"პრემიერად წოდებული უნდა გადადგეს. ამას ხელი ვინ უნდა ჩამოართვას?!" - როგორ ეხმიანებიან ოპოზიციაში გავრცელებულ ფარულ ჩანაწერებს

"ტვ პირველის" მიერ გავრცელებულ ფარულ აუდიოჩანაწერებს, სადაც სავარაუდოდ, ბერა ივანიშვილი ირაკლი ღარიბაშვილსა და ანზორ ჩუბინიძეს ესაუბრება და მისთვის სოციალურ ქსელში არასასურველი კომენტარის ავტორის დასჯას ითხოვს, ოპოზიციური სპექტრის მხრიდან მწვავე განცხადებები მოგყვა.

"ევროპული საქართველოს“ ერთ-ერთი ლიდერი გიგი უგულავა პრემიერ-მინისტრ ირაკლი ღარიბაშვილის გადადგომას მოითხოვს. ამის შესახებ გიგი უგულავა სოციალურ ქსელში წერს.

“სანამ რიგგარეშე არჩევნები იქნება, ეს საზიზღრობა პრემიერად წოდებული უნდა გადადგეს. ამას ხელი ვინ უნდა ჩამოართვას”, - წერს გიგი უგულავა.

"ლელოს“ ლიდერი მამუკა ხაზარაძეც პრემიერ-მინისტრ ირაკლი ღარიბაშვილის და სახელმწიფო დაცვის სპეციალური სამსახურის უფროსის ანზორ ჩუბინიძის თანამდებობიდან გადადგომას მოითხოვს.

"6 მარტს "ტვ პირველის“ ეთერში გასული სიუჟეტი, რომელშიც გავიდა ბერა ივანიშვილის საუბრები ირაკლი ღარიბაშვილთან და ანზორ ჩუბინიძესთან, შეიცავს უმძიმესი ორგანიზებული დანაშაულის ნიშნებს.

"ლელო" მოითხოვს: სიუჟეტში მოთხრობილ ფაქტებზე დაუყოვნებლივ დაიწყოს გამოძიება; გამოძიებაში ჩართულ იქნენ საერთაშორისო ავტორიტეტული საგამოძიებო ინსტიტუტები; გამოძიებაზე ზემოქმედების თავიდან ასაცილებლად, დაუყოვნებლივ გადადგნენ თანამდებობიდან პრემიერ-მინისტრი ირაკლი ღარიბაშვილი და სახელმწიფო დაცვის სპეციალური სამსახურის უფროსი ანზორ ჩუბინიძე.

ირაკლი ღარიბაშვილთან და მისი ჩართულობით ნებისმიერ ფორმატში მონაწილეობა "ლელოსთვის" მიუღებელია“, - წერს მამუკა ხაზარაძე სოციალურ ქსელში.

აუდიოჩანაწერებს ეხმიანება კიდევ ერთი ოპოზიციონერი პოლიტიკოსი, ელენ ხოშტარია:

"მთელი ეს ბრაზი რიგგარეშე არჩევნებზე უნდა მივმართოთ. ესაა გამოსავალი! არანაირი შიში, არანაირი უმწეობა. ბიძინას მმართველობამ გვასწავლა, გვაბრაზებს ვდუღდებით და გადის. არსად არ გავა როცა მიზანი ნათელია. არჩევნები და ამათი გაშვება. დანარჩენი დეტალებია. ყველა აქცია, ყველა პოსტი, ყველა მოთხოვნა, ყველა მოლაპარაკება, ყველა მოქმედება - არჩევნები!" - -წერს ხოშტარია "ფეისბუქის" გვერდზე.

ზურაბ ჯაფარიძე: ღარიბაშვილმა 2010 წელიაო. დავუშვათ.

- 2010-ში თუ ასე იქცეოდნენ, ახლა როგორ იქცევიან წარმოგიდგენიათ?

- ჩუბინიძე თუ ასე იქცევა, ფარცხალაძე როგორ იქცევა წარმოგიდგენიათ?

- ბერას ნათქვამზე თუ ასე იქცევიან, ბიძინას ნათქვამზე რას იზამენ წარმოგიდგენიათ?

- ფეისბუქზე შეურაცხმყოფელ კომენტარზე თუ ასე რეაგირებენ, მათ ძალაუფლებას როცა საფრთხე ემუქრება, მაშინ რაზე არიან წამსვლელები წარმოგიდგენიათ?

ცნობისთვის, "ტვ პირველმა" გაავრცელა ფარული აუდიო ჩანაწერი, რომელშიც მათივე ცნობით, ბერა ივანიშვილის ირაკლი ღარიბაშვილთან და ანზორ ჩუბინიძესთან სატელეფონო საუბრებია ჩაწერილი. აუდიო ჩანაწერის მიხედვით, ბერა სოციალურ ქსელებში მისთვის არასასურველი კომენტარების დაწერის გამო, სავარაუდოდ, მოზარდის დასჯას ითხოვს.

აღნიშნულ ჩანაწერებთან დაკავშირებით გუშინ კომენტარი გააკეთეს ხელისუფლების წარმომადგენლებმაც. ფრაქცია "ქართული ოცნების“ თავმჯდომარის, მამუკა მდინარაძის თქმით, ეს არის 2010 წლის ჩანაწერი.

"ეს არის 2010 წლის ჩანაწერი. ხაზს ვუსვამ 2010 წლის და არა 2011-2012 წლების, როდესაც ბიძინა ივანიშვილი და "ქართული ოცნება“ შემოვიდა პოლიტიკაში. არაერთ, შეიძლება ათეულ ჩანაწერზეც კი არის საუბარი, საიდანაც ამოკრებილია ერთ-ერთი წითელი პრესის მედიასაშუალების მიერ სხვადასხვა ფრაზა. ეს არის აბსოლუტური ფაბრიკაცია. ჩვეულებრივი "კაგებეს“ მეთოდებით, "კაგებეშნიკურად“, წარსულში მძიმე გამოცდილების მიხედვით დამონტაჟებული", - აღნიშნა მდინარაძემ.