"გიორგი აშველებდა მოჩხუბრებს... გაოგნებული იყო, რომ ასეთი რაღაც 21-ე საუკუნეში ხდება" - რას იხსენებს იაკობ ბრეგვაძე საბედისწერო წვეულებიდან

გიორგი შაქარაშვილის საქმის ერთ-ერთი მთავარი მოწმე იაკობ ბრეგვაძე საბედისწერო წვეულებას და 19 წლის ფეხბურთელის გაცნობის მომენტს იხსენებს.

როგორც მან "ტვ პირველის" გადაცემა "რეაქციაში" განაცხადა, შაქარაშვილი მხოლოდ ჩხუბის გაშველებაში მონაწილეობდა.

"გიორგი დაბადების დღეზე ვნახე. ძალიან კომუნიკაბელური, ხალისიანი და კარგი ადამიანი იყო. ჩხუბი რომ მოხდა მაგის მერე გავიდა, აშველებდა. რომ შემოვიდა, რა ხდებათქო და ჩხუბი არისო და ასეთი რაღაც პირველად ვნახეო. ძალიან გაკვირვებული, გაოგნებული იყო, რომ ასეთი რაღაც ხდება 21-ე საუკუნეში.

მერე იქიდან წამოვედით, გზაში პირადი საუბარი არ გვქონდა, თუმცა რაღაცეებს ვიღებდით, ვხუმობდით. იცით ის ცნობილი კადრები, ხიდზე რომ არის გადაღებული. დრო გვინდოდა გაგვეყვანა რომ მალე ჩავსულიყავით თბილისში. აგარაკზე არავის მხრიდან აგრესია გიორგის მიმართ არ შემიმჩნევია, აქ რატომ გაიმეტეს ასე, არ ვიცი..." - აღნიშნა ბრეგვაძემ.

რაც შეეხება კითხვას, სად წავიდა აგარაკზე გადაღებული ფოტოები, იაკობ ბრეგვაძემ აღნიშნა, რომ წვეულებაზე მას არცერთი ფოტო არ გადაუღია.

"მე დაბადების დღეზე ფოტოები არ გადამიღია არც ერთი, კამერაც კი არ ამომიღია. დაბადების დღეზე როგორც ფოტოგრაფი არ ვყოფილვარ, ვიყავი როგორც სტუმარი. იქ იყო ბევრი ხალხი და კამერას რომ რამე დაშავებოდა არ მინდოდა და იქ რა უნდა გადამეღო ისეთ, რომ კაი ფოტო გამოსულიყო" - განაცხადა იაკობ ბრეგვაძე.

იაკობ ბრეგვაძე გიორგი შაქარაშვილის საქმის ერთ-ერთი მთავარი მოწმეა. იმ დროს როდესაც მაგისტრალზე მიმავალ ახალგაზრდებს თავს დაესხნენ, გიორგი შაქარაშვილმა და რამდენიმე ახალგაზრდამ, მათ შორის იაკობმა გადაწყვიტეს მათგან თავი გაქცევით დაეღწიათ. დღეს შსს-მ გამოაქვეყნა სატელეფონო ჩანაწერი, რომელშიც ისმის, როგორ რეკავს ბრეგვაძე 112-ში და დახმარებას ითხოვს.

ცნობისთვის, ფეხბურთელ გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს 19 ივნისს მიმართა. 4-დღიანი საძიებო სამუშაოების შედეგად, მყვინთავებმა ფეხბურთელ გიორგი შაქარაშვილის ცხედარი წყალში იპოვეს. აღნიშნულ საქმეზე დაკავებულია 17 პირი, მათგან 6 არასრულწლოვანია.

პროკურატურამ შაქარაშვილის საქმეზე „ტოიოტა ქამრის“ მგზავრების - 5 პირის მიმართ სისხლის სამართლებრივი დევნა 109-ე მუხლის მეორე ნაწილის „ე“ ქვეპუნქტით ჩადენილი დანაშაულისთვის დაიწყო, რაც განზრახ ჯგუფურად ჩადენილ მკვლელობას გულისხმობს. აღნიშნულ საქმეზე ბრალი ვახტანგ ჩიქოვანს, არჩილ გაგნიძეს, ნიკოლოზ რევაზიშვილს, არასრულწლოვნებს ა.ქ.-ს და ზ.ხ.-ს დაუმძიმდათ.