შეწყდება თუ არა სწავლა თბილისის კერძო ბაღებში?

კორონავირუსთან დაკაშირებით, მთავრობის გადაწყვეტილებით საჯარო სკოლებსა და ბაღებში სწავლა პირველ აპრილამდე გადაიდო. ამის მიუხედავად კერძო ბაღების გარკვეული ნაწილი სასწავლო პროცესს კვლავ განაგრძობს. რამდენიმე მშობელმა AMBEBI.GE-ს განუცხადა, რომ ისინი ბაღებში ხვალ ჩვეულ რეჟიმში მიიყვანენ შვილებს. თუმცა კერძო ბაღების დიდ ნაწილს16 მარტამდე სასწავლო პროცესი შეჩერებული აქვს.

AMBEBI.GE დაინტერესდა, გაითვალისწინებენ თუ არა კერძო საბავშვო ბაღები განათლების სამინისტროს გადაწყვეტილებას და შეაჩერებენ თუ არა მუშაობას პირველ აპრილამდე. ჩვენ რამდენიმე კერძო ბაღს დავუკავშირდით:

"რა თქმა უნდა, ჩვენ შევუერთდებით სახელმწიფოს გადაწყვეტილებას. რადგან ასე დაწესდა, ესეიგი ამის საჭიროება არსებობს, ამიტომ არც კი დავფიქრებულვართ, ისე მივიღეთ პირველ აპრილამდე სწავლის გაგრძელების გადაწყვეტილება“ - გვითხრეს საბავშვო ბაღ "ნევარლენდში".

საპირისპიროს აცხადებენ "ერუდიტებში". საბავშო ბაღის მენეჯერმა AMBEBI.GE -სთან განაცხადა, რომ იძულებული არიან სწავლა გააგრძელონ, რადგან ფინანსურად ზარალდებიან.

"როგორც ვიცი, ძლიან ბევრი კერძო ბაღი ახლაც მუშაობს. თუმცა ჩვენ მივიღეთ გადაწყვეტილება, რომ 16-მდე შეგევჩერებინა პროცესი. პირველ შემთხვევაში სახელმწიფოს გადაწყვეტილებას ავუბით მხარი, მაგრამ ახლა იძულებულები ვართ, გავაგრძელოთ სწავლა, რადგან ფინანსურად ძალიან ვზარალდებით. ამიტომ, ვაპირებთ, რომ 16-იდან ჩვეულებრივ რეჟიმში გავაგრძელოთ მუშაობა" - აცხადებს საბავშო ბაღის მენეჯერი.

კიდევ ერთ კერძო ბაღში გვითხრეს, რომ ჯერ არ გადაუწყვეტიათ, გაახანგრძლივებენ თუ არა არდადეგებს.

განათლების სამინისტოში აცხადებენ, რომ სწავლის გადადების საჭიროება არსებობს, თუმცა ისინი კერძო სექტორის საქმიანობაში ვერ ჩაერევიან და მხოლოდ რეკომენდაციებით შემოიფარგლებიან.

პედიატრი ინგა მამუჩიშვილიც მიიჩნევს, რომ უმჯობესია ბავშვები მშობლებმა დახურულ დაწესებულებებს მოარიდონ, თუმცა თუ სხვა გამოსავალი არ არსებობს, აუცილებელია, კერძო ბაღებმა ჰიგიენური ღონისძიებები გააძლიერონ.

"მინდა მოვწოდო მშობლებს, რომ ბავშვები დახურულ დაწესებულებებში არ ატარონ, ასეირნონ და დავიცვათ დისტანცია. დაახლოებით ერთი-ორი მეტრით ნუ მიუახლოვდება ნურავინ ბავშვს... დიდი ყურადღებაა ბავშვების მიმართ საჭირო, თუ მშობლებს არ აქვთ საშუალება ბავშვი დატოვონ სახლში, უნდა იყვნენ გაფაციცებულები, რომ საბავშვო ბარში იყოს ყველა ნორმა დაცული და გაძლიერდეს ჰიგიენური ღონისძიებები" - ამბობს პედიატრი.