12
მაისიდღის ზოგადი ასტროლოგიური პროგნოზი
6 თებერვალს ქალაქ მაინის ფრანკფურტში ქართველმა ემიგრანტებმა დავითგარეჯის საქმესთან დაკავშირებით აქცია ჩაატარეს. “აქციები კვლავ გაგრძელდება. ჩვენ არ უნდა გვავიწყდებოდეს, ვისი გორისანი ვართ და არც ის, რომ დავითგარეჯი საქართველოა და ამ საგანძურს დაცვა სჭირდება. მომავალი ამას არ გვაპატიებს”, - ამბობს ambebi.ge-სთან საუბარში აქციის ორგანიზატორი მარიამ შტილერი (ფოფხაძე):
“დავითგარეჯი რომ საქართველოა, ეს არავისთვის არ უნდა იყოს სადაო, მაგრამ, სამწუხაროდ, მაინც გვიწევს ამ თემაზე ყურადღების გამახვილება. ჩვენი აქციით გამოვთქვამთ პროტესტს შექმნილი ვითარებიდან გამომდინარე და ასევე, ვცდილობთ, საქართველოს ფარგლებს გარეთ სხვებსაც გავაცნოთ ის სავალალო სიტუაცია, რაც დღესდღეობით ჩვენს მიწა-წყალზე ხდება. თავისთავად, ესაა მცირე ნაბიჯი, მაგრამ ერთი ნაბიჯი მეორეს უნდა მიემატოს და ერთად უნდა ვთქვათ ჩვენი სათქმელი იმ შემთხვევაში, თუკი ეს თავისთავად არ ესმით მავანთ.
ისტორია და დრო კი თვითონ იტყვიან თავის სათქმელს და ყორღანაშვილების ბედის შესახებ კი ყველას მოგეხსენებათ. ქართული მიწისა და მით უმეტეს, ქართული მონასტრების გაყიდვა არავის შერჩება, დავითგარეჯი კი ქართული იერუსალიმია, ქართული სუნთქვა და ქართული ძარღვია. ეს არ იქნება პირველი და ბოლო აქცია! აქციის შესახებ ინფორმაცია ბევრ გერმანულ-ქართულ ჯგუფში გავავრცელე. ბევრმა ვერც მოახერხა მოსვლა გარკვეული და საპატიო მიზეზების გამო. სრულიად უცნაური ისაა, რომ, დიდი წინააღმდეგობაც კი შემხვდა “ფეისბუქზე”...
დარწმუნებული ვარ, რომ ბევრმა ქართველმა იცოდა აქციის შესახებ, მაგრამ როგორც ჩანს, ძალიან ბევრსაც არ ენაღვლება დავითგარეჯის ბედი... დიდი მადლობა კი მათ, ვისაც გულით სურდა მოსვლა და ვერ მოახერხა. აქცია ევროს სიმბოლოსთან გავმართეთ. მიუხედავად იმისა, რომ წვიმდა და საკმაოდ ციოდა, მაინც დიდხანს გავჩერდით და გამვლელ-გამომვლელებს საინფორმაციო ფურცლებს ვურიგებდით. მიუხედავად იმისა, რომ პოლიცია გვიცავდა, მაინც გვეშინოდა მოწინააღმდეგე მხარის თავდასხმის, რადგანაც ამ დღეებში რამდენიმე ადამიანი იმუქრებოდა “ფეისბუკზე”.
