გახარია: "ვაცხადებთ, ფაქტობრივად, საყოველთაო კარანტინს, რომელიც ხვალ დილის 8 საათიდან დაიწყება"

კორონავირუსთან დაკავშირებით მოქმედი უწყებათაშორისი საკოორდინაციო საბჭოს მორიგი სხდომა დასრულდა.

საქართველოს პრემიერ-მინისტრის გიორგი გახარიას განცხადებით, მიღებულია გადაწყვეტილება საგანგებო მდგომარეობის სიტუაციის კიდევ უფრო გამკაცრების:

"ინფიცირებულთა რაოდენობის ზრდის დინამიკა შემაშფოთებელია... გვაქვს სამი შემთხვევა, რომელთა წარმომავლობასაც ვერ ვადგენთ. გვაქვს შემთხვევა, როდესაც სამედიცინო სექტორის თანამშრომელია ინფიცირებული და ეს ფაქტი, სხვა მოცემულობასთან ერთად, გვაძლევს შემდგომი ნაბიჯების გამკაცრების შესაძლებლობას.

ჩვენ ვხედავთ, რომ ჩვენი მოქალაქეების გარკვეული ნაწილი ვერ აცნობიერებს პრობლემის სიმძიმეს. ჩვენი ვალდებულება გახლავთ ის, რომ აქ, საქართველოში, სანამ კიდევ ვაკონტროლებთ სიტუაციას, სანამ ჩვენი ყოველდღიური და პრევენციული ნაბიჯები გვაძლევს იმის საშუალებას ვთქვათ, რომ ჩვენ შედარებით, ასე თუ ისე, ნორმალურად ვუმკლავდებით გამოწვევებს, მოდუნების საფუძველი არ მოგვცეს. აბსოლუტურად უნდა ვიაზრებდეთ მდგომარეობის იმ სიმძიმეს, რომელსაც ყოველდღიურად ვხედავთ ევროპის ქვეყნებში.

სამწუხაროდ, ყველა მოქალაქეს არ აქვს მდგომარეობის სიმძიმე გაცნობიერებული... ყველაფერს ვაკეთებთ, რომ გამკაცრების ღონისძიებებით ვეცადოთ მინიმალური ზიანი მივაყენოთ ეკონომიკას, მაგრამ ის დამოკიდებულება, რასაც საქართველოს ქალაქებში ვხედავთ, მიუღებელია...

ამიტომ, ჩვენ ვაცხადებთ ფაქტობრივად საყოველთაო კარანტინს, რომელიც ხვალ დილის 8 საათიდან დაიწყება. კარანტინის ფარგლებში სრულად იკრძალება ნებისმიერი ტიპის საზოგადოებრივი ტრანსპორტით, მათ შორის მეტროთი გადაადგილება", - განაცხადა გახარიამ.

პრემიერის თქმით, საყოველთაო კარანტინის ფარგლებში, მოქალაქეებს აეკრძალებათ ქუჩაში გადაადგილება საღამოს 21:00 საათიდან დილის 06:00 საათამდე.