გიორგი ოვაშვილის "სიმშვიდის ქოხი" გაფერადდა - როგორ გამოიყურება სახლი, რომელიც რეჟისორმა შვილებთან ერთად ააშენა

"ვიწვევ მოხალისეებს "სიმშვიდის ქოხის" შესაღებად. შერჩევის წესით მოვიწვევ 2-3 მოტივირებულ მოხალისეს" - წერდა 25 ივლისს საკუთარი „ფეისბუქის“ გვერდზე რეჟისორი გიორგი ოვაშვილი, რომელმაც პანდემიის პერიოდში, შვილებთან ერთად, თავისი ხელით, სოფელ ძეგვში ქოხი ააშენა. ნამუშვარმა უამრავი ადამიანის მოწონება დაიმსახურა, რაზეც AMBEBI.GE ცოტა ხნის წინ ექსკლუზიურად წერდა.

რეჟისორის განცხადებას მსურველები და მოხალისეები მალევე გამოეხმაურნენ და "სიმშვიდის ქოხი", როგორც გიორგი ოვაშვილი უწოდებს, გაფერადდა, რითაც კიდევ მეტი სილამაზე და სიხალისე შეიძინა.

"ფეისბუქის" პირად გვერდზე გამოვაცხადე, თუ ვინმეს ჰქონდა სურვილი, მონაწილეობა მიეღო სახლის გაფერადებაში, გამომხმაურებოდნენ. გამოჩდნენ მოხალისეები, საიდანაც გავაკეთეთ სელექცია, - სამი ადამიანი შეირჩა. სამუშაოს შესრულება ძალიან კარგ გოგონებს ერგოთ და ქოხი გააფერადეს" - გვეუბნება ბატონი გიორგი.

- ფერები თვითონ შეარჩიეს?

- კი, ზოგმა საღებავები თვითონ მოიტანა, მეც მქონდა რაღაცები და საბოლოოდ, მგონი, კარგი გამოგვივიდა. „ყველაფერი, რაც ამ ქოხს უკავშირდება, იმპროვიზებულად ხდება. წინასწარ არ ვიცით, შემდეგი რა ნაბიჯი იქნება. უბრალოდ, მივყვები ამბების შემდგომ განვითრებას, დინებას... ქოხის წინ მოედანი წითლად შევღებე და უკვე ინტერიერის გალამაზებაზეც გადავედით - ლამინატი დავაგეთ...

ვფიქრობთ, რომ კონკურსი კიდევ გამოვაცხადოთ, რასთან ერთადაც გადავწყვეტთ, ინტერიერი როგორი იქნება, რომ ქოხის ამ მიმართულებით გალამაზებაზე იმუშაონ. მერე ალბათ უკვე აქ გარკვეულ პროექტებს განვახორციელებთ. იქნება ღია ჩვენებები, ან ფოტოგრაფებს მოვიწვევთ, რომ თავიანთი სამუშაო გააკეთონ.

- მოკლედ, სახელოვნებო სივრცე შექმენით... თქვენს შვილებს რა იდეები აქვთ ამ ქოხთან დაკავშირებით?

- მოსწონთ - თებრონია შიგნით თამაშობს და სტუმრები რომ მოდიან, სულ იქ მიჰყავს. მას უნდა, რომ იქ საზაფხულო საბავშვო კაფე გახსნას ისე, რომ თვითონ ამუშავოს. უფროსებიც, როგორც კი ნახავენ დროს, რაღაცაში გვეხმარებიან, მაგრამ ახლა ბიჭს აღარ სცალია, გოგონამ კი იმ დღეს შიგნით ინტერიერის ღებვაზე იმუშავა. ძირითადად კი, მე და თებრონია ვართ აქ.

- "სიმშვიდის ქოხი" - საბოლოოდ ასე დაერქვა?

- პირობითად და კიდევ ვფიქრობთ. ვნახოთ, პირველი პროექტი იქნება მნიშვნელოვანი, ბევრ კითხვას გასცემს პასუხს და მიმართულებასაც მოგვცემს, შემდგომში როგორ უნდა ვიმოქმედოთ.