ჯეიმს ბონდის ფორმაში გამოწყობილი პუტინი, ვაქცინით ხელში... - როგორ ეხმაურება რუსული მედია liberation-ის "შარჟს"

მას შემდეგ, რაც რუსეთმა Covid-19-ის ვაქცინის შექმნა და მისი ეფექტურობა დაადასტურა, ოფიციალურმა პირებმა განაცხადეს, რომ ვაქცინის წარმოებასაც დაიწყებენ. აცრა ვლადიმირ პუტინის შვილმა უკვე გაიკეთა, რასაც მსოფლიო წამყვანი მედიის მხრიდან დიდი ყურადღება დაეთმო.

ფრანგული გაზეთი liberation პირველ გვერდზე ჯეიმს ბონდის ფორმაში გამოწყობილ ვლადიმირ პუტინის ფოტოს აქვეყნებს. მას ხელში Covid-19-ის ვაქცინა უჭირავს.

"პუტინი, ვლადიმირ პუტინი. ხვალინდელი დღე არასოდეს მოკვდება" - წერს გაზეთი მთავარ გვერდზე გამოქვეყნებული ფოტოს კომენტირებისას. აღნიშნული გამოცემის მიერ გაშარჟებულმა პუტინმა მსოფლიოს ყურადღება უკვე მიიპყრო. მათ შორის არის რუსული მედიაც.

russia today სტატიის იდეას მიმოიხილავს:

"განსხვავებით გამოგონილი ბრიტანელი ჯაშუშისა, რომელსაც პისტოლეტი ყოველთვის აქვს მომარჯვებული, პუტინს ხელში Covid-19-ის ვაქცინა უჭირავს. ვირუსმა, რომელსაც "სიკვდილის ლიცენზია" აქვს მოპოვებული, მსოფლიოში 740,000 ადამიანი სიცოცხლეს უკვე გამოასალმა.

ეკონომიკურ ზარალზე საუბარი აღარ არის. სტატიის სათაური აშკარად ემთხვევა 1997 წლის ბონდის ფილმის სათაურს - "ხვალინდელი დღე არასოდეს მოკვდება", რომელშიც მონაწილეობა მიიღო პირს ბროსნანმა" - წერს russia today.

გამოცემა ასევე აღნიშნავს, რომ კარიკატურაში მოცემული აშკარად გამოკვეთილი პოზიტიური ნიშნებისა, პირს ბროსნანის მსგავსად, გაზეთის რედაქცია პუტინში აშკარად ვერ ხედავს კაცობრიობის მხსნელს.

სტატია აკრიტიკებს მოსკოვს, რომ Covid-19-ის ვაქცინის წარმოებაში ჩაშვება და ოფიციალური განაცხადი იმის შესახებ, რომ რუსეთმა ვაქცინა დაამტკიცა, არაპროფესიონალიზმია.

რამდენიმე დღის წინ რუსეთის პრეზიდენტმა ვლადიმირ პუტინმა ოფიციალურად განაცხადა, რომ რუსეთის სახელმწიფო კვლევითი დაწესებულება- გამალეიას ინსტიტუტის მკვლევარ-მეცნიერები ახალი, რუსული COVID19-ის ვაქცინის ტესტირების შედეგებით კმაყოფილია.

რუსეთი ვაქცინის ფართომასშტაბიან წარმოებას იწყებს. ჯანდაცვის სამინისტრო ათასობით ინფიცირებულს აცრის. მსოფლიოში COVID19-ის საწინააღმდეგო 10-ზე მეტი ვაქცინის ტესტირება ჩატარდა. საბოლოო შედეგით, ყველაზე ეფექტური ოთხი მათგანი აღმოჩნდა, რომელთა გამოცდა ჯერ არ დასრულებულა.

ჯანდაცვის მსოფლიო ორგანიზაციამ პანდემია 2020 წლის 11 მარტს გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

ავტორი: თეონა რამაზაშვილი