"კონცერტები უქმდება? ჩვენ რა ვქნათ? არასოდეს არავინ ჩვენზე რატომ არ ფიქრობს?" - რას წერს თიკა ჯამბურია ახალი რეგულაციების დაწესების შემდეგ

მომღერალი თიკა ჯამბურია მთავრობის მიერ დაწესებულ ახალ რეგულაციებს სოციალურ ქსელში ეხმაურება:

"ჯერ ხომ კონცერტები არ იყო და საერთოდ მომღერლები უსაქმურად იჯდნენ სახლში, ეხლა ძლივს კონცერტების სეზონი გაიხსნა, 3 კონცერტი ბათუმში გაგვიუქმდა და აქ დაგეგმილი კონცერტებიც უქმდება? და ჩვენ რა ვქნათ, მაინტერესებს? აი, მართლა, ხელოვნების დარგში ვინც მოღვაწეობს, იმათმა რა ქნან? არასოდეს არავინ ჩვენზე რატომ არ ფიქრობს?", - წერს ჯამბურია.

მომღერალს კომენტარებში სოლიდარობას უცხადებენ მისი მეგობრებიც.

საქართველოს მთავრობის ადმინისტრაციის უფროსის ნათია მეზვრიშვილის განცხადებით, ხვალიდან, 200 ადამიანზე მეტის მონაწილეობით, კულტურული და სპორტული ღონისძიებები აიკრძალება.

მეზვრიშვილის თქმით, ამ რეგულაციების შეუსრულებლობაზე შესაბამისი სანქციებია გათვალისწინებული და საჭიროა საზოგადოებამ მაღალი სამოქალაქო პასუხისმგებლობა გამოიჩინოს.

„რაც შეეხება კულტურულ და სპორტულ ღონისძიებებს, ეპიდემიოლოგიური ვითარებიდან გამომდინარე, მიღებულია გადაწყვეტილება, რომ შეიზღუდება 200-ზე მეტი ადამიანის მონაწილეობით კულტურული და სპორტული ღონისძიებები. ასეთი ღონისძიებების ჩატარება იგულისხმება ღია ცის ქვეშ იმიტომ, რომ დახურულ სივრცეში, როგორც მოგეხსენებათ აქამდე ეს შეზღუდვები არსებობდა. ხვალიდან, 200 ადამიანზე მეტის მონაწილეობით კულტურული და სპორტული ღონისძიებები აიკრძალება. ამ რეგულაციების შეუსრულებლობაზე გათვალისწინებულია შესაბამისი სანქციები. ჩვენ მოქალაქეებს მოვუწოდებთ, რომ მაქსიმალურად დაიცვან წესები და გამოიჩინონ მაღალი სამოქალაქო პასუხისმგებლობა“, - განაცხადა ნათია მეზვრიშვილმა.