მერაბ ბესელია პოლიციამ მცხეთაში აიყვანა - შსს რაგბის კავშირის ვიცე-პრეზიდენტის დაკავებაზე განცხადებას ავრცელებს

შინაგან საქმეთა სამინისტრო რაგბის კავშირის ვიცე-პრეზიდენტი მერაბ ბესელიაას დაკავებასთან დაკავშირებით ოფიციალურ ინფორმაციას ავრცელებს.

"შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს მთავარი სამმართველოს თანამშრომლებმა, ჩატარებული ოპერატიულ-საგამოძიებო მოქმედებების შედეგად, 1969 წელს დაბადებული მ.ბ. ჯანმრთელობის განზრახ ნაკლებად მძიმე დაზიანებისა და ცეცხლსასროლი იარაღის უკანონო შეძენა-შენახვა-ტარების ბრალდებით, მცხეთაში დააკავეს.

გამოძიებით დადგინდა, რომ ბრალდებულმა, ურთიერთშელაპარაკების ნიადაგზე, ცეცხლსასროლი იარაღიდან გასროლით სხეულზე დაზიანებები მიაყენა 1988 წელს დაბადებულ რ. ხ.-ს. დაჭრილი მამაკაცი საავადმყოფოში გადაიყვანეს, სადაც შესაბამისი მკურნალობა უტარდება. მის სიცოცხლეს საფრთხე არ ემუქრება.

გამოძიება საქართველოს სისხლის სამართლის კოდექსის 118-ე და 236-ე მუხლებით მიმდინარეობს" - ნათქვამია ინფორმაციაში.

შეგახსენებთ, რომ რაგბის კავშირში სროლა დღეს იყო. დაჭრილია "შვიდკაცას" კაპიტანი რამაზ ხარაზიშვილი, რომელსაც ოპერაცია უკვე ჩაუტარდა. მას დაზიანება ფეხის არეში ჰქონდა მიყენებული.

"ძალიან ცუდ ფაქტზე ვარ შეკრებილი, მაგრამ მიუხედავად ამისა, მინდა შეხვედრა მაინც კარგი ინფორმაციით დავიწყო. ოპერაცია ჩაუტარდა რამაზს და ყველაფერმა კარგად ჩაიარა. ვიმედოვნებთ, ყველაფერი კარგად იქნება“, - განაცხადა ოპერაციის დასრულების შემდეგ რაგბის კავშირში შემავალი კლუბების საინიციატივო ჯგუფის წევრმა სანდრო საკანდელიძემ.