"მას ხაჯიმბას მოცილებაში დიდი წვლილი მიუძღვის, რაც ბჟანიამ დაუფასა, ახლა მთავარია, ბჟანიაც არ მოიცილოს" - ვინ არის და რატომ დააკავეს ახრა ავიძბა?

რუსეთის მიერ ოკუპირებულ აფხაზეთში, ე.წ. პრეზიდენტის ყოფილი მრჩეველი, სკანდალური ფიგურა ახრა ავიძბა დააკავეს. მისი მომხრეები მიიჩნევენ, რომ ავიძბა ბოლო ხანებში ბჟანია-ანქვაბის გუნდის წინააღმდეგ აქტიურად გამოდიოდა. რამდენიმე დღის წინ, სოხუმის ცენტრში, ბიზნესმენის, ბენურ (აკუნა) კვირაიას წინააღმდეგ გამართულ აქციაში მონაწილეობდა, რომელსაც ადგილობრივი მოსახლეობა თბილისში ბიზნესგეგმებთან დაკავშირებით გამართული ვიზიტის გამო დაუპირისპირდა.

აფხაზეთის ე.წ. შ.ს სამინისტროს ავიძბას დაკავების ფაქტი ჯერ არ დაუდასტურებია, თუმცა, მისი გარემოცვის წევრები წერენ, რომ: "სამართალდამცავები" მას სახლში "ორდერის" გარეშე შეუცვივდნენ, სახლი გაჩხრიკეს, მის ცოლს ტელეფონი ხელიდან გამოგლიჯეს და შეურაცხყოფა მიაყენეს..."

მათი ცნობითვე, ახრა ავიძბას სახლის ჩხრეკისას, იარაღი და სხვა საბრძოლო აღჭურვილობა ამოიღეს, რაც სინამდვილეში მისი არ ყოფილა და "შსს სამინისტროს თანამშრომლების შოუს ნაწილი იყო..."

AMRA-life - ს სამხედრო ჟურნალისტთან, სემენ პეგოვთან საუბარში, ავიძბას ახლობლები ამბობენ, რომ ამ საქმის უკან ე.წ. ხელმღვანელობა დგას, რომელსაც დონბასელი მებრძოლის ბოლოდროინდელი აქტივობები არ მოსწონდა.

ეს პირველი სკანდალი არ არის, რომელშიც ავიძბა აფხაზეთში დაბრუნების შემდეგ გაეხვა. ის რამდენიმე წლის წინ, სოხუმის ცენტრში ჩაცხრილული ე.წ. კანონიერი ქურდებიდან ერთ-ერთის, გუდაუთელი ალხას ავიძბას ნათესავია, მან იმჟამინდელ "ხელმძღვანელობას" ე.წ. შს მინისტრის გარი არშბას გადადგომა მოსთხოვა და მიზანსაც მიაღწია... ხაჯიმბას "ხელმძღვანელობის" გაშვებაში ავიძბას დიდი წვლილი მიუძღვის, რის შემდეგაც, ის აფხაზეთში კიდევ უფრო გავლენიანი ფიგურა გახდა.

დონბასის ინტერნაციონალური დაჯგუფება "პიატნაშკას" ლიდერი სატელევიზიო ჩართვებში იარაღით ჩნდებოდა, რასაც იმით ამართლებდა, რომ აფხაზეთში უიარაღოდ სიარული უსაფრთხო არ იყო.

შარშან, ზუსტად ამ დროს, ავიძბამ აფხაზეთის "იუსტიციის სამინისტროს" ახალი პოლიტიკურ-საზოგადოებრივი გაერთიანების დასაფუძნებლად რეგისტრაციისთვის მიმართა, თუმცა, გარკვეული ბარიერები შეექმნა და განაცხადა, რომ ბჟანია-ანქვაბის გუნდი მას ბლოკავდა.

ამის შემდეგ, ავიძბა, ფაქტობრივად, უკონტროლო გახდა, - ბჟანიას მრჩეველი საერთაშორისო ურთიერთობების საკითხებში, გადაწყვეტილებებს თავად იღებდა და კრიტიკულ განცხადებებსაც არ ერიდებოდა.

გასული წლის 7 აგვისტოს, ავიძბამ საკუთარი Toyota Land Cruiser-ის მარკის ავტომობილით ფსოუს გამშვები პუნქტის ჭიშკარი შეანგრია და აფხაზეთის ე.წ. საზღვარი ძალით გადაკვეთა, არადა, რუსი მესაზღვრეები მას საგზაო ჯარიმებისა და სხვა სახის სანქციების გადაუხდელობის გამო რუსეთის დატოვების უფლებას არ აძლევდნენ. რუსულ მედიასთან საუბარში ავიძბა აცხადებდა, რომ ერთ-ერთი რუსი მესაზღვრე "პროვოკაციულად" იქცეოდა, მას კი, "დიპლომატიური პასპორტი აქვს, მისი გაჩერების უფლება არ აქვთ". საბოლოოდ, აფხაზური მედიის ცნობით, ავიძბას ვალები, აფხაზეთის "ბიუჯეტიდან" დაფარეს.

აფხაზურ საზოგადოების ნაწილს ახრას უდანაშაულობის არც ახლა სჯერა. თუმცა, ზოგი მიიჩნევს, რომ ის "პატრიოტია" და ებრძვიან.

"ახრას ნატურიდან გამომდინარე, მისი უდანაშაულობის არავის სჯერა, მაგრამ შსს-ში რომ ყველაფერი ობიექტურად არ მიმდინარეობს, ესეც ვიცით... დავიჯერო, არავინ იცოდა, რომ ავიძბა იარაღის გარეშე ვერ იქნებოდა? ან ვინ არის აფხაზეთში იარაღის გარეშე, "ერპეგები" უდევთ სახლის სარდაფებში და ავტომატი საძინებელ ოთახში აქვთ მიყუდებული. ავიძბასი გაუკვირდათ?" - წერს ერთ-ერთი აფხაზი ინტერტემომხმარებელი ასლან ღარცკია.

"ბოლო დროს იმდენად სახიფათოდ იკრებდა გარშემო თავისნაირ გარეწრებს, უნდა დაეკავებინათ. ახლა მთავარია, უკან არ დახიონ და არ გამოუშვან - საშიში არაფერი აღმოჩნდაო. სოხუმში, ცენტრში მისი მომხრეები იკრიბებიან და მათ თუ გადახედავთ, უკვე გასაგებია, რასაც გეგმავდნენ... მას ხაჯიმბას ხელისუფლების მოცილებაში დიდი წვლილი მიუძღვის, რაც ბჟანიამ დაუფასა, ახლა მთავარია, ბჟანიაც არ მოიცილოს. მთავრობის სახლში იარაღით რომ დარბოდა, მაშინ უნდა მიმხდვარიყვნენ, ვისთან ჰქონდათ საქმე", - წერს ლეილა არშბა.

აღსანიშნავია, რომ იანვრის ბოლოს უკრაინის უშიშროების სამსახურმა ახრა ავიძბაზე ძებნა გამოაცხადა. უწყების განცხადებაში აღნიშნულია, რომ რუსეთის მოქალაქე ახრა ავიძბამ (მეტსახელად "აფხაზი") 2014 წელს დააფუძნა და დიდი ხნის განმავლობაში ხელმძღვანელობდა უკანონო შეიარაღებულ დაჯგუფებას "პიატნაშკას".