"თვენახევრის შემდეგ ეპიდემია წავა ქვემოთ... საქართველო ამ უმძიმესი გამოწვევიდან მინიმალური დანაკარგით გამოვა" - თენგიზ ცერცვაძე

"თვენახევრის შემდეგ ეპიდემია წავა ქვემოთ და საქართველო ამ უმძიმესი გამოწვევიდან მინიმალური დანაკარგით გამოვა" - ამის შესახებ ინფექციური საავადმყოფოს დირექტორმა თენგიზ ცერცვაძემ ბრიფინგზე განაცხადა.

მისი ვარაუდით, ქვეყანაში ვირუსის პიკს ორი-სამი კვირის შემდეგ უნდა ველოდოთ, თუმცა "ეს პიკი არ იქნება აფეთქება, ეს იქნება მდორე პიკი".

"ეს იქნება რამდენიმე ათეული შემთხვევით მატება და არა რამდენიმე ასეულით. ეს პიკი კიდევ ორი-სამი კვირის მანძილზე შენარჩუნდება და დაახლოებით თვენახევრის შემდეგ ეპიდემია წავა ქვემოთ.

საქართველო ამ, XXI-ე საუკუნის ყველაზე მძიმე გამოწვევიდან, მინიმალური დანაკარგით გამოვა. ეს არის ყველაზე მძიმე გამოწვევა მეორე მსოფლიო ომის და "ისპანკას" შემდეგ. თქვენს თაობას ამაზე მძიმე გამოწვევა არ ახსოვს.

შემდეგ მთავარია ისევ სოლიდარობა. ისე მიხარია ახლა თქვენ რომ გხედავთ ერთად, მათ შორის დაპირისპირებულ ტელევიზიებს, ოპოზიციურ ტელევიზებს. მე ვთანამშრომლობ ყველა ტელევიზიასთან და არავისგან მიგრძვნია არაკეთილგანწყობა. ისეთ აღმაფრენას ვხედავ თქვენში, ადამიანებში, ქართულ საზოგადოებაში, 72 წლის ვარ და ასეთი სოლიდარობა საქართველოში არ მახსოვს" - აღნიშნა ცერცვაძემ.

ცნობისთვის, საქართველოში კორონავირუსის 195 შემთხვევაა დადასტურებული. მათგან 45 უკვე გამოჯანმრთელებულია, ხოლო 3 პაციენტია გარდაცვლილი.