"ასე მგონია, ფიროსმანის მეეზოვე ვარ" - უშგულელი გენიოსი, მხატვარი ფრიდონ ნიჟარაძე გარდაიცვალა

მხატვარი ფრიდონ ნიჟარაძე, რომელსაც უშგულელ გენიოსსაც ეძახდნენ, გარდაიცვალა. ინფორმაცია Ambebi.ge-ს ოჯახის ახლობელმა დაუდასტურა.

მისი თქმით, ნიჟარაძე ბოლო თვეების განმვლობაში ავადმყოფობდა და დღეს 73 წლის ასაკში გარდაიცვალა.

ცნობილი მხატვრის გარდაცვალების ფაქტზე სოციალურ ქსელში კინორეჟისორი მარიამ ხაჭვანიც წერს:

"ვერ წარმომიდგენია უშგული ფიდოს გარეშე... გენიოსი მხატვარი წავიდა" - წერს ხაჭვანი.

ფრიდონ ნიჟარაძის სახელს კარგად იცნობენ ის ქართველები და უცხოელი ტურისტები, რომლებიც ერთხელ მაინც მოხვედრილან უშგულში. მას სიურრეალისტ მხატვარს, გენიოსს უწოდებენ. მის ნახატებში საოცარი სამყაროა ასახული, რომელიც ერთი ნახვით ატყვევებს მნახველს…

"ჩემი ნამუშევრები ტრანსცენდენტალურ ჟანრს მიაკუთვნეს, სადაური სიტყვაა ისიც არ ვიცი" - ამბობდა მხატვარი "კვირის პალიტრისთვის" წლების წინ მიცემულ ინტერვიუში. ჰყვებოდა, რომ შთაგონების წყარო მისთვის ბუნება და ხალხი იყო.

"მოგეხსენებათ, ხანგრძლივი ზამთარი იცის და ლამფის შუქზე გვიწევდა ყოფნა. მოდიოდნენ ლანდები ნებისმიერ დროს, ჩემთან, სხვადასხვა მიზეზის გამო, ზოგჯერ ხატვაზე უარს ვამბობდი, თუმცა თავს არ მანებებდნენ და მეც ვიწყებდი... ასე იქმნებოდა ეს ნამუშვრები...

გამოფენა არ მქონია, შეგიძლიათ სახლში მობრძანდეთ და აქ დაათვალიეროთ ჩემი ნახატები. მუზეუმში რამდენჯერმე ჩავიტანე, მაგრამ ისევ უკნ წამოვიღე, ჩრჩილი ჭამდა იქ... დაინტერესება არავისგან მოდის, არც ადგილობრივი ხელისუფლებისგან ხელი, რომ შემიწყონ და გავაკეთო გამოფენა. იყო პერიოდი როცა მშრალ ხიდზე ვიდექი და ვყიდიდი ჩემს ნამუშევრებს იმისათვის, რომ ლუკმა-პური მეშოვა... ეს იყო შემოსავლის წყარო...

მიყვარს ლექსების წერა, კითხვა. ვცხოვრობ ისე, როგორც სოფლის მკვიდრს შეეფერება, ასე მგონია, ფიროსმანის მეეზოვე ვარ. მიხარია, ბოლო პერიოდში ტურიზმი ამუშავდა, უშგულში ხალხი მომრავლდა, ეს კარგია სვანეთისთვის…" - ჰყვებოდა ინტერვიუში ფრიდონ ნიჟარაძე.

დაათვალიერეთ ფრიდონ ნიჟარაძის ნახატები