კორონავირუსი და მსოფლიო - სად იზრდება და სად მცირდება ინფიცირებულთა რაოდენობა

კორონავირუსით ინფიცირებულთა რაოდენობამ, გლობალური მასშტაბით, უკვე 10 მილიონს გადააჭარბა. ჯანდაცვის მსოფლიო ორგანიზაციაში კი ინფიცირების მეორე ტალღასა და მის საფრთხეზე სულ უფრო ხშირად საუბრობენ.

მაშინ, როცა ევროპისა და აზიის ზოგიერთმა ქვეყანამ ვირუსის გაკონტროლება დაიწყო, სხვა კონტინენებზე COVID-19 სწრაფად ვრცელდება და შემთხვევების რაოდენობა დღითიდღე იზრდება.

აშშ კორონავირუსის გავრცელების კუთხით კვლავ ეპიცენტრად რჩება. შტატებში ინფიცირებულთა საერთო რაოდენობა 2.6 მილიონს აჭარბებს და ამ მონაცემებით მსოფლიოს პირველი ქვეყანაა. აშშ-ში ვირუსით გარდაცვლილთა რაოდენობა, სხვა ქვეყნებთან შედარებით ყველაზე მეტია - 128 437 გარდაცვლილი.

როგორც BBC წერს, გასულ ხუთ დღეში ქვეყანაში ყოველდღიური შემთხვევების რეკორდული რაოდენობა დაფიქსირდა. ბოლო 5 დღეა, რაც ახალ ინფიცირებულთა რაოდენობა ყოველ დღე 40 000-ს აჭარბებს. შესაბამისად, ამერიკა ეპიდემიოლოგიური თვალსაზრისით, ცხელ წერტილად რჩება. სპეციალისტები ამბობენ, რომ ეს არ არის მეორე ტალღა, ეს არის ინფიცირების აფეთქება, რომელიც შეზღუდვების ნაადრევად მოხსნამ გამოიწვია.

როგორც BBC წერს, ბოლო კვირების განმავლობაში კორონავირუსის შემთხვევები მნიშვნელოვნად გაიზარდა ბრაზილიაში, მექსიკაში, ინდოეთსა და სამხრეთ აფრიკაში.

ბრაზილია ინფიცირებულთა რაოდენობის მიხედვით მსოფლიოს მეორე ქვეყანაა, სადაც უკვე 1 მილიონს გადააჭარბა COVID-19-ის შემთხვევების რაოდენობამ. ყველაზე მძიმე ვითარება ქვეყნის უდიდეს ქალაქებში სან პაულოსა და რიო დე ჟანეიროშია, თუმცა ბრაზილიის სხვა ნაწილებსა და სხვა ქალაქებშიც არ არის სახარბიელო მდგომარეობა. ქვეყენა ვერ ატარებს მასობრივ ტესტირებას და მიიჩნევენ, რომ ინფიცირებულთა რაოდენობა გაცილებით მეტია, ვიდრე ოფიციალურ მონაცემებში წერია.

მსგავსი სიტუაციაა ინდოეთშიც, სადაც ყოველ დღე ახალი ინფიცირებულების რაოდენობა 15 ათასს აჭარბებს, მაგრამ ვინაიდან მასობრივი ტესტირება ვერ ხერხდება, მიიჩნევენ, რომ მათი რაოდენობა გაცილებით მეტია.

სამხრეთ აფრიკაში ბოლო 5 დღეა, რაც ახალი ინფიცირებულების რაოდენობა, ყოველ დღე, 5 000-ს სცდება, ანალოგიური სიტუაციაა მექსიკაშიც.

• სად ახერხებენ ვირუსის კონტროლს?

BBC გამოყოფს ქვეყნებს, რომლებიც ვირუსის კონტროლს ახერხებენ. ამ მხრივ მთავარი წარმატება ახალ ზელანდიას აქვს, სადაც 24 დღის განმავლობაში ვირუსის არცერთი შემთხვევა არ იყო გამოვლენილი, თუმცა 24 დღის შემდეგ, ახალი ინფიცირებულები გამოავლინეს, ორი ქალი, რომლებმაც ვირუსი ქვეყანაში დიდი ბრიტანეთიდან შეიტანეს. ამ ეტაპზე ინფიცირების გავრცელება შეჩერებულია და კონტროლს ექვემდებარება. ახალი ზელანდიის წარმატების მიზეზად ქვეყნის ხელისუფლების მყისიერ მოქმედებას და მასობრივ ტესტირებას ასახელებენ.

მსგავსი შეგვიძლია ვთქვათ სამხრეთ კორეაზეც, სადაც მართალია, ვირუსის მეორე ტალღა ოფიციალურად გამოაცხადეს, თუმცა ბოლო სამი დღეა მნიშვნელოვნადაა შემცირებული ახალი ინფიცირებულების რაოდენობა. სამხრეთ კორეაში ახალი კლასტერები გაჩნდა, მაგრამ სპეციალისტებმა სწრაფად გამოავლინეს ინფიცირებულებთან კონტაქტები და შესაძლო კონტაქტები, რამაც ვირუსის გაკონტროლების შესაძლებლობა მისცათ. ინფიცირებულების რაოდენობა იკლებს ავსტრალიასა და ვიეტნამში.

მართალია, BBC არაფერს წერს საქართველოს შესახებ, თუმცა თუ stop.cov.ge-ს მონაცემებს დავეყრდნობით, ჩვენი ქვეყანა წარმატებით ახერხებს ვირუსის კონტროლს და ბოლო დღეებია ინფიცირების 2, ან 3 ახალი შემთხვევა ვლინდება, რომლებიც ძირითადად საკარანტინო სივრცეებიდანაა.

კორონავირუსის პანდემია ჯანდაცვის მსოფლიო ორგანიზაციამ 11 მარტს გამოაცხადა. ვირუსი მსოფლიოში ჩინეთის ქალაქ უხანიდან გავრცელდა. გლობალური მასშტაბით, COVID-19-ით სულ 10.2 მილიონი ადამიანი დაინფიცირდა, 504 520 პაციენტი გარდაიცვალა, ხოლო 5.5 მილიონი გამოჯანმრთელდა. ინფიცირებულთა რაოდენობის მიხედვით ქვეყნების ათეული ასეთია: აშშ, ბრაზილია, რუსეთი, ინდოეთი, დიდი ბრიტანეთი, ესპანეთი, პერუ, ჩილე, იტალია და ირანი.