საუბარია, სისტემატურ ძალადობაზე... არსებობს მოწმეთა ჩვენებები, ფოტო და ვიდეომასალა - ნელი დოროყაშვილის ადვოკატი

მითითება იმაზე, რომ საქმეში მტკიცებულებები არ არსებობს, არ არის სწორი, სიმართლეს არ შეესაბამება. თუმცა, კონკრეტული მტკიცებულებების შინაარსობრივ მხარეში შეგნებულად არ შევდივართ, არ ვსაუბრობთ, არ ვასაჯაროებთ. ვინაიდან, პირველ რიგში, ვუფრთხილდებით ბავშვის ინტერესებს და რა თქმა უნდა, გვსურს, რომ თავიდან ავიცილოთ დაზარალებულებისთვის ხელახალი ზიანის მიყენება, - ამის შესახებ ჩოგბურთელ ნიკოლოზ ბასილაშვილის ყოფილი მეუღლის ნელი დოროყაშვილის ადვოკატმა, ანა თავხელიძემ „ფეისბუქლაივის“ დროს განაცხადა.

ადვოკატი იმედოვნებს, რომ მომხდართან დაკავშირებით სასამართლო სიმართლეს დაადგენს.

„ჩვენ ამ საქმის დეტალებში პირველ რიგში, ბავშვის საუკეთესო ინტერესიდან გამომდინარე, არ შევალთ. ასევე იქიდან გამომდინარე, რომ არ შეიძლება, ადამიანის პირადი ცხოვრება საჯარო განხილვის საგანი გახდეს. ამ სისხლის სამართლის საქმესთან დაკავშირებით, ორ მნიშვნელოვან საკითხს შევეხები: პირველ რიგში, აქ საუბარი არ არის კონკრეტულ ინციდენტზე და ძალადობის ერთ კონკრეტულ შემთხვევაზე. საუბარი არის განგრძობად, სისტემატურ ძალადობაზე, სხვადასხვა დროს და ადგილას სხვადასხვა ფორმით ხდებოდა ძალადობა, რაც დამატებით გამოძიების საგანია. ჩვენ მოლოდინი გვაქვს, რომ სახელმწიფო ამ მიმართულებით ეფექტურ გამოძიებას ჩაატარებს და შესაბამის სამართლებრივ შეფასებას მისცემს. მეორე, ძალიან მნიშვნელოვანი საკითხი, რაც ხშირად განსჯადი თემა არის დღეს საზოგადოებაში, არის სისხლის სამართლის საქმეში არსებული მტკიცებულებები. ჯერ კიდევ გამოძიების საწყის ეტაპზე ხაზგასმით შეგვიძლია აღვნიშნოთ, რომ საქმეში არსებობს არაერთი მტკიცებულება, რასაც დაეყრდნობა გადაწყვეტილების მიღების პროცესში სასამართლო. საუბარია, როგორც სხვადასხვა მტკიცებულებებზე, მოწმეთა ჩვენებებზე, ასევე ფოტო და ვიდეომასალაზე. საუბარი არის ექსპერტიზის დასკვნაზე, შეფასებებზე, რომელიც მომავალშიც ასევე გაგრძელდება. მთავარია, რომ ამ საქმეზე გამოძიება გრძელდება და ჩვენთან თანამშრომლობით კიდევ არაერთ მტკიცებულებას მოიპოვებს სახელმწიფო, რასაც ბუნებრივია, გადაწყვეტილების მიღების პროცესში ექნება ძალიან დიდი მნიშვნელობა“, - განაცხადა ანა თავხელიძემ.

აღსანიშნავია, რომ ადვოკატების „ფეისბუქ კონფერენციას“ თავად ნელი დოროყაშვილი არ ესწრებოდა. როგორც ადვოკატმა ანა აბაშიძემ განმარტა, დოროყაშვილი ძალიან მძიმე ემოციურ მდგომარეობაშია, რის გამოც ადვოკატებთან ერთად ყოფნა ვერ შეძლო.