25
მარტიდღის ზოგადი ასტროლოგიური პროგნოზი
"ფეისბუქში" მოქალაქები ჩივიან, რომ მთავრობის დაპირება 9 ძირითადი პროდუქტის არგაძვირების შესახებ, არ სრულდება და სხვადასხვა სავაჭრო ქსელში ფასებმა მოიმატა.
შეგახსენებთ, მინისტრთა კაბინეტის წევრებმა ორი კვირის წინ განაცხადეს, რომ ბიზნესთან შეთანხმება შედგა და კორონავირუსის პანდემიის პერიოდში 9 პროდუქტზე ფასი არ შეიცვლება. ეს ძირითადი პროდუქტებია: ბრინჯი; მაკარონი; მზესუმზირის ზეთი; ფქვილი; შაქარი; ხორბალი; წიწიბურა; ლობიო; რძის ფხვნილი და მისგან წარმოებული პროდუქტები.
თუმცა, "სასოწარკვეთილი მომხმარებლების" ჯგუფში მოქალაქეები ყოველდღიურად წერენ, რომ ფასები მომატებულია თითქმის ყველა ზემოთ ჩამოთვლილ პროდუქტზე.
"დღეს ვიკითხე რძის ფხვნილის ფასი, მოიმატა ფასმაო გამყიდველი მეუბნება - 7 ლარი და 50 თეთრი ღირდა, დღეს 17 ლარი და 50 თეთრი, 10 ლარია ნამატი!"
"რა ფასების კონტროლი? წიწიბურა 4,40 ღირს (ღირდა 1,90), ლობიო 6,80ღირს (ღირდა 4.50), ზეთი 3,40 ღირდა ახლა 4,80ღირს; მაკარონი 1,35 ღირდა (ახლა 3.30 ღირს). ყველაფერი 80%-ით გაძვირდა. პირველადი მოხმარების საკვებს ცეცხლი უკიდია!"
"მაკარონი, წიწიბურა, ზეთი, საპონიც კი გააძვირეს..."
"ყველამ უნდა გადავუღოთ ფოტოები და დავუდოთ მთავრობას გვერდზე.იქნებ მოხდეს ამაზე რეაგირება და დარეგულირდეს ფასები დაპირებისამებრ. ჩვენ თუ არ გამოვხატეთ პროტესტი, ეს თავისთავად არ მოხდება" - წერენ ინტერნეტმომხმარებლები.
თუმცა, სოფლის მეურნეობის სამინისტროში აღნიშნულს უარყოფენ და აცხადებენ, რომ 9 პროდუქტზე, რომელზეც სახელმწიფომ ფასის ზრდა დააზღვია, ფასი მომატებული არ არის.
როგორც „ინტერპრესნიუსს“ გარემოს დაცვისა და სოფლის მეურნეობის სამინისტროს, სოფლის მეურნეობის სურსათისა და სოფლის განვითარების დეპარტამენტის უფროსმა, თენგიზ კალანდაძემ განუცხადა, პროდუქტების ფასის მონიტორინგი ხდება როგორც იმპორტის, ასევე დისტრიბუციისა და საცალო გაყიდვის ეტაპზე და ამ დროისთვის ფასის მატება არ ფიქსირდება, თუმცა შესაძლოა, სურსათის გაძვირების ცალკეული ფაქტები კერძო უბნის მაღაზიებში დაფიქსირდეს.
„დღემდე 20-მდე მსხვილ იმპორტიორ კომპანიას აქვს გაფორმებული ჩვენთან კონტრაქტი და ჩვენი მიდგომაა ის, რომ 9 პროდუქტის ფასი 10 მარტის მდგომარეობით არსებულთან შედარებით არ უნდა გაიზარდოს.
მთავარია, რომ სისტემურად გვიჭირავს ეს პროცესი. ყოველდღიურ რეჟიმში ვაკონტროლებთ, ფასებს ვადევნებთ თვალყურს. სპეციალური მონიტორინგის ჯგუფია შექმნილი. ფასები, როგორც თბილისიდან, ასევე რეგიონებიდან იგზავნება ჩვენთან და ზრდა არ არის. შესაძლებელია ეს იყოს ერთეულ საუბნო მაღაზიებში, რომ მაგალითად 10 თეთრით მოიმატოს წიწიბურის ფასმა, მაგრამ საერთო ჯამში თუ ავიღებთ, ვინც ბაზარზე ოპერირებს, 80-90 % შემთხვევაში, ფასები შენარჩუნებულია“, - აცხადებს კალანდაძე "ინტერპრესნიუსთან" საუბარში.
მისივე თქმით, თუ მომხმარებლები ფასის მატების ფაქტს დააფიქსირებენ, შეუძლიათ ეს უწყებას აცნობონ და რეაგირება მყისიერი იქნება.
„მე მოვუწოდებ მომხმარებლებს, თუ შენიშნავენ სპეკულაციურად ფასის გაზრდას, შეგვატყობინონ. გვაქვს ცხელი ხაზი 15 01, მყისიერ რეაგირებას მოვახდენთ ამაზე“, - აღნიშნავს თენგიზ კალანდაძე.
ცნობისთვის, სახელმწიფო 9 სასურსათო პროდუქტზე: ბრინჯი, მაკარონის ნაწარმი, წიწიბურა, მზესუმზირის ზეთი, შაქარი, ხორბალი, ხორბლის ფქვილი, რძის ფხვნილი და ლობიო, ფასის ზრდას აზღვევს, რისთვისაც ბიუჯეტიდან 10 მილიონი ლარია გამოყოფილი.
საგანგებო მდგომარეობაა ოცნება ცოტა მკაცრად მოექეცით სპეკულიანტებს ნუ გეშინიათ საკუთარი ჩრდილის
წყალში,ან ვიღაცის ჯიბეში ჩაყრილი 10 მილიონი..