"თაღლითები ყოფილხართ! დაამტკიცეთ, რომ მე მაქვს მოქმედი ბიზნესი!" - ხათუნა ჟორდანია "საერთაშორისო გამჭვირვალობის" კვლევას ეხმაურება

ხათუნა ჟორდანია "საერთაშორისო გამჭვირვალობა-საქართველოს" კვლევას ეხმაურება, სადაც ნათქვამია, რომ მისმა მეუღლემ, ზურა ხაჩიძემ საჯარო დაწესებულებაში ინტერესთა შეუთავსებლობისა და კორუფციის შესახებ კანონი დაარღვია.

"სერიოზული ორგანიზაცია მეგონეთ და ჩვეულებრივი თაღლითები და ცრუპენტელები ყოფილხართ!!!!!

უხსოვარ დროში დარეგისტრირებული ორგანიზაციები, რომლებსაც არასდროს უფუნქციონირებია და რომლის არსებობაც აღარც კი მახსოვდა, თქვენ XXI საუკუნეში გააცოცხლეთ, როგორც მოქმედი ბიზნესი და არც კი გადაამოწმეთ, ოდესმე რამე შემოსავალი თუ ჰქონია ამ კომპანიებს.

კატეგორიულად მოვითხოვ, თქვენს მიერ ტირაჟირებული ცრუ ინფორმაცია, დოკუმენტურად დაასაბუთოთ!!!! დაამტკიცეთ, რომ მე მაქვს მოქმედი ბიზნესი და შესაბამისად შემოსავალი ამ კომპანიებიდან. წინააღმდეგ შემთხვევაში, მოგიწევთ კანონით პასუხისგება ან საჯარო ბოდიში!!! ხათუნა ჟორდანია" - წერს ჟორდანია.

"საერთაშორისო გამჭვირვალობა - საქართველომ" სახელმწიფო რწმუნებულის ადმინისტრაციების თანამდებობის პირთა 2020 წელს შევსებული დეკლარაციები შეისწავლა, რის შედეგადაც გაირკვა, რომ 46 მოქმედი და ყოფილი თანამდებობის პირიდან დეკლარაცია ათმა ხარვეზებით შეავსო.

ამის შესახებ ნათქვამია „საერთაშორისო გამჭვირვალობა - საქართველოს“ მიერ გავრცელებულ ინფორმაციაში. მათივე ცნობით, 7 შემთხვევაში თანამდებობის პირს კერძო კომპანიაში არსებული წილი მართვის უფლებით სხვა პირისთვის არ გადაუცია; 4 შემთხვევაში კი, საერთოდ არ აქვს დეკლარირებული მისი ან/და ოჯახის წევრის საკუთრებაში არსებული კომპანიები.

კერძოდ, "საერთაშორისო გამჭვირვალობა - საქართველოს" ცნობით, სამცხე-ჯავახეთის სახელმწიფო რწმუნებულის მოადგილე, ზურა ხაჩიძემ 2020 წლის აგვისტოში შევსებულ დეკლარაციაში არ მიუთითა, რომ მისი მეუღლე ნატალია ჟორდანია არის დირექტორი და ფლობს წილებს შემდეგ კომპანიებში: შპს “ივენთ კომპანი ნან - Event Company NAN” - 50% წილი, დირექტორი და შპს “ტრანსატლანტიკი და პარტნიორები” - 25% წილი. არასამთავრობო ორგანიზაციის შეფასებით, ეს საჯარო დაწესებულებაში ინტერესთა შეუთავსებლობისა და კორუფციის შესახებ კანონის დარღვევაა.