რატომ არ შეინახა პატრულ-ინსპექტორების სამხრე კამერებმა ინფორმაცია ფოტოგრაფის შესახებ? - შაქარაშვილის საქმის ახალი დეტალები

19 წლის ფეხბურთელის, გიორგი შაქარაშვილის საქმის ახალი მასალების თანახმად, რომელიც რადიო "თავისუფლებამ" მოიპოვა, იმ პატრულ-ინსპექტორების სამხრე კამერების ჩანაწერებში, რომლებმაც 19 ივნისის ღამეს, არაგვის ხიდის მიმდებარე ტერიტორიიდან, საქმის ერთ-ერთი მთავარი მოწმე, იაკობ ბრეგვაძე წამოიყვანეს, გამოძიებამ საქმისთვის მნიშვნელოვანი ინფორმაცია ვერ ნახა. უფრო ზუსტად, დროის იმ მონაკვეთის ჩანაწერი, როდესაც პატრულ-ინსპექტორები არაგვის ხიდთან პოულობენ იაკობ ბრეგვაძეს და შემდეგ ის თბილისში მოჰყავთ, დათვალიერების ოქმის თანახმად, არ არსებობს.

გამოძიებამ პატრულ-ინსპექტორების, გიორგი ზარიაშვილისა და ვალერი ჯიქურაშვილის სამხრე კამერების ჩანაწერები 112-დან 6 ივლისს გამოითხოვა. გამოძიების ინტერესის არეალში მოექცა 2020 წლის 18 ივნისის 23 საათიდან 2020 წლის 19 ივნისის 03:00 საათამდე პერიოდის ჩანაწერი.

ჩანაწერები შსს-ს ცენტრალური კრიმინალური პოლიციის დეპარტამენტის უფროსმა გამომძიებელმა 19 ივლისს დაათვალიერა, თუმცა, როგორც ის ოქმში წერს, გიორგი შაქარაშვილთან დაკავშირებული ინფორმაცია ამ ჩანაწერებში არ აღმოჩნდა. 112-დან გამოთხოვილ მასალაში სამხრე კამერების რამდენიმე ჩანაწერი ფიქსირდება. თუმცა, ყველა მათგანი გადაღებულია 18 ივნისის 23:27 საათიდან, 23:32 საათამდე. ანუ, იმ პერიოდში, როდესაც არაგვის ხიდზე ახალგაზრდების დევნა ჯერ დაწყებულიც კი არ იყო.

უფროსი გამომძიებელი დათვალიერების ოქმში წერს: „სამხრე ვიდეო-კამერების ჩანაწერების დათვალიერებისას, საქმისთვის მნიშვნელოვანი გარემოებები არ დაფიქსირებულა“.

პატრულ-ინსპექტორი გიორგი ზარიაშვილი, რომელიც გამოძიებამ 4 ივლისს გამოკითხა, ჩვენებაში წერს, რომ მას და მის მეწყვილეს იაკობ ბრეგვაძესთან ურთიერთობისას, სამხრე კამერები გათიშული ჰქონდათ:

„იმის გამო, რომ იაკობ ბრეგვაძის ნახვამდე, მან გამოძახება გააუქმა, მასთან საუბრისას მე და ჩემს მეწყვილეს ვალერი ჯიქურაშვილს, სამხრე კამერები არ ჩაგვირთავს“.

ახლა ლევან სამხარაულის ექსპერტიზის ბიურომ უნდა დაადგინოს, წაშლილია თუ არა კამერებიდან 2020 წლის 18 ივნისიდან 2020 წლის 19 ივნისის 03:00 საათამდე დროის მონაკვეთში გადაღებული ინფორმაცია? ახორციელებდა თუ არა პოლიციის ავტომანქანის ბორტ-კომპიუტერი ვიდეო/ფოტო ან აუდიო ჩანაწერს? და წაშლილია თუ არა ეს ინფორმაცია? - ეს კითხვები გამოძიებამ ექსპერტიზას 15 ივლისს გაუგზავნა.

პატრულ-ინსპექტორების სამხრე კამერებისა და ბორტ-კომპიუტერის ჩანაწერების შინაარსი შაქარაშვილის საქმეში მნიშვნელოვან როლს ასრულებს იმ თვალსაზრისით, რომ საქმის მთავარი მოწმის, იაკობ ბრეგვაძის ჩვენებები, რომელმაც ინციდენტის ღამეს პატრული გამოიძახა, გარკვეულ უზუსტობებს შეიცავს. არსებობს ვარაუდი იმის შესახებაც, რომ იაკობ ბრეგვაძის მიერ განხორციელებული ზარი 112-ში, რომლის ჩანაწერიც შსს-მ გამოაქვეყნა, შესაძლოა, არ იყოს ავთენტური. თუმცა, ამ დრომდე, ექსპერტიზა ზარის ავთენტურობასთან დაკავშირებით, არ ჩატარებულა. გარდა ამისა, პატრულ-ინსპექტორების გამოკითხვის ოქმებიდან ირკვევა, რომ იაკობ ბრეგვაძე შემთხვევით შეესწრო მცხეთის მაგისტრალზე ჩხუბს, ის ახალგაზრდებს არ იცნობდა და დასავლეთიდან თბილისის მიმართულებით ე.წ. ავტოსტოპით მოდიოდა.

შსს-ს ინფორმაციით, ინციდენტის ღამეს, მცხეთაში მისული პოლიციის ეკიპაჟის მოქმედების სამართლებრივ მხარეს შინაგან საქმეთა სამინისტროს გენერალური ინსპექცია იკვლევს. (წყარო)

შეგახსენებთ, რომ 19 ივნისს, დაახლოებით 11:00 საათზე, გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები.

4-დღიანი საძიებო სამუშაოების შედეგად, მყვინთავებმა ფეხბურთელ გიორგი შაქარაშვილის ცხედარი წყალში იპოვეს. მომხდარზე დაკავებულია 17 პირი, მათ შორის არიან მორაგბეები, ძიუდოისტი და ფეხბურთელი. ისინი ბრალს არ აღიარებენ. ყველა დაკავებულს მცხეთის სასამართლომ წინასწარი პატიმრობა შეუფარდა.

ექსპერტიზის დასკვნის მიხედვით, გიორგი შაქარაშვილი გარდაცვალების მიზეზი ასფიქსია გახდა. ამავდროულად, გიორგი შაქარაშვილის ცხედარზე აღინიშნება სიკვდილის წინა ახლო პერიოდში მკვრივი-ბლაგვი საგნის მოქმედებით მიყენებული, სიცოცხლისდროინდელი დაზიანებები შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში.

ექსპერტიზის დასკვნისა და საქმეში არსებული სხვა მტკიცებულებების ერთობლივი ანალიზის საფუძველზე სისხლის სამართლის საქმის უკვე არსებულ კვალიფიკაციას დაემატა დამამძიმებელ გარემოებებში ჯგუფურად განხორციელებული განზრახ მკვლელობა, დანაშაული გათვალისწინებული საქართველოს სისხლის სამართლის კოდექსის 109-ე მუხლის მე-2 ნაწილის „ე“ ქვეპუნქტით და გამოძიება გიორგი შაქარაშვილის გარდაცვალების ნაწილში წარიმართება აღნიშნული კვალიფიკაციით.