"მისგან ისეთივე პიროვნება გამოძერწეს, როგორც მიხეილ სააკაშვილი საქართველოსთვის" - რას ამბობს ჟირინოვსკი ნავალნისა და სააკაშვილზე?

რუსეთის რადიოსადგურ"„კომსომოლსკაია პრავდას" («Комсомольская правда») სტუდიაში ისაუბრა ლიბერალურ-დემოკრატიული პარტიის ლიდერმა, სახელმწიფო სათათბიროს წევრმა ვლადიმერ ჟირინოვსკიმ, რომელმაც გადაცემის წამყვანთან სერგეი მარდანთან თავისი თვალსაზრისი გამოხატა ბელარუსში არსებული სიტუაციის, რუსეთ-ბელარუსის ურთიერთობების, რუსი ოპოზიციონერის ალექსი ნავალნის ჯანმრთელობისა და სხვა აქტუალური საკითხების შესახებ. იგი შეეხო დასავლეთის როლს პოსტსაბჭოთა სივრცეში "ფერადი რევოლუციების" მომზადებაში, მათ შორის საქართველოშიც...

გთავაზობთ ამონარიდს ვლადიმერ ჟირინოვსკის საუბრიდან:

- უკვე ერთი კვირაა ალექსეი ნავალნი კომაში იმყოფება, რაც მსოფლიო მასმედიის, უცხოეთის წამყვანი გაზეთების მთავარ თემას წარმოადგენს. თქვენ როგორ ფიქრობთ, რა პრობლემები შეიძლება გაუჩნდეს რუსეთს მისი უცნაური მოწამვლით? თუ ამ ყველაფერს დასავლეთი ერთი თვის შემდეგ დაივიწყებს?

- მათ დაინახეს, რომ ხაბაროვსკში მეტად ვეღარ გაქაჩავენ საპროტესტო გამოსვლებს... ჩვენ, მართალია, მხარს ვუჭერთ სერგეი ფურგალს (ექს-გუბერნატორს, ლდპ-ის წევრს, რომელიც დანაშაულის ჩადენაშია ბრალდებული - ს.კ.), მაგრამ ქუჩის პროტესტებში არ ვმონაწილეობთ... უფაში მოსახლეობა სოდის კომპანიის წინააღმდეგ გამოვიდა, რომელიც ეკოლოგიას არღვევს, მაგრამ სიტუაცია განეიტრალდა. არხანგელსკში გამოსვლები იყო ნაგვის დაწვის პოლიგონის გამო, იქაც შეწყდა...

ესე იგი, საჭიროა ახალი დეტონატორი, რომელიც საზოგადოებას დაძაბულობაში ამყოფებს. მთავარია, მოიძებნოს ცნობილი ადამიანი, საზღვარგარეთ გაიყვანონ და მერე მასთან იმუშაონ. მაგალითად, სვეტლანა ტიხანოვსკაია უცხოეთშია... საერთოდ, დასავლეთის სპეცსამსახურებს შეუძლიათ, რომ ალექსი ნავალნი მძიმე ავადმყოფად წარმოსახონ. კომაში ჯანმრთელი ადამიანის შეყვანაც ხდება ხოლმე - მიეცი ძილისმომგვრელი საშუალების ძლიერი დოზა და მორჩა. ნარკოზივით არის. დროშია გათვლილი, თანდათანობით გრძელდება.

რატომ წაიყვანეს ასე საჩქაროდ გერმანიაში? იმიტომ, რომ შეეშინდათ - ალიოშა გონს მოეგება და ჯანმრთელი აღმოჩნდებაო, იმათ კი იგი ავადმყოფის მდგომარეობაში სჭირდებათ. მას ხომ დიდი ხნის განმავლობაში ამზადებდნენ მსგავსი როლის შესასრულებლად, ჯერ კიდევ იელის უნივერსიტეტში ყოფნისას. როცა იგი იქ სტაჟირებას გადიოდა, იქვე "დაავერბოვკეს", გადაიბირეს. ანუ მისგან ისეთივე პიროვნება გამოძერწეს, როგორც მიხეილ სააკაშვილი გახდა საქართველოსთვის, როგორც სვეტლანა ტიხანოვსკაია, უფრო სწორად კი მისი ქმარი გახდა ბელარუსისათვის. მოკლედ, მომავალი პრეზიდენტები პოსტსაბჭოთა რესპუბლიკებისათვის და აღმოსავლეთ ევროპის ქვეყნებისთვისაც.

ასე მზადდება ყველაფერი. ამ ოპერაციაში დასავლეთს დიდი ფული აქვს ჩადებული. ავიღოთ მიხეილ სააკაშვილი. ისინი ძალიან შეშინდნენ, 2008 წლის ომის შემდეგ. მანამდე კი ასე ამბობდნენ: "ჩვენი ოქროს ბიჭი... რამდენი რამ ჩავდეთ მასში... ხედავთ, რა კარგად მუშაობს, კარგად იქცევა, რამდენ კარგ საქმეს აკეთებს“ და უცებ... დასავლეთმა დაინახა, რომ ჩვენ მისი დაპატიმრებაც კი შეგვეძლო, მისი გასამართლება, მთელი საქართველოს ოკუპირება. ჩვენ ამის სრული საფუძველი გვქონდა.

ალიოშა კი 10 წლის წინ „დაავერბოვკეს“. ამისთვის არსებობენ სპეციალური ინსტიტუტები - მაგალითად, ფრიდრიხ ნაუმანის ფონდი და სხვები. ისინი თავიანთ ხარჯებით ასწავლიან, ატარებენ რაღაც სემინარებს. დასავლეთი ხედავს, რომ ალიოშას რუსეთში არაფრის გაკეთება არ შეუძლია - ვერც პარტიას ქმნის, არჩევნებშიც მარცხდება... ესე იგი, რაღაც უნდა გაკეთდეს საზღვარგარეთ. საჭიროა დროშის აფრიალება, როგორც თავის დროზე ჰომეინმა გააკეთა. იგი ხომ ირანიდან პარიზში წავიდა, იქიდან ხელმძღვანელობდა ანტისამთავრობო გამოსვლებს, შემდეგ კი დაბრუნდა... ალბათ, ალიოშას გუაიოდოსავით ამზადებენ, ან რომელიმე რუსი ემიგრანტივით, როგორც გერცენი იყო თავის დროზე...

ჰოდა, ალიოშა დროშასავით იქნება. სწორედ გერმანიაში. იმიტომ, რომ გერმანია ჩვენთან ახლოსაა, თითქმის გვესაზღვრება. თუ მეტი დოზის მიცემა მოუვიდათ და კომიდან ვერ გამოიყვანეს, ეყოლებათ იქ პარალიზებული ვლადიმერ ლენინივით, სავარძელში, მაგრამ მისი სახელთ დაწერენ სტატიებს, რაღაც სიტყვებს, მიმართვებს... ალექსანდრე სოლჟენიცინი ათი წელი იჯდა საზღვარგარეთ და ჩვენს ქვეყანას უდიდესი ზიანი მიაყენა. კი, იგი დიდი მწერალია, მაგრამ როცა ახალგაზრდობა მისი ნაწარმოებიდან სპეციალურად შერჩეულ ფრაგმენტებს კითხულობდა, საბჭოთა კავშირზე ცუდი წარმოდგენები ექმნებოდათ“. წყარო

ავტორი: სიმონ კილაძე