"ბაჩალიაშვილი ნიკასთან უფრო გახსნილი იყო" - რას ჰყვება კომპანია ZAG-ის იურისტი, სადაც გარდაცვლილი პროგრამისტი მუშაობდა?

კომპანია ZAG-ის გენერალური დირექტორი თამარ კობერიძე რამდენიმე საათის განმავლობაში იკითხებოდა ქვემო ქართლის სამხარეო პოლიციაში. ეს ის კომპანიაა, სადაც გარდაცვლილი 23 წლის პროგრამისტი თამარ ბაჩალიაშვილი მუშაობდა. ადვოკატის თქმით, თამარ კობერიძემ გამოძიებას კომპანიის საქმიანობასთან დაკავშირებული ინფორმაცია მიაწოდა. ZEG-ის იურისტი თამარ ბაჩალიაშვილის კომპიუტერის დროულად გახსნას ითხოვს და დარწმუნებულია, რომ მასში კომპანიის მაკომპრომეტირებელი არანაირი ინფორმაცია არ ინახება. ერთ-ერთი ვერსიით, გოგონას სიკვდილი აღნიშნულ კომპანიას უკავშირდება, რომელიც პროგრამისტმა გაუჩინარებამდე 2 დღით ადრე დატოვა.

ambebi.ge კომპანიის ადვოკატს ქეთი მირიანაშვილს ესაუბრა.

- რა კითხვები ჰქონდა გამოძიებას კომპანიის გენერალურ დირექტორთან?

- გამოკითხვა დიდხანს მიმდინარეობდა, მაგრამ კითხვები ძირითადად ტექნიკურ და სამსახურთან დაკავშირებულ საკითხებს ეხებოდა - როგორ ხდება თანამშრომლების მიღება, თამარმა კონკრეტულად სად გამოაგზავნა სივი, როცა 3 წლის წინ სამსახურში აიყვანეს, რომელი ჯგუფის ხელმძღვანელს რა ფუნქცია აქვს, რას საქმიანობს კომპანია და ა.შ.

- რატომ შევიდნენ სამართალდამცველები იმავე დღეს კომპანიის ოფისში, როცა გოგონა გარდაცვლილი იპოვეს?

- ვფიქრობ, ოჯახის განცხადებიდან გამომდინარე შევიდნენ - მათ თქვეს, რომ არ იცოდნენ სად, რომელ კომპანიაში მუშაობდა და რას საქმიანობდა თამუნა. ალბათ ამიტომაც გამოითქვა ეჭვები სამსახურთან დაკავშირებით.

- დიახ, ოჯახს მხოლოდ ეს ვერსია აქვს, უსაფუძვლოა მათი ეჭვი?

- ოჯახისაც მესმის, ასეთი ვერსია რომ აქვთ, ვინაიდან ზუსტად არ იცოდნენ, სად მუშაობდა და რას საქმიანობდა მათი შვილი. თუმცა სრულწლოვანი ადამიანი სამსახურიდან სად გაივლის, ყველას ხომ არ აყენებს საქმის კურსში? ლაპარაკობენ, სამსახურიდან მოდიოდა განერვიულებულიო. ასე დადასტურებულად იმის თქმა, რომ მაინც და მაინც იქიდან მოდიოდა ატირებული, არ შეიძლება. ჩვენ ხომ რეალობა არ ვიცით, მხოლოდ ვარაუდებია. ველოდებით ექსპერტიზის და გამოძიების შედეგებს და იმის მიხედვით ვიმსჯელებთ.

- კომპანიიდან ამოღებულ ტექნიკას თუ ჩაუტარდა ექსპერტიზა?

- პირველივე დღეს შემოვიდნენ, გადაუდებელი აუცილებლობით ამოიღეს ყველა თანამშრომლის კომპიუტერი და რამდენადაც ჩემთვის ცნობილია, ექსპერტიზა ჯერ არ ჩატარებულა, მასალა მოცულობითაც ბევრია. გამოძიებას ზოგადი კითხვები აქვს და ჩვენი მოთხოვნაა, რომ პირველ რიგში მოხდეს თამარის პირადი ტელეფონის და კომპიუტერის გახსნა, რომ ამის მიხედვით დაადგინონ იმ პირთა წრე, ან ის საქმიანობა იქნება, თუ სამსახური, რამაც შეიძლება რაღაცა გარკვეული მიმართულება მისცეს გამოძიებას.

- კომპანიის ხელმძღვანელობა დარწმუნებულია, რომ როცა თამარის ლეპტოპი გაიხსნება, იქ მათი მაკომპრომეტირებელი არანაირი მასალა არ აღმოჩნდება?

- რა თქმა უნდა, კომპანია დარწმუნებულია, რომ თამართან დაკავშირებით მსგავსი არაფერი იქნება. ამიტომაც არის, რომ პირველ რიგში ვითხოვთ, გახსნან თამარის კომპიუტერი. ის კითხვები, რომლებიც ჩნდება, გაუგებრობის ბრალია. ძნელია ფართო საზოგადოებას აუხსნა, რას აკეთებს პროგრამისტი, როგორ იწერება პროგრამა, ძალიან ბევრი ამას ვერ გაიგებს. მეც იურისტი ვარ და ახლა ვერკვევი, ეს სფერო სპეციფიკურ ცოდნას მოითხოვს. გაუგებრობა რომ არის, ამიტომაა მერე არასწორი ინფორმაცია და ბევრი ჭორი რომ ვრცელდება - აი, სპეცსამსახურები, კიბერდანაშაული და ა.შ. ყველაფერს არასწორი ინტერპრეტაცია მიეცა და ამიტომ ვითხოვთ, დროულად გაიხსნას კომპიუტერი. აუცილებელია კითხვებს პასუხი გაეცეს, ვინაიდან კომპანიის ინტერესები რეპუტაციულად ილახება.

- ალბათ ეჭვს ისიც ბადებს, რომ გაურკვეველია კომპანიის საქმიანობა და როგორც ამბობენ, შენიღბულია, არ აქვს ვებსაიტი, გოგონა ასაიდუმლოებდა მის საქმიანობას და ა.შ. შესაძლებელია, ბაჩალიაშვილს ჰქონოდა წვდომა საიდუმლო მასალებზე, მაგალითად, კომპანიის ინტერესების დამაზიანებელ ინფორმაციასთან?

- არა, გამორიცხულია. შენიღბულში რას გულისხმობთ? ვებსაიტიც არის და რატომ ამბობენ, რომ ვერ პოულობენ? ეს ჩვეულებრივად, კანონის წესით რეგისტრირებული კომპანიაა და იქიდან გამომდინარე, რომ საქართველოს ბაზარზე არ მუშაობენ და ჰყავთ დამკვეთი - ამერიკული კომპანია (რომლისთვისაც წერენ პროგრამას), არ იყო აუცილებლობა, რეკლამა გაეკეთებინათ, ამის ინტერესი არ ჰქონიათ. ასევე, არის ასეთი პლატფორმა "ლინკდინი", რომელშიც თამარის გვერდზე თუ შეხვალთ, ორივე კომპანია უწერია, სადაც მუშაობდა. ის ვერსია, რომ მას საიდუმლო ინფორმაციასთან ჰქონდა წვდომა, არასწორია. კომპიუტერი გაიხსნება და ყველაფერი გამოჩნდება - რასთან ჰქონდა წვდომა, რა ინფორმაციის მიღების საშუალება ჰქონდა, ან რა დაკვეთებს იღებდა ამ კომპანიისგან და სხვა კომპანიებისგანაც, ვინაიდან თამუნა ფრილანსერადაც მუშაობდა და სხვა შეკვეთებსაც იღებდა, რომელთაც შინიდან ასრულებდა. არანაირ საიდუმლო ინფორმაციასთან მას შეხება არ ჰქონია. ჩვენი სურვილია, რაც შეიძლება მალე გაიხსნას კომპიუტერი, რადგან რაც დრო გადის, ეს კამპანია კომპანიის მიმართ ძალიან ცუდ ფორმატს იღებს და აზიანებს მას. ასე თუ გაგრძელდა, არ ვიცი, რა იქნება. ჩვენ კი ვხსნით, რომ გოგონას გარდაცვალება სამსახურთან არანაირ კავშირში არაა, მაგრამ ამას სჭირდება ფაქტები და მტკიცებულებები.

- საეჭვოდ მიიჩნევა გეჯაძე-ბაჩალიაშვილის მიმოწერაც. ჯერ ერთი, რატომ არ მიმართა თამარმა პირდაპირ კომპანიის ხელმძღვანელს წასვლის თაობაზე და მეორე - რას ნიშნავს ფრაზა - "მე არ შემიძლია". ამ საკითხზე გაესაუბრებოდით მენეჯერს და რას ამბობს, რამე ისეთი დავალება ხომ არ მისცა, რის გაკეთებაზეც პროგრამისტი უარს ამბობდა?

- ნიკა გეჯაძემ მიაწოდა ტელევიზიებს ეს მიმოწერა, რომელიც ხუთშაბათს შედგა, შაბათს კი დაიკარგა გოგონა. ნიკა არის ჯგუფის უშუალო ხელმძღვანელი, რომელთანაც თამუნას ხშირი კომუნიკაცია ჰქონდა. თამარ კობერიძესთან მას სამსახურიდან წასვლის შესახებ ადრე ჰქონდა საუბარი, მოითხოვა სარეკომენდაციო წერილი და პრობლემა არ ყოფილა - თამარმა გაუგზავნა ეს წერილი. სულ იყო საკითხი, რომ გოგონა სწავლის გაგრძელებას აპირებდა და თანამშრომლებიც ადასტურებენ, რომ მისთვის პრიორიტეტი სწავლა იყო. რადგან იყო საუბრები, ამიტომ არ გაჰკვირვებიათ. და ის, რომ ნიკა პასუხობს - "გასაგებია", ეს იმას ნიშნავს, რომ უკვე იცოდა ამის თაობაზე. ბაჩალიაშვილს თამართან არანაირი დაძაბული ურთიერთობა არ ჰქონია.

- "არ შემიძლია" რას უნდა ნიშნავდეს? ან ის, რომ გეჯაძე არც ჩაჰკითხვია თანამშრომელს, რა არ შეეძლო...

- ვერ გეტყვით, კონკრეტულად რა კონტექსტში იხმარა ეს ფრაზა. ჯერ ერთი, თამარი უშუალოდ არ აძლევდა ბაჩალიაშვილს დავალებებს, ის არ არის პროგრამისტი, მენეჯერია. ნამდვილად არასწორად განვითარებულია ეს მიმართულება. რა თქმა უნდა, ვესაუბრე გეჯაძეს და ვიცი, რომ რადგან ამ თემაზე თამართან ერთხელ უკვე იყო საუბარი, მისთვის აღარ მიუმართავს. შესაძლოა, დროის უქონლობაზე იყო საუბარი, რომ ამის გამო არ შეეძლო მიმართვა. ბაჩალიაშვილი, ზოგადად, ნიკასთან უფრო გახსნილი იყო, მასთან ჰქონდა ხშირი კონტაქტი. თამარ კობერიძე ხუთშაბათს დაუკავშირდა თამუნას და უთხრა, რომ დოკუმენტაციას გაგიმზადებო, სადღაც ორშაბათს უნდა მისულიყო ბაჩალიაშვილი კომპანიაში და ამაზე მოეწერა ხელი, მაგრამ თამუნას მინაწერზე პასუხი არ აქვს გაცემული. შაბათს კი, სამწუხაროდ, გაუჩინარდა... ბაჩალიაშვილს თამართან არანაირი დაძაბული ურთიერთობა არ ჰქონია.

- თუ იციან კომპანიაში, სარეკომენდაციო წერილი რისთვის მოითხოვა, სად უნდა მიეტანა? და თუ სწავლის გაგრძელებას აპირებდა და დროის უქონლობის მოტივით ვეღარ აგრძელებდა ZEG-ში მუშაობას, სხვაგან რატომღა უნდა დაეწყო?

- ეს ზოგადი სარეკომენდაციო წერილი იყო. როგორც ვიცი, ის მანამდეც ჰქონდა მოთხოვნილი თამარისთვის. როგორც დირექტორი ამბობს, თამუნას უთქვამს, დავკარგეო, თუ ელექტრონული ვერსია მჭირდებაო. ივნისის ბოლოსკენ კობერიძე შვებულებაში გავიდა და გასვლამდე, მოთხოვნიდან მეორე დღეს, პდფ ფაილით გადაუგზავნა თამუნას სარეკომენდაციო წერილი.

- ZEG-ის ამერიკელმა მეპატრონემ, აბრაჰამ რეიხბახმაც დაადასტურა, რომ მის კომპანიაში დასაქმებულ თანამშრომლებს "საიდუმლო მასალებთან წვდომა აქვთ"...

- მისი ინტერვიუც არასწორად ითარგმნა. ინგლისურად ნათქვამსა და თარგმანს გადავხედე და მათ შორის ბევრი უზუსტობა დავიჭირე. აქ კომერციულ საიდუმლოებაზეა ლაპარაკი და არა რაღაც გასაიდუმლოებულ ინფორმაციებზე. ნებისმიერი შექმნილი პროგრამა არის დამკვეთის საკუთრება. სამუშაოს შესრულების დროს, პროგრამისტს შესაძლოა ჰქონდეს ვიღაცის იმეილთან წვდომა, რომელიც პერსონალური მონაცემია, ან მის საბანკო ანგარიშებთან. ასეთ საკითხებზეა ლაპარაკი. ჩემთან, როგორც იურისტთანაც რომ მოდიან და აფორმებენ კონტრაქტს, მეც მაქვს განსაზღვრული კონფიდენციალურობის თემა და ნებისმიერი კონტრაქტიც ითვალისწინებს ამას. რადგანაც მწირია ინფორმაცია, ახლა ზოგი კიბერდანაშაულზე ლაპარაკობს, ზოგი სადაზვერვო საქმიანობაზე და ათასგვარ აბსურდზე.

• "2 გოგო სხვა მანქანით იყო, ხმამაღლა კამათობდნენო..." - რას ყვებიან გოლთეთის მაცხოვრებლები თამარ ბაჩალიაშვილის საქმის ახალ ფიგურანტებზე