საფრანგეთში COVID-19-ის პირველი შემთხვევა დეკემბერში გამოვლინდა - რა აღმოაჩინეს ექიმებმა პაციენტთა ნიმუშების გადამოწმების შემდეგ

საფრანგეთის ერთ-ერთი საავადმყოფოს ექიმების გუნდის განცხადებით, პაციენტი, რომელსაც 2019 წლის 27 დეკემბერს პნევმონია დაუდგინდა, ახალი კორონავირუსით იყო ინფიცირებული. ამის შესახებ BBC წერს.

გამოცემის ცნობით, ექიმმა ივს კოენმა ფრანგულ მედიას უთხრა, რომ ახლა, როცა პნევმონიის დიაგნოზის პაციენტთა ნიმუშები გადაამოწმეს, აღმოჩნდა, რომ 50 წლის მამაკაცი COVID-19-ით ყოფილა ინფიცირებული.

აღსანიშნავია, რომ მამაკაცი სრულად გამოჯანმრთელდა და თავს კარგად გრძნობს, თუმცა არავინ იცის როგორ დაინფიცირდა, რადგანაც მას არ აქვს ჩინეთში მოგზაურობის ისტორია.

ყოველივე იმაზე მიუთითებს, რომ კორონავირუსი საფრანგეთში იმაზე გაცილებით ადრე იყო გავრცელებული, ვიდრე ოფიციალურად დადასტურებულია.

ოფიციალურად კი ახალი ვირუსით დაინფიცირების პირველი შემთხვევა საფრანგეთში 24 იანვარს აღირიცხა. კორონავირუსი ორ პირს დაუდასტურდა, რომელთაც ჩინეთში, უხანში მოგზაურობის ისტორია ჰქონდათ.

ექიმების განცხადებით, ისინი თავიდან ტესტავენ იმ პაციენტების ნიმუშებს, რომლებმაც დეკემბერში პნევმონია გადაიტანეს.

ამ დროისთვის ქვეყანაში კორონავირუსის ახალი შტამის, COVID-19-ის 169 462 შემთხვევაა გამოვლენილი, მათ შორის 25 201 პაციენტი გარდაიცვალა, ხოლო 51 371 გამოჯანმრთელდა.