8
მაისიდღის ზოგადი ასტროლოგიური პროგნოზი
როგორც ცნობილია, 18 სექტემბერს, ევროპის ლიგის მეორე ტურის მატჩში თბილისის "ლოკომოტივმა" მოსკოვის "დინამოს" 2:1 მოუგო. ამ მარცხმა რუს ფეხბურთის მოყვარულებში და საერთოდ, რუსულ სპორტულ საზოგადოებაში, შეიძლება ითქვას, ერთგვარი შოკი გამოიწვია. სპორტული მასმედია სავსეა "გულმოკლული" შეფასებებით, კომენტარებით და დასკვნებით.
"მოსკოვის "დინამოს" სენსაციური ფიასკო", "მოსკოვის "დინამოს" სამარცხვინო წაგება", "ქართველებმა "დინამო" ევროლიგიდან გააგდეს", "მოსკოვის "დინამოს მწრთვნელი ნოვიკოვი გასაგდებია"... აი, ასეთი და ამის მსგავსი სათაურები აქვთ ურიცხვ პუბლიკაციები.
"მოსკოვის "დინამო" ევროთასის გათამაშებაში ხუთი წლის შემდეგ დაბრუნდა. ასეთ ჩაფლავებას არავინ ელოდა, მაგრამ, სამწუხაროდ ეს მოხდა", - წერს გამოცემა Sport.ruდა ხაზს უსვამს რუსი და ქართველი ფეხბურთელების შემადგენლობის "საბაზრო ფასს": რა სირცხვილია! Transfermarkt-ის საიტი გვაჩვენებს, რომ მოსკოველების ღირებულება 15-ჯერ უფრო ძვირია თბილისის "ლოკომიტივთან" შედარებით - 59 მილიონი 3 მილიონის წინააღმდეგ და მაინც კრახი".
პუბლიკაციაში ნაჩვენებია "დინამოს" მწრთვნელის კირილე ნოვიკოვის "თავის მართლებაც": "თითქმის მთელი მატჩის განმავლობაში უპირატესობა ჩვენს მხარეზე იყო, მაგრამ მოწინააღმდეგემ მაინც გვაჯობა. მათ მაქსიმალურად ითამაშეს. ჩვენ კი შესაძლებლობები ვერ გამოვიყენეთ. ქართული გუნდის შეუფასებლობაზე არაფერს ვლაპარაკობ, რადგან ჩვენ მას სერიოზულად ვუყურებდით. ცხადია, გამარჯვება გვინდოდა, მაგრამ ბევრი შეცდომა დავუშვით. რა ვილაპარაკეთ გასახდელში? საერთოდ, რასაც გასახდელში ვლაპარაკობთ, ის იქვე უნდა დარჩეს".
რუსული მასმედია ხაზს უსვამს აგრეთვე თბილისის ლოკომიტივის" მთავარი მწრთვნელის გიორგი ჭიაბრიშვილის მატჩის შემდგომ გაკეთებულ განცხადებას: "ეს ჩემი ყველაზე დიდი გამარჯვებაა მწრთვნელის კარიერაში. გულახდილად რომ ვთქვა, მე არ ვფიქრობდი, რომ შემდგომ რაუნდში გავიდოდით, მაგრამ ნელ-ნელა გოლები გაგვაქვს, ბიჭები უფრო კარგად თამაშობენ".
პოპულარული გამოცემა sport24.ru აქვეყნებს ფეხბურთის მოყვარულთა კომენტარებს სოციალური ქსელებიდან: "მოსკოვის "დინამო" რუსეთში ყველაზე ხმაურიანად გავარდა ევროთასების გათამაშებიდან", "უეფამ "დინამოს" პოლიგრაფზე შემოწმება მოითხოვა. მათ არ სჯერათ, რომ ეს ნამდვილად ფეხბურთის კლუბია", "ნოვიკოვს ბედმა გაუღიმა, რომ ეს მარცხი ბერიას არ დაუნახავს".
"მოსკოველი "დინამოელების" ფიასკოს გამო აღშფოთება გამოხატა ცნობილმა მომღერალმა ლევ ლეშჩენკომ. მან ემოციური რეაგირება მოახდინა მარცხზე იმის გამოც, რომ იგი მოსკოვის "დინამოს" საკონსულტაციო საბჭოს წევრიცაა.
"სირცხვილის გარდა ვერაფერს ვგრძობ. ეს სირცხვილიც არ არის - ეს საქვეყნოდ თავის მოჭრაა. თბილისის "ლოკომოტივი" მოყვარულთა დონის გუნდია, მათ არ აქვთ არც ბიუჯეტი, არც არაფერი... აი, მათ ფონზეც კი "დინამო" სამარცხვინოდ გამოიყურებოდა... ჩვენ ევროპაში თამაშისთვის მზად არ ვართ. შეიძლება კარგიც არის, რომ გამოვვარდით. სამომავლოდ ასეთ სირცხვილს აღარ ვჭამთ. ვერ გრძნობენ, რომ დიდი ტრადიციების მქონე გუნდში თამაშობენ. ქართველებმა ორჯერ შეუტიეს და ორივეჯერ გოლი გაიტანეს. თითოეულ მოთამაშესთან უნდა მივიდე და ვკითხო: "შენ სინდისი გაქვს?". რაში გვჭირდება ასეთი ფეხბურთელები? თან რამდენ ფულს ვხარჯავთ მათზე... ქართველების ბიუჯეტი რომ ჩვენსას შევადაროთ... მოკლედ, არ ვიცი, რატომ ვხარჯავთ მილიონებს? ეს ბოლო წვეთია ჩემთვის".
ასეთი მარცხის შემდეგ რუსეთის სპორტულ წრეებში მოსკოვის "დინამოს" მთავარი მწრთვნელის კირილე ნოვიკოვის შეცვლაზე ალაპარაკდნენ. როგორც მოსკოვის "ლოკომოტივის" ყოფილი მწრთვნელი ილია გერკუსი ამბობს, "ნოვიკოვი სასწრაფოდ უნდა წავიდეს მთავარი მწრთვნელის პოსტიდან. განა შეიძლება ევროლიგიდან ნახევრადმოყვარული გუნდის გამო გავარდნა? ასეთი რამ შეუძლებელია. რატომ მოხდა ასე?" - წერს იგი "ტვიტერში".
მართლაც მოსალოდნელია, რომ კირილე ნოვიკოვი დინამოს მთავარი მწრთვნელის პოსტიდან გადადგება. სპორტული გამოცემები უკვე ასახელებენ იმ მწრთვნელს, რომელიც კირილე ნოვიკოვს შეცვლის. "სპორტ-ექსპრესის" ცნობით, "დინამოს" ახალი დამრიგებლის ძირითადი კანდიდატია "რუბინისა" და "როსტოვის" კლუბების ყოფილი მთავარი მწრთვნელი ყურბან ბერდიევი. სხვა კანდიდატებიდან შეიძლება მიიწვიონ "ურალის" ყოფილი მწრთვნელი დიმიტრი პარფენოვი.
ავტორი: სიმონ კილაძე
![საქართველო XV - ორმატჩიანი სერია ინგლისის საგრაფოებთან იწყება [VIDEO]](http://cdn.ambebi.ge/media/__thumbs__/images/2018/reklama/rugby_2019-05-30_q7Xt7fHI9s.jpg)
გამოიღეთ რუსებოოოოოო
გუშინ ქართველმა ფეხბურთელებმა ქართული დროშა აღმართეს კრემლის თავზე. ვულოცავ ამ წარმატებას, სულ ასე დაემარცხებინოს საქართველოს რუსეთი ყველაფერში.