"მიუხედავად იმისა, რომ გადამდები ვარ, ღამე ახალქალაქის შუა ქუჩაში დავდივარ" - როგორ ებრძვის მეუფე ნიკოლოზი კორონავირუსს

ახალქალაქის, კუმურდოსა და კარის მიტროპოლიტს, მეუფე ნიკოლოზს კორონავირუსი დაუდგინდა. მისი თქმით, ვირუსი რთულ ფორმებში არ აქვს, შესაბამისად ცხოვრებას ჩვეულ რიტმში აგრძელებს.

"დღეს შაბათია, 7 ნოემბერი, 2020 წელი, მე ვიმყოფები ახალქალაქში, წმინდა სამების მონასტერში. მინდა გაგიზიაროთ ჩემი გამოცდილება კოვიდ 19-თან დაკავშირებით, რომელიც პირადად მე დამიდასტურდა. მინდა ჩემი გამოცდილება გაგიზიაროთ. თუმცა თუ ეს დაემართა ადამიანს, წინასწარ ვერავინ ვერ იტყვის, როგორ იქნება მისი შედეგი.

ეს არის ძალიან ინდივიდუალური რამ. სერიოზული ფაქტორია შიშის ფაქტორი. ჩემი გამოცდილებით გეტყვით, რომ შიშისა და უიმედობის საფუძველი არ მაქვს. არ შემიცვლია ჩემი პირადი ცხოვრება. მონასტერში ვარ და ჩვეულებრივად ვარ. არ მაქვს დასუსტების ნიშნები, არ ვარ ისე, რომ მოტივაცია არ მქონდეს. ჩემს საქმეს ვაგრძელებ, ეს არის წმინდანების ცხოვრების მოძიების საქმე.

ჩემს შემთხვევაში შრომისუნარიანობაზე ამას არ უმოქმედია. რამდენიმე დღის წინ გავიკეთე ტესტი და დამიდასტურდა ავადმყოფობა. სანამ ეს მოხდებოდა, ზუსტად ვიცოდი რომ ავად ვიყავი. ჩემი პირველი სიმპტომი იყო გაციება. დამეწყო ყელიდან წვა, მახურებდა ტანში, ვიზომავდი სიცხეს და არ მქონდა.

მანამდე ჩვენთან ვირუსი ერთ-ერთ სტიქაროსანს დაუდასტურდა, შემდეგ მოძღვარმა მითხრა, რომ ნიშნები ჰქონდა და მასაც დაუდასტურდა. რისკ-ჯგუფში ვარ და მეორე ხარისხის დიაბეტიკი მაქვს, რაზეც ვმკურნალობ. ამიტომ მაქვს სპეციალური უშაქრო კანფეტი, მენთოლიანი არომატით. პირველად მისი გემო ვერ ვიგრძენი, შემდეგ ყნოსვა დავკარგე და წარმოიდგინეთ, რომ დღემდე საკმეველის სუნს ვგრძნობ, მაგრამ ძალიან დაქვეითებული მაქვს ყნოსვა" - ამბობს მეუფე ნიკოლოზი.

მისი თქმით, ექიმმა სიარული დაუნიშნა და ამიტომ ღამის 9 საათის შემდეგ ახალქალაქის ქუჩებში სეირნობს. აქვე განმარტავს, რომ ამ დროს ქუჩები ცარიელია და შესაბამისად, სხვა ადამიანზე გადადების რისკი არ არსებობს.

"მე დიდი ხანია უკვე ვცდილობ, რომ ფეხით ვიმოძრაო. ეს ექიმმა დამინიშნა, დღეში ორი საათი სწრაფი სიარული ჩემი ჯანმრთელობისთვის კარგია. ახლაც კი, მიუხედავად იმისა, რომ გადამდები ვარ, ღამე 9 საათის მერე ახალქალაქი მკვდარია... შუა ქუჩაში დავდივარ, ყოველ საღამოს...

დილით გაღვიძებისას შეიძლება ერთი საათი არ ავდგე ლოგინიდან, მაგრამ როგორც კი ამას შევებრძოლე, დავძლიე. თითქმის ათი დღეა გასული რაც დავინფიცირდი და ახლა ვგრძნობ, როგორ ვთავისუფლდები. ასევე ცხვირით სუნთქვისას სიღრმეში ვგრძნობ, თითქოს ცხელი ჰაერი გადის.

ნუ გეშინიათ, შეიძლება ყველას დაგვემართოს ეს ვირუსი, მაგრამ მოვარიდოთ ასაკში მყოფი ადამიანები დავირუსებას. აქვე გეტყვით, რომ შეიძლება შიში უფრო დიდ ზიანს აყენებდეს ადამიანს.

ძალიან ბევრი ვიფიქრე ამ დაავადებაზე, როგორი უნდა იყოს კოვიდ 19-ის მიმართ ჩვენი დამოკიდებულება. არ მინდოდა რომ დამმართნოდა, შეიძლება ეს ამპარტავნებაა და დარწმუნებული ვიყავი, რომ არ დამემართებოდა და რომც დამმართნოდა, მარტივად გადავიტანდი. არ მინდოდა დამმართნოდა იმიტომ, რომ ეს შემიზღუდავდა პატრიარქთან სიახლოვეს" - აცხადებს მეუფე.