველაფერს ვაკეთებ. ჯერ მე მეკითხებიან, მე ვარ მთავარი. ჩემი პატარა სამყარო მაქვს, პატარა პრინცი ვარ, ჩემს პლანეტაზე. ზურაც კი პირდაპირ კავშირში ჩართული ბაბუა გახდა. ნამდვილი ბაბუის ფუნქცია მიიღო. ზურამ პირველად იგრძნო ასეთი რამ - ბავშვი ეფერებოდა თავზე, ცრემლი წამოუვიდა და მას შემდეგ ხელიდან ვეღარ გავაშვებინეთ. მანამდე ბავშვებისთვის არ ეცალა, არც ჩემთვის, არც შვილებისთვის და ახლა პანდემიამ ასე გადაგვიწყვიტა, რომ ყველას გვცალია, ასე მოუწია ბაბუობის როლის მორგება. ამ ორმა ბავშვმა პანდემიის დისკომფორტი მთელ ოჯახს გადაგვატანინა. ყველას მოვუწოდებ, სახლში თუ ხართ ჩაკეტილები, დემოგრაფიაზე ვიზრუნოთ და გამრავლდით.

ენი: ზურას ისე უხარია ორივე შვილიშვილი, გაბრწყინებული დადის. ზურა და მისი მეუღლე ძალიან გვეხმარებიან ბავშვების აღზრდაში, ეთამაშებიან, თუ სადმე გავდივართ, იტოვებენ და ყველაფერს აკეთებენ, რითიც კი შეუძლიათ ხელი შეგვიწყონ. მე და ზურა ერთმანეთს ძალიან ვუგებთ და ვაფასებთ. ძალიან მიყვარს და მისგანაც ანალოგიური ენერგია მოდის, ზუსტად იგივეს ვგრძნობ და ეს ურთიერთკავშირი სასიამოვნოა. უდიდეს პატივს ვცემ მას და მოხარული ვარ, რომ ასეთი კარგი პიროვნებაა. მე და ნატალიაც ახლო მეგობრები ვართ და ძალიან გვიყვარს ერთმანეთი. ასევე მე და კრისტისაც საუკეთესო ურთიერთობა გვაქვს, ვმეგობრობთ, ვნახულობთ ერთმანეთს, გიორგისა და კრისტის ურთიერთობიდან იმხელა დრო გავიდა, ახლა და-ძმასავით არიან. კრისტი ძალიან მომწონს, საოცარ ფორმაშია და ულამაზესი ქალია.

- ბავშვებმა რა შეცვალეს თქვენს ცხოვრებაში?

ენი: ჩვენ თავიდანვე ოჯახური ცხოვრება დავიწყეთ. ბავშვებმა უფრო გაამყარეს, "მოაპირკეთეს" ჩვენი ურთიერთობა, ძალიან მომწონს, მაგარი ბიჭია გიორგი... ასაკობრივი ზღვარი წაშლილია, საერთოდ ვერ ვგრძნობ, რომ ჩვენს შორის ასაკობრივი სხვაობაა. ვერ ვხვდები, რომელი ვართ დიდი და პატარა. არის იდეალური მამა, გიორგისნაირი მამაკაცები იშვიათია, ან მე არ შემხვედრია. მინდა, მადლობა ვუთხრა, რომ ასეთ კარგია. შეყვარებული გიორგი ფანტასტიკური ჟანრის გმირია. ყველაფერს აკეთებს, რომ მასიამოვნოს. უთქმელად ხვდება რა მიხარია, რა მწყინს, უსიტყვო კავშირი გვაქვს, რაც ძალიან ბევრს ნიშნავს... ერთმანეთს სულ სიურპრიზებს ვუკეთებთ, სულ იმით ვართ დაკავებული, რომ ერთმანეთი რამით გავახაროთ. მე ძალიან მიყვარს დილაობით ჩაის რომ მიკეთებს და სულ ცდილობს დილით ჩაით გამაღვიძოს. რომ მძინავს, მოდის და ნელა მკოცნის, რომ არ გამაღვიძოს, ძალიან თბილად და ტკბილად ცდილობს მომეფეროს, იზრუნოს...

გიორგი: ცხოვრებაში ბევრი დისკომფორტია, დადებითს - უარყოფითი ენერგიები სჭარბობს. ჩემთან სახლში, იმდენად კარგი რაღაცები მოხდა, რომ ენერგეტიკა არ გვაძლევს საშუალებას ცუდი მოვიზიდოთ. დრო არ დაგვრჩა, რომ რაღაცები განვიცადო, "პამპერსი აქვს გამოსაცველელი, ბავშვს შია“ იმდენად ყოველდღიურობა აქტუალური გახდა, არ მცალია სისულელეებისთვის და ბედნიერი ვარ. ტელევიზორი გამოვრთეთ, ჩავრთეთ ბავშვი და სულ სიხარულია. ცუდ ხასიათზე რომ გაიღვიძო, შენ თავს არ აძლევ უფლებას რომ ასე დარჩე, ორი ბავშვია სახლში და იცი, რომ უხასიათობა გადამდებია.

- ასაკობრივი სხვაობა თუ იგრძნობა რამეში?

გიორგი: ასაკობრივი სხვაობა ზოგისთვის სამარცხვინო საკითხია. ჩვენს შემთხვევაში ასაკი არაფერია. თუ ორ ადამიანს შორის რაღაც კავშირი არსებობს, ასაკი მხოლოდ ციფრებია. თურმე ენისთან იმდენი კავშირი არსებობს, რაზეც არც მიფიქრია, არც მიოცნებია... ყველაფერში აბსოლუტური სინთეზი გვაქვს. ეგეთი გულწრფელი არავისთან არ ვყოფილვარ, არც არავინ ყოფილა ჩემთან... არასდროს არ ჩამითვლია აბსოლუტური ნდობა არავისთან საჭიროდ. ახლა თავისით მოხდა...

- ენი სანამ გიორგის გაიცნობდი, როგორც ცნობილი სახე, მანამდე თუ იქცევდა შენს ყურადღებას?

ენი: სხვათა შორის, ქართულ შოუბიზნესში დიდად არ ვიყავი ჩახედული, სანამ გიორგისთან არ დავიწყე ურთიერთობა, მერე გიორგიზე რომ დავქორწინდი, მომიწია, რომ ჩამეხედა ამ სფეროში. თავიდან რომ ვნახე, ასეთი უშუალო ურთიერთობა არ გვქონია. მისალმება-დამშვიდობებით შემოვიფარგლეთ, რადგან მეგობართან, წვეულებაზე გავიცანით ერთმანეთი. მერე მეორედ და მესამედ რომ ვნახე, მისი ბუნება, შინაგანი სამყარო რომ გავიცანი, ამან ძალიან მომხიბლა, რადგან ჩემთვის განსაკუთრებულად სულიერი მეგობარი არის და ძალიან კარგად ვუგებთ ერთმანეთს, რაც ჩემთვის ბევრს ნიშნავს.

ავტორი: ხათუნა კორთხონჯია