"მიუხედავად იმისა, რომ ნიკა გვარამიას ნომერი საჯაროდ ხელმისაწვდომია, საკითხს შევისწავლით" - სახელმწიფო ინსპექტორის განცხადება

სახელმწიფო ინსპექტორი "მთავარი არხის" გენერალური დირექტორის ნიკა გვარამიას მობილური ნომრის გასაჯაროების საკითხს შეისწავლის. აღნიშნულის შესახებ სახელმწიფო ინსპექტორის განცხადებაშია აღნიშნული.

"პერსონალურ მონაცემთა დაცვის შესახებ” საქართველოს კანონი არეგულირებს მონაცემთა დამუშავების, მათ შორის, გასაჯაროების საკითხებს. აღნიშნული კანონი, რომლის მიზანი ადამიანის პერსონალური მონაცემებისა და პირადი ცხოვრების დაცვაა, ამომწურავად ჩამოთვლის იმ შემთხვევებს, როდესაც დასაშვებია პერსონალური მონაცემების გასაჯაროება.

მიუხედავად იმისა, რომ ნიკა გვარამიას ტელეფონის ნომერი ინტერნეტსივრცეში საჯაროდ ხელმისაწვდომია, სახელმწიფო ინსპექტორის სამსახური შეისწავლის იყო თუ არა ნიკა გვარამიას ტელეფონის ნომრის დამუშავებისას სახეზე "პერსონალურ მონაცემთა დაცვის შესახებ" საქართველოს კანონით გათვალისწინებული მონაცემთა გასაჯაროების საფუძველი და შეესაბამება თუ არა აღნიშნული მონაცემის ასეთი ფორმით არსებობა და გამჟღავნება კანონს.

აქვე აღვნიშნავთ, რომ ნებისმიერი პირი სიფრთხილით უნდა მოეკიდოს სხვისი პერსონალური მონაცემების დაცვას. განსაკუთრებით იმ შემთხვევაში, როცა საქმე მონაცემთა ფართო წრისთვის გასაჯაროებას ეხება" - ნათქვამია განცხადებაში.

შეგახსენებთ, თეა წულუკიანმა ნიკა გვარამიას ტელეფონის ნომერი პარლამენტის პლენარულ სხდომაზე მას შემდეგ გამოაცხდა, რაც დეპუტატმა ალეკო ელისაშვილმა გაასაჯაროვა საკუთარი მობილურის ნომერი და მოქალაქეებს მოუწოდა, მომდევნო ოთხი წლის განმავლობაში დაუკავშირდნენ მას.

"ბატონო ალეკო, თქვენ დემოკრატიის მაღალი სტანდარტი გვაჩვენეთ, როგორ უნდა იურთიერთო ხალხთან და ნომერიც ჩაგვაწერინეთ. მეც მინდა ჩემი ნომერი ჩაგაწერინოთ. ეს არის - 577 201212 და იქნებ მოინიშნოთ, ხალხმაც რომ იცოდეს. მოინიშნეთ? ოღონდ ეს ჩემი ნომერი არ არის, ეს ნიკა გვარამიას ნომერია, დაურეკეთ და ის რასაც გიკარნახებთ, გაყალბდა თუ არა არჩევნები, იმაზე ისაუბრეთ ამ პარლამენტში. თუ არჩევნები გაყალბდა, აქ რას აკეთებთ?" - მიმართა წულუკიანმა ელისაშვილს.