"მესენჯერის" ჩატში ვხსნი გაკვეთილებს, კარგად იგებენ" - როგორ ასწავლის დისტანციურ რეჟიმში თბილისის სკოლის მოსწავლეებს პედაგოგი

საქართველოს სასწავლო დაწესებულებებში სასწავლო პროცესი კორონავირუსის საფრთხის გამო პირველ აპრილამდე შეწყდა.

განათლების მინისტრმა მთავრობის სხდომაზე განაცხადა, რომ სამინისტროს შემუშავებული აქვს საგანმანათლებლო და აკადემიური გეგმა, რომელიც სკოლებს და უმაღლეს სასწავლებლებს მიეწოდებათ, თუმცა გეგმის დეტალები ჯერ უცნობია.

ვიდრე საჯარო სკოლები დისტანციურ სწავლებაზე ოფიციალურად გადავლენ, თბილისის მე-20 საჯარო სკოლის რამდენიმე მასწავლებელმა დაწყებითი კლასების მოსწავლეებისთვის ონლაინ გაკვეთილების ჩატარება უკვე დაიწყო.

მესამე კლასელის მშობელი ნინო ჩარკვიანი ამბობს, რომ ბავშვებს რამდენიმე დღეა ონლაინ გაკვეთილები უტარდებათ და სიახლით აღფრთოვანებულები არიან.

"ერთი სული აქვს ჩემს შვილს, როდის მოვა პირველი საათი, რომ კომპიუტერი ჩართოს და "გაკვეთილს დაესწროს". როგორც იცით, ჯერ სკოლებს არ დაუწყიათ დისტანციური სწავლება და ჩვენი პედაგოგი სოფო, ფაქტობრივად, პიონერია. საოცარი მასწავლებელია.

გვიხარია, რომ ბავშვები არ ჩამორჩებიან სასწავლო პროცესს. ორშაბათიდან სხვა პედაგოგებიც შეუერთებიან და ჩემი შვილის კლასს სრული დატვირთვით ჩაუტარდება ონლაინ გაკვეთილები" - უყვება ნინო ჩარკვიანი AMBEBI.GE-ს.

პედაგოგი სოფიო ფრანგიშვილი გვეუბნება, რომ ახალი გამოწვევა საინტერესო და სახალისო აღმოჩნდა მისთვისაც. მასწავლებლის თქმით, ონლაინ გაკვეთილები იმდენად ნაყოფიერი აღმოჩნდა, მის მოლოდინებს გადააჭარბა.

"დეკემბერში იყო გრიპების სეზონი, იანვარშიც დასვენება, თებერვალში დავიწყეთ და ახლა ისევ იგივე... ამიტომ ვიფიქრე, ბავშვებს ხელს ცოტას წავაშველებ-მეთქი. თავიდან რომ დავიწყე, მაინც მესამე კლასელები არიან და ვიფიქრე ვერ ავეწყობით-მეთქი, მაგრამ ისე უხარიათ, პირველ საათზე რვავე ბავშვი გამზადებული მხვდება ჩატში, ძაან საყვარლები არიან. მართალი გითხრათ, მეც გავერთე ამით.

მესენჯერში ჩატი მაქვს შექმნილი, იქ ვხსნი გაკვეთილებს და ძალიან კარგად იგებენ. დავალებებსაც ვაძლევ, ისე კარგად მიმდინარეობს, მე თვითონ გამიკვირდა. პეტრიაშვილის ზღაპრებზე ვართ, ვაძლევ დავალებად წასაკითხს, შემდეგ ამას განვიხილავთ, ვმსჯელობთ. მათემატიკაში ისეთი რთული დავალება ავხსენი, არ მეგონა თუ გაიგებდნენ, მაგრამ ისე კარგად გაიაზრეს, რომ გაკვირვებული დავრჩი.

ახლა გამრავლებაზე უნდა გადავიდე, ამ პროცესს უნდა უყურონ, ვფიქრობ ვიდეო გაკვეთილს ჩავწერ, გავუგზავნი და შემდეგ ონლაინ გავივლით ცალ-ცალკე. გუდაურში მივდივარ და იქედან ჩავერთვები მოსწავლეებს.

ზოგიერთი ბავშვი სოფელში წაიყვანეს მშობლებმა და იქედანაც გამოდიან კონტაქტზე. მოკლედ, სახალისოც არის, ახალიც და ნაყოფიერიც. ბავშვები არ ჩამორჩებიან და ყველაფერი რომ დალაგდება, ჩვეულებრივ გავაგრძელებთ სწავლას" - ამბობს სოფო ფრანგიშვილი.