დატბორილი სახლები, გზები, ათასობით ევაკუირებული ადამიანი - ფოტოები ავსტრალიიდან, სადაც სტიქიას ებრძვიან

ავსტრალიაში, ახალი სამხრეთ უელსის შტატში, უხვი ნალექის შედეგად გამოწვეული წყალდიდობის გამო 18 000-მდე მოქალაქის ევაკუაცია განხორციელდა.

BBC-ის ცნობით, კოკისპირულმა წვიმებმა სიდნეის გარშემო და სამხრეთ-აღმოსავლეთ ქუინსლენდში მდინარეებისა და კაშხლების გადავსება გამოიწვია.

ადიდებულმა მდინარეებმა დააზიანა გზები და ხიდები, დროებით დაიხურა 150-მდე სკოლა, "ნიუკასლის აეროპორტში“ კი, სადაც ასაფრენ-დასაფრენი ბილიკი დაიტბორა, ავიარეისები შეჩერდა.

ავსტრალიის პრემიერ-მინისტრმა სკოტ მორისონმა განაცხადა, რომ სტიქია "ქვეყნისთვის კიდევ ერთი ტესტია“. მან იმ ადამიანებს, რომლებიც იძულებულები გახდნენ საკუთარი საცხოვრებელი ადგილები დაეტოვებინათ, ფინანსური დახმარება შესთავაზა.

ხელისუფლებაში აცხადებენ, რომ სტიქია, შესაძლოა, მთელი კვირის განმავლობაში გაგრძელდეს და მოსახლეობას სიფრთხილის გამოჩენისკენ მოუწოდებენ.