დღის ფოტო: კორპუსზე გაშენებული გლიცინია - ვინ დარგო მცენარე, რომელიც შენობის მთელ ფასადს ამშვენებს
დღეს სოციალურ ქსელში ძალიან ლამაზი ფოტო (ავტორი: ნიკა უდესიანი) გავრცელდა - გლდანში, ერთ-ერთი საცხოვრებელი კორპუსის წინა ფასადზე, მერვე სართულამდე ასული გლიცინიას ფოტო ერთ-ერთმა ინტერნეტმომხმარებელმა გადაიღო და სოციალურ ქსელში ატვირთა, რომელმაც უამრავი ადამიანის მოწონება და აღფრთოვანება გამოიწვია. როდესაც იმის გარკვევა ვცადეთ, თუ ვინ დარგო ეს მცენარე იქ და რამდენი ხანია ამ შენობის ფასადს ამშვენებს, შევიტყვეთ, რომ ის ახმეტელის თეატრის მსახიობს, ყოფილ პარლამენტის წევრს გია ჯაფარიძეს დაახლოებით 30 წლის წინ დაურგავს და ამ გლიცინიას მოვლას დღემდე აქტიურად აგრძელებს...
ამის შესახებ კი მისმა ქალიშვილმა შორენა ჯაფარიძემ, ანსამბლ „რუსთავის“ მოცეკვავემ გვიამბო:
- გავიზარდე იმ სახლში, რომელსაც ეს მცენარე ამშვენებს. იქ ამის გარდა კიდევ ბევრი ლამაზი ყვავილია დარგული. გლიცინიას გაშენების იდეის ავტორი მამაჩემია, მსახიობი გია ჯაფარიძე. ძალიან ვამაყობ იმით, რომ გია ჯაფარიძის შვილი ვარ... სასიხარულო ფაქტია ისიც, რომ ამ ფოტოს ასეთი გამოხმაურება მოჰყვა.
მამამ ეს ყვავილი რომ დარგო, ძალიან პატარა ვიყავი. მოკლედ, მე და ეს გლიცინია ერთად გავიზარდეთ. დღეს უამრავი ადამიანი მწერს, მირეკავს და მეუბნება, რომ სოციალურ ქსელში ეს ფოტო ნახა. ბევრს ახსოვს, როგორი პატარა იყო და როგორ თანდათან იზრდებოდა. ფოტო თვითონ როცა ვნახე, მაშინვე მამაჩემს დავურეკე და ეს ამბავი ვახარე... ამ ყვავილს ყოველ წელს მამა უვლიდა, რომ გაზრდილიყო, გაფურჩქნილიყო და გაეხარებინა ადამიანების გულები. თუმცა წლების წინ იყო ხოლმე ფაქტები, როცა ვიღაცები მოდიოდნენ და მამას ეუბნებოდნენ, რომ აქ ასე, კორპუსის კედელზე ამ ყვავილის გაშვება არ შეიძლება, მაგრამ მამას მთის ხასიათი მათ წინააღმდეგობას სულ აკავებდა... იქნებ, თბილისის მერიამ მსგავსი ინიციატივები და იდეების სურვილი ადამიანებში გააღვივოს, წაახალისოს და ბევრ კორპუსზე, სახლზე გაჩნდეს მსგავსი სიმწვანე და სილამაზე...