"ვიზიტის ისე მოწყობა, თითქოს კოლონიზატორები მოვიდნენ, რათა გაერთონ, როდესაც ადგილობრივები სახლებში სხედან, სამარცხვინოა" - რას წერს "დოჟდის" რედაქტორი

ტელეკომპანია "დოჟდის" მთავარი რედაქტორი ტიხონ ძიადკო 31 მარტს, თბილისში ჩამოსულ ვლადიმერ პოზნერთან დაკავშირებით განვითარებულ მოვლენებს ეხმიანება და "ფეისბუქში" პოსტს აქვეყნებს. ძიადკო თავადაც თბილისში იმყოფება, თუმცა საქართველოში პოზნერთან ერთად არ ჩამოსულა.

"გუშინ აეროპორტიდან ფოტო გამოვაქვეყნე და დავწერე, რომ თბილისში მივფრინავდით და დღეს მივიღე რამდენიმე შეტყობინება, მეკითხებოდნენ ვიყავი თუ არა "იმავე თვითმფრინავში“ - ვლადიმერ პოზნერთან და მის სტუმრებთან ერთად.

იმ რეისზე არ ვყოფილვართ. ჩვენ ვნუკოვოს აეროპორტიდან ერევანში გავფრინდით და უკვე ერევნიდან თბილისში წავედით. გაკვირვებულები ვიყავით იმით, რომ აეროპორტის დაფაზე ვნახეთ პირდაპირი რეისი თბილისისკენ - თითქმის ორი წელია პირდაპირი ფრენები არ განხორციელებულა. კარგია, თუ ადამიანებს ჩარტერული რეისის საფასურის გადახდა ჩეუძლიათ, კარგი იქნებოდა, რომ მეც შემეძლოს. მაგრამ რაც შემდეგ მოხდა, სულ მცირე, ძალიან მიუღებელია.

თუ ვინმემ არ იცით, გეტყვით, რომ თბილისში "კომენდანტის საათი 21:00 სათზე იწყება. ეს ნიშნავს, რომ ყველაფერი იკეტება, გარეთ თითქმის არ დადიან მანქანები, ადამიანები. მაღაზიები, რესტორნები, აფთიაქები და ყველაფერი დაკეტილია. დარღვევისთვის ჯარიმა 600 დოლარია. გამონაკლისს უშვებენ მხოლოდ მათთვის, ვისაც საშვი აქვს, მაგრამ საშვი ადამიანთა ძალიან მცირე რაოდენობას აქვს - ისე, როგორც იყო გაზაფხულზე, მოსკოვში.

ხალხი ამ ყველაფრის გამო ძალიან დაღლილია, ძნელია ამ შეზღუდვებზე დამოკიდებულება.

ყველაფრის ფონზე კი, ჩარტერული რეისით ჩამოდიან თბილისში დღესასწაულისთვის. როგორც ყვებიან, ყველაფერი ასე განვითარდა - თვითმფრინავი დაეშვა დაახლოებით 8:00 საათზე. ღონისძიების ერთ-ერთმა მონაწილემ ხელისუფლების დახმარებით სტუმრებისთვის გააკეთებინა საშვები და ყველანი ავტობუსით წავიდნენ სასტუმრო სტამბაში. ხოლო როცა უკვე "კომენდანტის საათი" დაიწყო, წავიდნენ სავახშმოდ "ვინოტელში", პოლიციის მანქანისა და ციმციმების თანხლებით. შემდეგ კი მოხდა ის, რაც მოხდა, აქცია, კვერცხების სროლა და გინება.

რა თქმა უნდა, კვერცხების სროლა და გინება კარგი არ არის, მაგრამ შენი განცხადებებით ქვეყნის ეროვნულ ტრაგედიასთან, აფხაზეთთან შეხება და შემდეგ ისე ჩასვლა, თითქოს არაფერი მომხდარა, არანაკლებ უარესი რამაა, თქვენ მზად უნდა იყოთ იმისთვის, რომ საზოგადოების ნაწილი გამოხატავს თავის დამოკიდებულებას, იმიტომ რომ საქართველოსთვის, ეს ათასობით გარდაცვლილისა და 250 000 ლტოლვილის ისტორიაა.

ვიზიტის ისე მოწყობა, რომ კოლონიზატორები მოვიდნენ პოლიციის დახმარებით დიდი ქვეყნიდან, რათა გაერთონ, როდესაც ადგილობრივები სახლებში სხედან და მაღაზიაში წასვლაც არ შეუძლიათ, ეს არ არის კარგი, ეს ძალიან სამარცხვინოა", - წერს ძიადკო.