"ფეხზე კიდიათ ჩვენი სფერო! მართლა მშივრები ხომ არ დავიხოცებით?“ - ახალ წელს დაწესებული შეზღუდვების გამო მომღერლები მთავრობას აკრიტიკებენ

მომღერალი ოთო ნემსაძის კრიტიკა ეკონომიკისა და მდგრადი განვითარების მინისტრის მოვალეობის შემსრულებელის, ნათია თურნავას დღევანდელმა განცხადებამ გამოიწვია. როგორც ცნობილი გახდა, ახალ წელს სასტუმროებში მაყურებლის დასწრებით კულტურული ღონისძიებების გამართვა იკრძალება.

განცხადებას ოთო ნემსაძე სოციალურ ქსელში გამოეხმაურა:

“ამიხსნას ვინმემ თუ სასტუმროებში ადამიანების დასვენება შესაძლებელია, სადაც ყველა ყოველდღე ერთმანეთს ხვდება, რატომ არ შეიძლება ჩემი 50 - კაციანი კონცერტი ამავე სასტუმროში? ხმას არ ვიღებ ამდენი ხანია. ვემორჩილებით ყველა რეგულაციას, ვემიჯნები პოლიტიკურ აურზაურს... მართლა მშივრები ხომ არ დავიხოცებით?ან ის ხალხი მაინტერესებს საახალწლო კონცერტების გამო რომ გვლანძღავს და თვითონ ერთი წელი სახელმწიფო სამსახურიდან ხელფასს რომ იღებს. მე რა ვქნა, არც თვითდასაქმებულშიც რომ ვერ გავდივარ. ამიხსნას ვინმემ !!!“- წერს ოთო ნემსაძე.

“მუხანათია“ - წერს პოსტის საპასუხოდ კახა მამულაშვილი, იგივე “მამულიჩა". პოსტს გამოხმაურება ნემსაძის კოლეგებისა და მეგობრების მხრიდან მოჰყვა.

“აი ზუსტად რა! მთელი წელი არავის უმუშავია და ისე იღებენ ხელფასს!! და ჩვენ მართლა ერთი ლარიც კი არ აგვიღია არსაიდან მთელი ამდენი თვე და ერთი კონცერტი როგორ არ უნდა შეგვარგონ ახალი წლის, ერთი დღე! ამაზე არ ფიქრობენ იმიტომ, რო ფეხზე კიდიათ ჩვენი სფერო, ვისაც მხოლოდ ეს პროფესია გვაქვს და სხვა დამატებითი სამსახური არა, ჩვენ ადამიანებად არ გვთვლიან?!“ - წერს მომღერალი ნათია დუმბაძე.

ეკონომიკისა და მდგრადი განვითარების მინისტრის მოვალეობის შემსრულებელი ნათია თურნავა სასტუმროების წარმომადგენლებს მიმართავს და აცხადებს, რომ მკაცრად მოუწევთ დაიცვან დადგენილება, რომლის თანახმადაც მაყურებლის დასწრებით კულტურული ღონისძიებები იკრძალება.

"მოდის ახალი წელი და ბუნებრივია, ტურისტული ინდუსტრია, იქ სადაც შეზღუდვები მასზე არ გავრცელდა, ემზადება ამისთვის, მაგრამ ყველას შევახსენებ, განსაკუთრებით სასტუმროებს ეხება ეს, რომ არსებობს მთავრობის მიერ დაწესებული შეზღუდვები, ეს არის იზოლაციის და კარანტინის შესახებ საქართველოს მთავრობის 23 მაისის 322-ე დადგენილება, რომლის თანხმადაც იკრძალება კულტურული ღონისძიებები მაყურებლის დასწრებით, აქედან გამომდინარე, ყველა სასტუმროს, ვინც საახალწლოდ ელოდება სტუმრებს, შეგახსენებთ, რომ ეს შეზღუდვა არის დაწესებული და მისი დაცვა მკაცრად მოგვიწევს", - განაცხადა ნათია თურნავამ.