სტრასბურგის გადაწყვეტილებაზე რუსული მედია დეზინფორმაციას ავრცელებს - "დაწყებული ომი ბოლომდე უნდა იქნას მიყვანილი. ეს იცოდა ამხანაგმა სტალინმა"

21 იანვარს, 2008 წლის ომის საქმეზე, სტრასბურგის სასამართლომ გადაწყვეტილება გამოაცხადა. "ეს გადაწყვეტილება რუსეთის მიერ საქართველოს წინააღმდეგ განხორციელებული სამხედრო აგრესიის პირველი საერთაშორისო სამართლებრივი შეფასებაა, რომელმაც იურიდიულად დაადასტურა რუსეთის ბრალეულობა მის მიერ ჩადენილ დანაშაულებებზე“, - განაცხადა ქვეყნის ვიცე-პრემიერმა, საგარეო საქმეთა მინისტრმა დავით ზალკალიანმა.

• შეგახსენებთ, იუსტიციის სასამართლოს ინფორმაციით, ადამიანის უფლებათა ევროპული სასამართლო დაეთანხმა საქართველოს მოთხოვნას, რომ რუსეთმა 2008 წლის აგვისტოს ომის დროს ადამიანის უფლებათა ევროპული კონვენციის არაერთი მუხლი დაარღვია.
• სასამართლოს დიდი პალატის მიერ ამ დარღვევების აღიარებით დასტურდება, რომ 2008 წლის აგვისტოს ომის დროს რუსეთმა განახორციელა ქართველების ეთნიკური წმენდა.
• სტრასბურგის სასამართლომ გაიზიარა საქართველოს პოზიცია და აღიარა რუსეთის პასუხისმგებლობა ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის.
• სტრასბურგის სასამართლომ გაიზიარა საქართველოს პოზიცია და აღიარა რუსეთის პასუხისმგებლობა სამოქალაქო პირების თავისუფლებისა და უსაფრთხოების უფლების დარღვევისათვის.
• სასამართლომ გაიზიარა საქართველოს პოზიცია და დაადგინა რუსეთის პასუხისმგებლობა ომის დროს საქართველოს მოქალაქეთა მკვლელობების გამოუძიებლობისათვის და სხვა არაერთი დარღვევისათვის.

ეს ისტორიული გადაწყვეტილება უმნიშვნელოვანესი ბერკეტია საქართველოსათვის საერთაშორისო სამართლებრივი მექანიზმების გამოყენებით კონფლიქტების მოწესრიგებისა და ტერიტორიული მთლიანობის აღდგენისათვის.

ცნობილია ისიც, რომ კონპენსაციის საკითხს სასამართლო უახლოესი ერთი წლის განმავლობაში განიხილავს, ასევე მიიღება გადაწყვეტილებები საქართველოს მოქალაქეების ინდივიდუალურ საჩივრებზეც.

რუსეთის მასობრივი ინფორმაციის საშუალებები აქტიურად ეხმიანებიან ადამიანის უფლებების ევროპული სასამართლოს დიდი პალატის გადაწყვეტილებას, თუმცა ინფორაციას დამახინჯებულად ავრცელებენ. დეზინფორმაციას კი სათავე დაუდო რუსეთის იუსტიციის სამინისტროს საიტზე გამოქვეყნებულმა ინფორმაციამ, რომლის ტირაჟირება შემდეგ სხვა საინფორმაციო საშუალებების მიერ მოხდა.

იუსტიციის სამინისტროს საიტზე გამოქვეყნებული მასალის სათაური ასეთია: - "ადამიანის უფლებების ევროპულმა სასამართლომ საქართველოს ბრალდება რუსეთის მისამართით სამხრეთ ოსეთსა და აფხაზეთში 2008 წლის 8-12 აგვისტოს მომხდარ მოვლენებთან დაკავშირებით უსაფუძვლოდ აღიარა“. მასში ვკითხულობთ:

"თითქმის 12-წლიანი განხილვის შედეგად სასამართლო მივიდა დასკვნამდე, რომ შეუძლებელია რუსეთის ფედერაციას დაეკისროს პასუხისმგებლობა ადამიანის უფლებათა დაცვის კონვენციის მიხედვით იმ ინციდენტებისათვის, რომელიც მოხდა რუსეთის სამხედრო მოსამსახურეებზე (სამშვიდობო კონტიგენტზე) და სამოქალაქო მოსახლეობაზე ქართული არმიის თავდასხმისა და მისი მოგერიების დროს, 2008 წლის 8-12 აგვისტოს პერიოდში. ასევე სასამართლომ მხარი არ დაუჭირა საქართველოს ხელისუფლების მტკიცებას რუსეთის შეიარაღებული ძალების თითქოსდა შეჭრაზე სამხრეთ ოსეთში 2008 წლის 7 აგვისტოს, ანუ ქართველი სამხედროების თავდასხმამდე ქალაქ ცხინვალზე..."

"ქართული მხარე ამ საქმეში წარუმატებლად ცდილობდა დაემტკიცებინა, რომ ადამიანის უფლებათ ევროპული კონვენცია გამოიყენება არა მხოლოდ მშვიდობიან დროს, არამედ საბრძოლო პირობებშიც, რაც ფაქტიურად ძირს უთხრის საერთაშორისო ჰუმანიტარული სამართლის საფუძვლებს. ჩვენ შევძელით დაგვერწმუნებინა ევროპელი მოსამართლეები იმაში, რომ რუსეთის შეიარაღებული ძალების მოსამსახურეთა მოქმედების სამართლებრივი შეფასება სამხრეთ ოსეთსა და აფხაზეთში 2008 წლის აგვისტოში აღნიშნული კონვენციის იურისდიქციის ფარგლებს მიღმა მდგომარეობს. ასევე, სასამართლომ ვერ დაადგინა რუსი სამხედრო მოსამსახურეების მიერ სამოქალაქო მოსახლეობის უფლებების დარღვევის ფაქტები 2008 წლის აგვისტოს მოვლენების დროს“, - აღნიშნა რუსეთის რწმუნებულმა ადამიანის უფლებათა ევროპულ სასამართლოში, რუსეთის იუსტიციის მინისტრის მოადგილემ მიხეილ გალპერინმა.

მიუხედავად იმისა, რომ რუსეთის იუსტიციის სამინისტრო დამარცხებას არ აღიარებს, იქვე მაინც აღნიშნავს, რომ არ ეთანხმება სასამართლოს მიერ გამოტანილ რიგ დასკვნებს, მათ შორის იმაზეც, რომ რუსეთის მხარეს პასუხისმგებლობა უნდა დაეკისროს იმ ინციდენტებზე, რომელიც სამხრეთ ოსეთსა და აფხაზეთში 20018 წლის 12 აგვისტოს შემდეგ ხდებოდა, თანაც მათში რუსი სამხედრო მოსამსახურეების უშუალო მონაწილეობა არ დადასტურებულა.

"მშვიდობიანი მოსახლეობის დაცვასა და შეიარაღებული კონფლიქტის ესკალაციის აღკვეთაში რუსეთის ფედერაციის მონაწილეობის გარემოებების ასეთი შეფასება გამომდინარეობს ევროსასამართლოს ექსტერიტორიული იურისდიქციის კონცეფციიდან, რომელიც ეწინააღმდეგება გაეროს საერთაშორისო სასამართლოს პოზიციას და საერთაშორისო სამართლის ზოგადად აღიარებულ წესებს,” - აღნიშნულია რუსეთის იუსტიციის სამინისტროს განცხადებაში.

"ადამიანის უფლებათა დაცვის ევროპული სასამართლოს დადგენილება საქმეზე "საქართველო რუსეთის წინააღმდეგ (II)“ არ შეიცავს გადაწყვეტილებას ფულადი კომპენსაციის შესახებ. შესაბამისი განაცხადი სასამართლომ შემდგომი განხილვისათვის გადადო“, - ნათქვამია რუსეთის ფედერაციის იუსტიციის სამინისტროს მიერ გამოქვეყნებულ პუბლიკაციაში და არსად არის ნახსნები, რომ ამ საკითხს სასამართლო უახლოესი ერთი წლის განმავლობაში განიხილავს. წყარო

რუსულმა მასმედიამ (სააგენტოები, რადიო-ტელევიზია, გაზეთების ვებ-გვერდები და ა.შ.) ამ ძირითად თავდაპირველ ოფიციალურ ინფორმაციას თავისებური ინტერპრეტაციით მიკერძოებული სათაურები მოუძებნა და ტენდენციური სახით გაავრცელა. ასე, მაგალითად: "ადამიანის უფლებების ევროპულმა სასამართლომ საქართველოს ბრალდება რუსეთის მიმართ უსაფუძვლოდ ჩათვალა“ («ТАСС»), "ევროსასამართლომ უარყო საქართველოს ბრალდებები რუსეთის მიმართ "ხუთდღიან ომთან“ დაკავშირებით“ («Труд») "ევროპულმა სასამართლომ ჩათვალა, რომ საქართველოს ბრალდებები რუსეთის წინააღმდეგ არ დასტურდება («Новая газета»).

რუსული გამოცემა "პოლიტნავიგატორი“ («Политнавигатор») უკრაინის პოზიციას აკრიტიკებს და აქვეყნებს პუბლიკაციას, სათაურით "ყირამალა: უკრაინა აცხადებს, რომ ევროსასამართლოში საქართველომ რუსეთზე გაიმარჯვა“. პუბლიკაციაში გადმოცემულია ევროპული სასამართლოს დადგენილება და იქვე "ყირიმში უკრაინის პრეზიდენტის ექსწარმომადგენლის ბორის ბაბინის თვალსაზრისი: "რუსეთი, როგორც სახელმწიფო-აგრესორი კიდევ ერთხელ დამარცხდა მსოფლიოს დასანახად. რუსეთის ფედერაცია კიდევ ერთხელ იქნა აღიარებული მკვლელად და ჯალათად უმაღლეს დონეზე... ეს დადგენილება უკრაინისთვისაც სასარგებლო იქნება, დონბასის საქმესთან დაკავშირებით“, - აცხადებს ბორის ბაბინი.

"პოლიტნავიგატორი“ უკრაინელ ყოფილ ჩინოვნიკს სიმართლის დამახინჯებას საყვედურობს. წყარო

პოპულარული რუსული გამოცემა "ვზგლიადი“ («Взгляд»), აქვეყნებს რა პუბლიკაციას სათაურით "საქართველომ ევროსასამართლოს გადაწყვეტილება რუსეთთან ომის საქმესთან დაკავშირებით "თავის გამარჯვებად“ ჩათვალა“, იქვე მასალას მკითხველთა კომენტარებსაც ურთავს. აი ზოგიერთი მათგანი:

მიხეილ სააკაშვილი 2008 წელს უნდა დაგვეჭირა და ჩამოგვეხრჩო

დროა ევროსასამართლოს დადგენილებებს ყურადღება აღარ მივაქციოთ

ესე იგი, ძირითად პუნქტებში რუსეთმა გაიმარჯვა, ხოლო რაც შეეხება ცალკეულ შემთხვევებს, უფლებების დარღვევა კი ყველა ომში ხდება

მთელი ეს ისტორია საქართველოსთან, უკრაინასთან და სხვებთან დაკავშირებით ადასტურებს, რომ დაწყებული ომი აუცილებლად ბოლომდე უნდა იქნეს მიყვანილი. ეს იცოდა ამხანაგმა სტალინმა, ამიტომაც ევროპაში ჩვენი მეგობარი სახელმწიფოები გაჩნდნენ. აბა, წარმოიდგინეთ, რა მოხდებოდა, მას რომ ყველაფერი თვითდინებით მიეშვა...

საქართველომ სასამართლოში გაიმარჯვა.. ომში კი რუსეთმა

ევროსასამართლომ გაუგებარი ვერდიქტი გამოიტანა - არც ჩვენებს და არც თქვენებს

საქართველომ, ომისგან განსხვავებით, ლოკალურად სასამართლოში წარმატებას მიაღწია.

წყარო

მოამზადა სიმონ კილაძემ