"კიბეებზე ჩარბენის ხმამ გამაღვიძა, ეტყობა, მკვლელი გარბოდა. ვიღაც ყვიროდა, ხანძარია, გარეთ გადითო, აფეთქების საშიშროება იყო" - რას ყვებიან მეზობლები თემქაზე მომხდარ საზარელ მკვლელობაზე

თემქაზე მომხდარი მკვლელობის დეტალებს ამ დრომდე სამართალდამცავები არკვევენ. ჯერჯერობით მკვლელობის მოტივად ურთიერთშელაპარაკება სახელდება, თუმცა საზოგადოებისთვის უცნობია, რატომ მივიდა საქმე სისხლისღვრამდე.

თემქის მესამე მიკრორაიონში სამართალდამცავებს დალუქული აქვთ იმ სახლის კარი, სადაც საშინელი ტრაგედია დატრიალდა. სახლი "კანონი და სამართალის" პარტიის წევრ ლევან შაბურიშვილს ეკუთვნის. იქ 13 ნოემბერს ახალგაზრდები შეიკრიბნენ. ლევანთან მისი ბავშვობის მეგობარი მიშო მელიქიშვილი იყო, მიშოს ლევანის მეზობლებიც იცნობენ, რადგან იქ ხშირად დადიოდა და ყველა დადებითად ახასიათებს.

გამოძიებით დადგინდა, რომ ბრალდებული ნარიმანიძე, მეგობარ გოგონასთან - 1999 წელს დაბადებულ ა.უ.-სთან ერთად მივიდა ლევან შაბურიშვილის სახლში. ისიც ცნობილია, რომ დამნაშავე მიშო მელიქიშვილს იცნობდა. იმ ღამით ნიკოლოზ ნარიმანიძესა და მიშო მელიქიშვილს შორის შელაპარაკება მოხდა, რაც ჩხუბში გადაიზარდა. სწორედ ამ დროს ნარიმანიძემ მიშოს ჭრილობა ყელში დანით მიაყენა. მოჩხუბრების გაშველება სცადა ლევანმა, რა დროსაც მას დამნაშავემ დანა ყელში დაარტყა. მიშო ადგილზე გარდაიცვალა, ლევანმა კი მოახერხა მოძალადისგან თავის დაღწევა და სადარბაზოში დასისხლიანებული გამოვარდა. სადარბაზოს კედლებს ამ დრომდე ეტყობა სისხლის კვალი, სისხლის კვალი ჩანს კიბის საფეხურებზეც, როგორც ჩანს, ეს ლევან შაბურიშვილის სისხლია, რომელიც დაჭრილი კიბეებზე გარბოდა.

ჩვენი ინფორმაციით, ბრალდებულ ნიკოლოზ ნარიმანიძის დაკავება არაშენდასთან ძალიან ოპერატიულად მოხდა. მაშინ დააკავეს დამნაშავე და მისი მეგობარი გოგონა, როცა ერთად ტაქსით მოძრაობდნენ. მანქანის მარკის დადგენაში ძალოვნებს, სავარაუდოდ, კორპუსის წინ არსებული "ორი ნაბიჯის" მაღაზიის სათვალთვალო კამერები დაეხმარება. დამნაშავის ვინაობის დადგენა კი არ გასჭირვებიათ, ადგილობრივების თქმით, შესაძლოა თავად დაჭრილმა უთხრა მკვლელის ვინაობა ძალოვნებს.

შს სამინისტროს ინფორმაციით, დაკავებული ნარიმანიძე წარსულში არაერთხელ ნასამართლევია. მას განზრახ მკვლელობის, ასევე, ორი ან მეტი პირის მიმართ დამამძიმებელ გარემოებაში ჩადენილი განზრახ მკვლელობის მცდელობისა და სხვისი ნივთის განადგურების ბრალი წაუყენეს. დანაშაული 16-დან 20 წლამდე ვადით ან უვადო თავისუფლების აღკვეთას ითვალისწინებს. მასთან ერთად დაკავებულია გოგონა, რომელიც ამ მკვლელობის თვითმხილველია.

21 წლის გოგოს განსაკუთრებით მძიმე დანაშაულის შეუტყობინებლობას ედავებიან და მისთვის წაყენებული ბრალი 3-დან 7 წლამდე თავისუფლების აღკვეთას ითვალისწინებს.

"12 საათი ხდებოდა, როცა ხმაურზე სადარბაზოში გავიხედე, ჩვენს ზედა სართულზე მაცხოვრებელი ადამიანი ყვიროდა, სახლი იწვის, ვიხრჩობით, კვამლი ჩვენს ბინაში ამოვიდა, სასწრაფოდ დაცალეთ ბინებიო. პლედში გახვეული პატარა ბავშვი ხელში ატატებული ჩაყავდა კიბეებზე და ყველას გვთხოვდა გარეთ გავსულიყავით. სადარბაზოში გაზის სუნიც იდგა და აფეთქების საშიშროებაც იყო. ძალიან მალე მოვიდა სახანძრო მანქანაც, როგორც ჩანს, დარეკეს მეზობლებმა. მერე გავიგეთ, რომ იმ ბინაში ცეცხლი ხელოვნურად იყო გაჩენილი და მოკლული იყო ახალგაზრდა. შევიტყვე, რომ ლევანის მეგობარი მოუკლავთ, ჩვენ მანამდე არანაირი ხმაური არ გაგვიგია იმ ბინიდან. ერთ სართულზე ვცხოვრობთ, მაგრამ ლევანის ბინა ცოტათი შეწეულია, წინა მეზობლის ბინა კი დაკეტილია, არავინ ცხოვრობს. მოკლული სხვა დროსაც გვინახავს აქ, ძალიან ზრდილობიანი ბიჭი იყო, ვერც ლევანს და ვერც მას სალამს ვერ დაასწრებდი. მომღიმარი სახით დადიოდნენ. რა მოხდა და რატომ მოკლეს, ნამდვილად არ ვიცი. ძალიან განვიცდი მომხდარს", - ამბობს ლევანის მეზობელი.

კიდევ ერთი მეზობლის თქმით, დაჭრილ ლევანს პირველადი დახმარება მესამე სართულზე მცხოვრებმა მეზობელმა აღმოუჩინა. რამდენიმე წუთი შოკირებული დაჭრილი ახალგაზრდა თურმე სადარბაზოსთანაც იდგა და კლინიკაში გადაყვანამდე პოლიციელებთან გასაუბრებაც მოასწრო. ამის შემდეგ კი "ჯერარსის" კლინიკაში გადაიყვანეს.

"12-ის ნახევარი იქნებოდა კიბეებზე ხმაურით ჩარბენის ხმამ რომ გამაღვიძა. ვიღაც დიდი სისწრაფოთ გარბოდა. ახლა რომ ვფიქრობ, ეტყობა დამნაშავე გარბოდა. ცოტა ხანში მეზობლის ყვირილის ხმა გავიგე, ყვიროდნენ ხანძარია და გარეთ გადითო. მეც გავიყვანე ბავშვები და სადარბაზოში გავედით ყევლანი. არ ვიცოდით ზევით ადამიანი რომ იყო მოკლული, იძახდნენ გაზის სუნია და ხანძარიაო. პოლიცია და სახანძრო მალე მოვიდა, ჩააქრეს ცეცხლი და მერე თქვეს მაშველებმა სახლში ცხედარი დაგვხვდაო. მანამდე ლევანს ცოტა ხნით ეზოში მოვკარი თვალი, პოლიციელებს რაღაცას ესაუბრებოდა, გონება დაკარგული არ ჰქონდა, ისე ძალიან შოკირებული ჩანდა, მერე სასწრაფოც მოვიდა და გადაიყვანეს. მერე მეზობლისგან გავიგე, რომ მას შეუყვანია სახლში და მობანა თურმე სისხლი. ეტყობა, ამ მომენტში ჩაირბინა მკვლელმა მერვე სართულიდან ძირს და გაიქცა. ვფიქრობ მისი ფეხის ხმა გავიგე მე. რატომ მოხდა მკვლელობა, ამაზე ინფორმაცია ნამდვილად არ მაქვს", - ამბობს კიდევ ერთი ადგილობრივი.

ჩვენ ვცადეთ გავსაუბრებოდით შაბურიშვილის ბინის ქვედა სართულზე მცხოვრებ ქალბატონს, მაგრამ მან ჩვენთან საუბარი არ ისურვა. მხოლოდ ის გვითხრა, რომ სამართალდამცავებს უამბო ყველაფერი. სავარაუდოდ, ის გაიგებდა ბინიდან ჩხუბის და ხმაურის ხმას. ბრალდებულებისთვის აღმკვეთი ღონისძიების შეფარდების საკითხზე სასამართლო ხვალ იმსჯელებს. რა ჩვენება მისცა გამოძიებას დაკავებულებმა და რას ამბობს სიკვდილს გადარჩენილი ლევან შაბურიშვილი, ეს მოგვიანებით გახდება ცნობილი.