"ახლაც მიკეთია "კათეტერი" და ამ სირბილშიც ვიკეთებ გადასხმას" - რას ყვება 8 შვილის დედა, რომელმაც კოვიდი დაამარცხა და ინფიცირებულებს ეხმარება

რამდენიმე დღის წინ, სოციალურ ქსელში, ერთ-ერთმა მომხმარებელმა, რუსო ბერიძემ ინფორმაცია გაავრცელა, რომ რვა შვილის დედა, რომელმაც კოვიდი გადაიტანა, ინფიცირებულებს გადასხმისთვის სახლში აკითხავს. ბერიძის ცნობით, აღნიშნული ადამიანი ექთანი, მრავალშვილიანი დედა, ნათია დიაკონიძეა, რომელიც მასთანაც იმყოფებოდა სახლში, ოჯახის ინფიცირებული წევრების დასახმარებლად.

AMBEBI.GE ნათია დიაკონიძეს დაუკავშირდა:

"კი, 8 შვილის მარტოხელა დედა ვარ, ვცხოვრობ ვარკეთილში, ნაქირავებ ბინაში... 15 წლის ვიყავი, რომ მომიტაცეს. მოკლედ, გავთხოვდი, ბავშვები შემეძინა და საექთნო ლიცეუმში სწავლის დასრულება ვეღარ შევძელი, ხელი შემეშალა. ასე რომ, უდიპლომო ექთანი ვარ, მაგრამ 20-წლიანი სტაჟი მაქვს გადასხმების კეთების, 8 შვილის გაზრდასთან ერთად, კი იცით, რომ გამოცდილება მოდის. ამ წლების მანძილზე სხვადასხვა დაავადებასთან მქონია შეხება და უკვე ჩემი გამოცდილებით, რაღაცების რჩევა სხვებისთვისაც შემიძლია," - გვეუბნება ქალბატონი ნათია, რომელმაც ცოტა ხნის წინ კორონავირუსი გადაიტანა, გამოვიდა მდგომარეობიდან და სურვილი გაუჩნდა, რომ სხვა დაავადებულებს დაეხმაროს:

"ერთ-ერთი გოგოს პოსტი ვნახე, ქუთაისში დადის სახლებში და კოვიდიანებს ეხმარება. რადგანაც ვირუსი უკვე დავამარცხე, სურვილი გამიჩნდა, მეც ასე დავხმარებოდი ინფიცირებულებს და დავწერე პოსტი, ვისაც უნდა დახმარება, მოვალ და მოგემსახურებით-მეთქი... ერთი გვერდია, "როგორ დავამარცხოთ კოვიდი", სადაც ხალხი დახმარებას ითხოვს. იქაც და ისედაც მსურველები გამოჩდნენ, საზღვარგარეთიდანაც მიკავშირდებიან, - ახლობლებს მაბარებენ, ყურადღება მიეაქციო, ქალაქგარეთაც დავიდივარ, სად აღარ მიწევს მისვლა," - გვიყვება რესპონდენტი...

- 8 შვილს როგორ არჩენთ?

- ინდოელებთან ძიძად ღამის ცვლაში ვმუშაობ, მცირეწლოვანი ტყუპ ბავშვებს ვუვლი. კოვიდიც, სავარაუდოდ, თანამშრომლისგან იქ გადამედო და სამსახურში თითქმის ყველა დავინფიცირდით. რაც შეეხება ჩემს შვილებს, 4 გოგო მყავს და 4 ბიჭი. უფროსი - 23 წლისაა, მომდევნოები - 19-ის, 18-ის, 16-ის, 10-ის, 8-ის, 6-ის და 3 წლის, მეუღლეს წელიწად-ნახევარია, დავცილდი...

- ასე მარტო როგორ უმკლავდებით ამხელა ოჯახს?

- თვითონ ბავშვები მეხმარებიან ერთმანეთის გაზრდაში. უფროსი ბიჭი ცოლიანია და ქუთაისში ცხოვრობს. უფროსები უმცროსებს აქცევენ ყურადღებას... მეცადინეობენ, მასწავლებეთან დადიან... კომპიუტერი კი გვაქვს ერთი, მაგრამ მორიგეობით სარგებლობენ, ასევე ერთი სკოლის მოსწავლის ნოუთბუქიც გვავქვს. უფროსი გოგო სტუდენტია. მოსწავლე კი, სულ 4 გვყავს სახლში.

- კორონვირუსს სად და როგორ უმკურნალეთ?

- როგორც გითხარით, სადაც ვმუშაობ, იქ დავინფიცირდი, ყველას გადაგვედო. მერე იქვე ერთი კვირა ჩაკეტილი ვიყავი. შემდეგ სახლში წამოვედი... რაც კორონას ახასიათებს, ყველა სიმპტომი მქონდა. ცოტა ბრონქების პრობლემა მაქვს და ამიტომ ხველა იყო გაძლიერებული, ტემპერატურამაც ამიწია, მაინცდამაინც მძიმედ არ ვყოფილვარ. თვითონ ვიკეთებდი გადასხმას. ის კი არა, ახლაც მიკეთია "კათეტერი" და ამ სირბილშიც საპროფილაქტიკოდ გადასხმას კიდევ ვიკეთებ. იმუნიტეტისთვის „ომეგა 3“-ს და „დ 3“-საც ვსვამდი და ყველა რეკომენდაციას ვიცავდი, რასაც ექიმები გვაწვდიან.

- სისტემის დადგმა სად ისწავლეთ?

- პირველი ბავშვი პრობლემური იყო, საავადმყოფოში ხშირად ვიწექით ხოლმე... მერე ორსულად რომ ვიყავი შემდეგ ბავშვზე, მჭირდებოდა გადასხმა და ჩემს თავზე ვისწავლე, თვითონ ვიკეთებდი. ოჯახის წევრებსა და ახლობლებს საჭიროების შემთხვევაში ვუდგამდი. უცხოებისთვის არ გამიკეთებია.

- ახლა რომ დადიხართ დაინფიცირებულ პაციენტებთან, რა სურათია - მძიმედ არიან ადამიანები?

- თუ დიდი ოჯახია, თითო ოჯახში 2-3-ი გადასხმაა გსაკეთებელი. დღეში 30 პაციენტთან მიწევს სისტემის დადგმა. არიან მოხუცები, რომლებიც მარტო ყავთ სახლში დატოვებულები და იქ წამლებიც უნდა მივიტანო. ზოგი ჩაკეტილია სახლში. წამლების ფულს მინაზღაურებენ და კიდევ ტაქსის თანხას იხდიან, რადგანაც ტრანსპორტი არ არის, გადასაადგილებლად ტაქსის დაქირავება მიწევს და ისე ვმოძრაობ.

დილიდან ღამემდე ჩართული ვარ... ისე, ერთი რამ კი ძალიან მიკვირს - თუკი რამდენიმე დღე მაღალი ტემპერატურა გრძელდება, ექიმები ანტიბიოტიკის რატომ არ ნიშნავენ? ფილტვების ანთება, ასთმის შეტევა ანტიბიოტიკის გარეშე როგორ უნდა დაამარცხო? ექიმი არ ვარ, არაფერს ვამტკიცებ, მაგრამ ასე ვფიქრობ. მე მაგალითად, ვიკეთებდი ატიბიოტიკს... მოკლედ, ყველას ჯანმრთელობას ვუსურვებ. მთავარია, არაფრის შეეშინდეთ და დაიცვან რეკომენდაციები...