ორგანიზაცია, რომელიც დაწესებულ შეზღუდვებს მიზანმიმართულად დაარღვევს, სახელმწიფოს სუბსიდირებას ვეღარ მიიღებს - გახარია

პრემიერ-მინისტრ გიორგი გახარიას თქმით, ორგანიზაციები, რომლებიც თვითნებურად დაარღვევენ დაწესებულ შეზღუდვებს, სახელმწიფოსგან სუბსიდირებას ვეღარ მიიღებენ.

მისივე თქმით, შეზღუდვების შემსუბუქების შემდგომ მეტი პასუხისმგებლობა ეკისრება როგორც მოქალაქეებს, ისე ბიზნესს:

"მოგეხსენებათ, რომ ინფიცირების ყოველდღიური დადებითობის მაჩვენებელი ჩამოვიდა 4%-ზე ქვემოთ, რაც გვაძლევს შესაძლებლობას თამამად და ფრთხილად გავაგრძელოთ შეზღუდვების შემსუბუქება.

თუმცა, ყველას უნდა გვახსოვდეს, რომ რაც უფრო თამამად ვამსუბუქებთ შეზღუდვებს, მით უფრო მეტი პასუხისმგებლობაა თითოეული ჩვენგანის, რომ წესები დავიცვათ. შეზღუდვების არაგონივრული, არაფრთხილი, სწრაფი მოხსნა-გაუქმება არის შეზღუდვების თავიდან დაწესების პირდაპირი გზა, ამიტომ ყველამ ერთად უნდა ვიზრუნოთ იმისთვის, რომ ის შეზღუდვები, რაც ჩვენ დღეს ინფექციის მართვის თვალსაზრისით გვაქვს, შევინარჩუნოთ, რათა გაზაფხულის ბოლოს ზაფხულის დასაწყისში კიდევ უფრო თამამად შევუწყოთ ხელი ეკონომიკას და პირველ რიგში ტურიზმს, რომ ამოქმედდეს უფრო ეფექტურად.

ამასთან, ნებისმიერი ორგანიზაციის მიერ, დაწესებული წესების მიზანმიმართულ დარღვევას, გარდა იმისა, რომ მოყვება უმკაცრესი დასჯა, მივიღეთ გადაწყვეტილება, ასეთი ორგანიზაციები ვეღარ მიიღებენ სახელმწიფოს მხრიდან იმ სუბსიდირებასა და იმ დახმარებას, რომელიც გათვალისწინებული იყო პანდემიის პერიოდში ეკონომიკური მხარდაჭერის ფარგლებში. გარდა ამისა, ვეღარ მიიღებენ მომავალში სახელმწიფოს მხარდაჭერის ნებისმიერ ღონისძიებაში მონაწილეობას.

ვფიქრობ, რომ ეს არის სრულიად სამართლიანი და ეს არის ნაბიჯი, რომელმაც უნდა გამოავლინოს თითოეული ჩვენი მოქალაქეის და ორგანიზაციის პასუხისმგებლობა" - განაცხადა გახარიამ.

შეგახსენებთ, შეზღუდვების შემსუბუქების ფარგლებში, მთავრობის გადაწყვეტილებით, 8 თებერვლიდან მუნიციპალური ტრანსპორტისა და ბაზრობების ფუნქციონირება აღსდგება, 15 თებერვლიდან კი სკოლებში სასწავლო პროცესი განახლდება და რესტორნები ფუნქციონირებას განაახლებენ.