"შემოთავაზებული იქნება ვაქცინა, რომელიც გახდება იარაღი ეშმაკის ხელში ადამიანების სამართავად" - მეუფე საბა

ხონისა და სამტრედიის ეპარქიის ეპისკოპოსის მეუფე საბას (გიგიბერია) ქადაგების თანახმად, მოწოდება - "დარჩით სახლში", ეშმაკისეულია. ამის შესახებ მეუფემ კვირას, წირვის დასრულების შემდეგ ამბიონიდან იქადაგა.

მან ასევე გააკრიტიკა სასულიერო პირები და არამხოლოდ, რომლებმაც ვირუსის შიშით, მრევლს მოუწოდეს ღვთისმსახურებაზე ეკლესიაში არ მისულიყვნენ აღდგომის დღესასწაულზე.

"ამ პერიოდში მთელს მსოფლიოში იყო მოწოდება, ქრისტიანის თუ არაქრისტიანისთვის - დარჩით სახლში, განმარტოვდით, ნუ წახვალთ ეკლესიაში, ნუ აღნიშნავთ ტრადიციული წესით აღდგომის დღესასწაულს. არ ვიცი, ადამიანს რამდენად შეიძლება ჰქონდეს დახშული გონება, რომ ვერ მიხვდეს - არ დაესწრო აღდგომას, ამას ვინ იტყვის თუ არა ეშმაკი? სწორედ ეს არის ის უხილავი მტერი, რომელიც ადამიანის გონებაში შემოვიდა და საბედისწერო შეცდომა დააშვებინა...

როგორ შეიძლება დღეს სახლში ჯდომა და ლოცვა შეადარო პირველ საუკუნეებში წმინდა მამების ლოცვას, რომლებიც განმარტოვდებოდნენ უდაბნოში და სულით მუდამ მონასტერში იყვნენ? ამას როგორ უნდა შეადარო იმ სახლში აღვლენილი ლოცვა, სადაც ხშირად, ლოცვაზე მეტად გინება ისმის და ლოცვაზე მეტი ცოდვა აღესრულება?...

ხელისუფლებას უპირობოდ არ უნდა ემსახურო, თუ ის ხელს უშლის ადამიანების სულის ცხონებას და ღმერთთან ერთობას, თუ ის ებრძვის ღმერთს და ეკლესიას. აქ უპირობოდ უნდა დაუპირისპირდე ხელისუფალს და არ უნდა დაემორჩილო მას. დღევანდელი ხელისუფლება, ვერ ვიტყვი, რომ ხელს უშლის ადამიანებს სულიერი მოთხოვნილებების დაკმაყოფილებაში, მაგრამ ეს არ არის საკმარისი რომ ღვთისთვის სათნო იყოს რასაც ისინი აკეთებენ...

დღევანდელი ვირუსი, ეს არის საშუალება ეშმაკის ხელში, ადამიანები თავისი გავლენის ქვეშ მოაქციოს. ვირუსი რეალურია, თუმცა არა საბედისწერო. მოვა დრო, ამაზე უფრო მასშტაბურად მოგვიწევს საუბარი - შემოთავაზებული იქნება კაცობრიობისთვის, ადამიანებისთვის ვაქცინა, რომელიც არა იმდენად ვირუსს მოემსახურება, არამედ ადამიანის დამონებას, მართვას, დამორჩილებას მოემსახურება და გახდება მნიშვნელოვანი იარაღი ეშმაკის ხელში, რომ ადამიანები მართოს და ადვილად წარწყმიდოს...

მამები ამბობენ, ბოლო ჟამს, როდესაც მოგიწევთ გაექცეთ ანტიქრისტეს დევნას, გაექეცით არა თითო-თითო, არამედ ბევრი ერთად, რომ ერთმა ადამიანმა მეორე გააძლიეროს. დღეს ეშმაკი ამის საწინააღმდეგოდ ადამიანებს ალაპარაკებს - დარჩით მარტო, დარჩით სახლში, მიეჩვიეთ მარტოობას და მარტო ებრძოლეთ იმას, რა რეალობაშიც ხართ. თუ ღრმად ჩავწვდებით, მარტო უნდა ვებრძოლოთ არა კორონავირუსს, არამედ უნდა ვებრძოლოთ ეშმაკს და მარტო ეშმაკთან ბრძოლა ძალიან რთულია...

თუ ვირუსი გახდა მაპროვოცირებელი გარდაცვალებისა, ეს არ იძლევა იმის თქმის საშუალებას, რომ ვირუსმა მოკლა ადამიანი - უბრალოდ, მოვიდა გარდაცვალების დრო. გარდაცვალება ზოგისთვის ვირუსის ქვეშ ხდება, ზოგისთვის ალკოჰოლური თრობის ან ავარიის დროს... ასე რომ, რატომ არ ვფიქრობთ სხვა გარდაცვალების დროს და ასეთი კრიტიკული რატომ ვართ კორონავირუსით გარდაცვალების დროს? სულზე იფიქრეთ და ის, რისთვისაც ცხოვრობთ ამ ქვეყანაზე, იქნება აღსრულებული!" - განაცხადა მეუფემ ქადაგებისას.