"გაიგეს, რომ მოვდივარ და სურთ, შემაჩერონ“ -  მუხთარლი აცხადებს, რომ თბილისში გამომგზავრებაში საქართველოს საკონსულო ხელს უშლის

აზერბაიჯანელი ჟურნალისტი, აფგან მუხთარლი, რომელიც დღეს საქართველოში გერმანიიდან უნდა ჩამოსულიყო, „ფეისბუქის“ პირად გვერდზე წერს. რომ ბერლინის Schönefeld-ის აეროპორტიდან გამომგზავრებას ვერ ახერხებს და ამაში საქართველოს ავიახაზები და საქართველოს საკონსულო პრობლემებს უქმნის.

"ამბობენ, რომ ჩემი დოკუმენტები არ არის წესრიგში, რაც არ შეესაბამება სიმართლეს. როგორც ჩანს, გაიგეს, რომ მოვდივარ და სურთ, შემაჩერონ“, - წერს მუხთარლი და აღნიშნავს, რომ მისი დოკუმენტები შეესაბამება საქართველოს საგარეო საქმეთა სამინისტროს ვებ-გვერდზე მოცემულ მოთხოვნებს.

"მე ისინი შევავსე და თანხმობა მივიღე გამგზავრებაზე“, - წერს ჟურნალისტი.

მუხთარლი კიდევ ერთ პოსტს აქვეყნებს და წერს: "ეს არის ადამიანი, რომელიც პრობლემებს მიქმნის."

ცნობისთვის, მუხთარლი, რომელიც საქართველოს და აზერბაიჯანის ხელისუფლებებს 2017 მაისში თბილისიდან მისი გატაცებისა და თავისუფლების უკანონოდ აღკვეთის გამო ედავება, საქართველოს პროკურატურისათვის ჩვენების მიცემას გეგმავს. პროკურატურაში კი აცხადებენ, რომ ჟურნალისტი 2020 წლის 24 ივლისს, გერმანიაში უკვე დაიკითხა.

როგორც პროკურატურაში "ინტერპრესნიუსს“ განუცხადეს, საქართველოს პროკურატურამ აფგან მუხთარლის საქმეზე მიმდინარე გამოძიების ფარგლებში, მუხთარლის გამოკითხვის შუამდგომლობით მისი ადგილსამყოფელის მიხედვით, სამართლებრივი დახმარებისთვის გერმანიის შესაბამის სამსახურებს 2020 წლის 24 მარტს მიმართა.

"გენერალური პროკურატურის მიმართვის საფუძველზე მიმდინარე სისხლის სამართლის საქმეზე აფგან მუხთარლი გერმანიაში შესაბამისი სამსახურების მიერ 2020 წლის 24 ივლისს გამოიკითხა. დაკითხვის ოქმი და შესაბამისი მასალები გერმანიიდან საქართველოს პროკურატურაში 2020 წლის 1-ელ ოქტომბერს გამოიგზავნა და დაერთო სისხლის სამართლის საქმეს. სისხლის სამართლის საქმეზე გამოძიება გრძელდება“, - განაცხადეს პროკურატურაში.