"სპორტი უნდა გავმიჯნოთ პოლიტიკისგან, სამწუხაროდ, ეს ხშირად  პირიქით ხდება", -  რა კომენტარს აკეთებს თორნიკე შენგელია მოსკოვში ჩასვლის შემდეგ

მოსკოვის CSKA-ს კალათბურთელი, საქართველოს საკალათბურთო ნაკრების კაპიტანი, თორნიკე შენგელია ამბობს, რომ სპორტი და პოლიტიკა ერთმანეთისგან უნდა გაიმიჯნოს, თუმცა "სამწუხაროდ, ხშირად ყველაფერი სხვაგვარად ხდება“. ამის შესახებ შენგელიამ რუსულ-ქართული ურთიერთობების განვითარების ფონდის" პრესცენტრთან ისაუბრა. ინტერვიუს კი sports.ru ავრცელებს.

კითხვაზე, ნაცნობია თუ არა მისთვის რუსული კულტურა, ასე პასუხობს - "სამწუხაროდ არა, მაგრამ ვფიქრობ, ახლა ბევრ საინტერესო რამეს ვისწავლი.“

კალათბურთელი ასევე იმედოვნებს, რომ მას ახალი მიღწევები ექნება.

"მე ერთ-ერთ ყველაზე ძლიერ გუნდში, CSKA-ში სათამაშოდ ჩამოვედი. ვიმედოვნებ, ახალ შედეგებს მივაღწევ. ადამიანური თვალსაზრისით მსურს ვაჩვენო, რომ პოლიტიკის მიუხედავად, ჩვეულებრივი ადამიანები ერთმანეთთან ნორმალური ურთიერთობისთვის მზად არიან.

სპორტი უნდა გავმიჯნოთ პოლიტიკისგან, მაგრამ სამწუხაროდ ეს ხშირად პირიქით ხდება", - ამბობს კალათბურთელი.

შეგახსენებთ, რომ თორნიკე შენგელია მოსკოვის CSKA-ში გადასვლამდე ესპანურ"ბასკონიაში " თამაშობდა და წელს ის ესპანეთის ჩემპიონიც გახდა, რის შემდეგაც მოსკოვურ კლუბს შეუერთდა. აღნიშნულის გამო ის ქართველმა გულშემატკივრებმა მკაცრად გააკრიტიკეს. საზოგადოების ნაწილი მიიჩნევს, რომ ქვეყნის ნაკრების კაპიტანი მოსკოვის CSKA-ში არ უნდა თამაშობდეს, თუმცა არიან ისეთებიც, რომლებიც ამბობენ, რომ სპორტი და პოლიტიკა ერთმანეთისგან უნდა გაიმიჯნოს და არაფერია გასაკვირი შენგელიას ამგვარ ქმედებაში.