"ნაციონალებმა" იმდენი დალიეს, ცეკვის დროს გოგოს ფეხი მოტეხეს" - როგორ მოილხინა "ნაცმოძრაობის"  მაჟორიტარობის კანდიდატმა 15 წლის მოზარდების  ნიშნობაში

ambebi.ge-სთვის ცნობილი გახდა ა. წ. 19 აგვისტოს, თელავის მუნიციპალიტეტის სოფელ ყარაჯალაში არასრულწლოვნების თ. ვ. - სა (დაბადებული 15.12.2004 წ.) და მ. ს. - ს (დაბ. 26.10. 2004წ.) ნიშნობის შესახებ. სოფელ ყარაჯალაში გამართული ნიშნობის მრავალრიცხოვან სუფრაზე ერთ-ერთი არასრულწლოვანის ნათლიისა და „ნაციონალური მოძრაობის“ ადგილობრივი წარმომადგენლის, ნუგზარ ბეჯანოვის მიერ მიწვეული იქნა „ნაცმოძრაობის“ თელავი-ახმეტა-ყვარელი-ლაგოდეხის მაჟორიტარობის კანდიდატი - გიორგი ბოტკოველი, რამდენიმე სხვა თანაპარტიელთან ერთად.

ამ ნიშნობის დეტალების გასარკვევად ამბები.გე ყარაჯალის რწმუნებულს, ალასკარ სართანოვს ესაუბრა.

“აღნიშნული ნიშნობა ყარაჯალაში მართლაც გაიმართა. იქ არ ვყოფილვარ, გადმოცემით ვიცი, რომ დაახლოებით 150-200-კაციანი სუფრა ყოფილა ეზოში გაშლილი. ნათესავებთან და ახლობლებთან ერთად წვეულებაზე “ნაციონალებიც” ყოფილან, ვინაიდან ენმ-ს წევრს ნუგზარ ბეჯანოვს და ვალიევების ოჯახს ნათელმირონობა აკავშირებთ. ქალ-ვაჟი 15 წლისაა. როგორც ვიცი, გოგონა ჯერ არ გაჰყოლია, არ ვიცი, ქორწილი როდის ექნებათ.

ყველამ კარგად იცის, რომ არასრულწლოვნების ქორწინება დასჯადია, მაგრამ ვის ეყურება? როგორც ამბობენ, „ნაციონალებმა“ იმდენი დალიეს, ცეკვის დროს მეზობლის გოგონას დაეჯახნენ და ფეხი მოსტეხეს. ზუსტად არ ვიცი, ვინ წააქცია გოგონა. მისთვის კაციშვილს ყურადღება არ მიუქცევია, რომელ ექიმთან წაყვანაზეა ლაპარაკი... ოღონდ სუფრა გაიშალოს და “ნაციონალები” ყველგან მირბიან. გიორგი ბოტკოველი ნიშნობაში 3-4 კაცით იყო ჩამოსული. ბოტკოველი სიტყვით გამოსულა, მიყვარს ყარაჯალაო და ეგეთები უთქვამს. დანაშაულის ხელშეწყობა არაა, როცა იცი, არასრულწლოვნები არიან, გამოდიხარ და ლოცავ? ყველა საქმის კურსშია ამ ნიშნობაზე, მათ შორის პოლიციაც. ეს ბოტკოველი ოთხი რაიონის მაჟორიტარობის კანდიდატია”.

ambebi.ge თელავი-ახმეტა-ყვარელი-ლაგოდეხის მაჟორიტარობის კანდიდატს გიორგი ბოტკოველსაც დაუკავშირდა, რომელიც "დროის უქონლობის გამო" მოკლე კომენტარით შემოიფარგლა:

"ნიშნობაში მართლაც ვიმყოფებოდი და საერთოდ, სახელისუფლებო კანდიდატისგან განსხვავებით, ძალიან ბევრგან მეპატიჟებიან. ეს ქორწილი არ ყოფილა, ნიშნობა იყო და ძალიან კარგად ვიცი, სად, როგორ და რატომ უნდა მივიდე. სადაც ვიყავი, იქ ორივე მხრიდან ესწრებოდნენ ოჯახის წევრები, ოჯახის წევრებმა მიმიწვიეს და ნიშნობა იყო, თუ რა იყო, ოჯახის წვეულებაზე ვიყავი. არც ის ვიცოდი, არასრულწლოვნები თუ იყვნენ, ეს ეხლა შემკობილი თემაა".

კითხვა - ცეკვის დროს მართლა დაშავდა თუ არა მათი მხრიდან ერთ-ერთი სტუმარი გოგონა, კანდიდატმა არ დაგვასრულებინა და ტელეფონი გათიშა.

• ბავშვის უფლებათა კონვენციის თანახმად, 18 წლამდე ასაკის ყოველი ადამიანი არასრულწლოვნად ითვლება. ადრეული, ანუ ნაადრევი ქორწინება არის ოფიციალური, ან არაოფიციალური კავშირი ორი ადამიანისა, რომელთაგან ერთ-ერთს მაინც ჯერ არ მიუღწევია 18 წლის ასაკისთვის. ადრეული ქორწინება მიჩნეულ უნდა იქნას, ზოგადად – ადამიანის უფლებების და კერძოდ - ბავშთა უფლებების დარღვევად, რადგან ითვლება, რომ ბავშვს არ შეუძლია მისცეს გააზრებული თანხმობა. ნაადრევი ქორწინება საქართველოში იშვიათი არ არის და სხვა ფაქტორებთან ერთად, გენდერულ უთანასწორობას უკავშირდება. ამასთან, მისი გამომწვევი მიზეზები არაერთგვაროვანია და განსხვავდება რელიგიური, ეთნიკური თუ რეგიონალური ფაქტორების მიხედვით. როდესაც საქმე ეხება ადრეულ ქორწინებას, საზოგადოებამ უნდა იცოდეს, რომ სქესობრივი კავშირი 16 წელს მიუღწეველ პირთან სისხლის სამართლის დანაშაულია და დამნაშავე ისჯება სისხლის სამართლის კოდექსის 140-ე მუხლით, რომელიც 7-დან 9 წლამდე პატიმრობას გულისხმობს. ასევე ისჯება იძულებითი ქორწინება. მას სისხლის სამართლის კოდექსის 150-ე პრიმა მუხლი განსაზღვრავს.
• სოციალური მომსახურების სააგენტოს ინფორმაციით, 2018-2019 წელს ადრეული ქორწინების თაობაზე სააგენტოს ჯამში 195-მა მოქალაქემ მიმართა. აქედან 3 არასრულწლოვანი 2005 წელს იყო დაბადებული.
• ადრეული ქორწინების თაობაზე 2018 წელს ცენტრში შესულია 115 შეტყობინება. აქედან 1999 წელს დაბადებულ არასრულწლოვანზე - 1 შეტყობინება. 2000 წელს დაბადებულზე - 20 შეტყობინება, 2001წელს- 40 არასრულწლოვანზე; 2002 წელს – 40 არასრულწლოვანზე; 2003 წელს - 9 არასრულწლოვანზე; 2004 წელს - 4 არასრულწლოვანზე; 2005 წელს - 1 არასრულწლოვანზე; ადრეული ქორწინების თაობაზე 2019 წელს სააგენტოში შესულია 80 შეტყობინება. აქედან 2001 წელს დაბადებულ არასრულწლოვანზე - 21 შეტყობინება; 2002 წელს დაბადებულზე - 33; 2003 წელს დაბადებულზე 17; 2004 წელს დაბადებულებზე - 7; 2005 წელს დაბადებულებზე - 2;