მადრიდის "რეალის" სტადიონი, "სანტიაგო ბერნაბეუ" სამედიცინო ცენტრად გადაკეთდება

საფეხბურთო კლუბ მადრიდის რეალის საშინაო არენა, „სანტიაგო ბერნაბეუ“ სამედიცინო ცენტრად გადაკეთდება. ამის შესახებ კლუბის ოფიციალურ ვებ-გვერდზე გამოქვეყნებულ ინფორმაციაშია აღნიშნული.

განცხადების თანახმად, "რეალ მადრიდი" აპირებს თავისი წვლილი შეიტანოს კორონავირუსთან ბრძოლაში. სწორედ ამიტომ, კლუბის მესვეურებმა გადაწყვიტეს, რომ სანტიაგო ბერნაბეუზე განთავსდეს სტრატეგიულად მნიშვნელოვანი სამედიცინო მასალები.

სტადიონი სამედიცინო მასალებისა და აღჭურვილობისთვის ერთგვარი საწყობი იქნება, საიდანაც შემდეგ კლინიკებში გადანაწილდება.

გარდა ამისა "მადრიდის რეალი“ უზრუნველყოფს სპორტის სექტორის წარმომადგენლებისგან შემოწირულობების შეგროვებას, რომელიც პანდემიასთან ბრძოლას მოხმარდება.

აღსანიშნავია, რომ ესპანეთში საავადმყოფოები პაციენტებს ვეღარ იტევს, ამიტომაც საველე ჰოსპიტალები სხვა დანიშნულების შენობებში იხსნება. მაგალითად, მადრიდში, ერთ-ერთ ყველაზე დიდ საგამოფენო დარბაზს ახლა საველე ჰოსპიტალის ფუნქცია აქვს და უკვე იღებს პაციენტებს.

ესპანეთში კორონავირუსით ინფიცირებულთა რაოდენობა დღითიდღე იზრდება. ბოლო ინფორმაციით, ქვეყანაში COVID-19-ით 57 786 ადამიანი დაინფიცირდა, მათ შორის 4365 ადამიანი გარდაიცვალა, ამ ეტაპზე 7 015 გამოჯანმრთელებულია.