"ეს ადამიანი არის შემსრულებელი, ახლა სხვა რაღაცეებია გამოსაძიებელი" - რას ამბობს დოდო გუგეშაშვილი დაკავებულზე
"დარწმუნებული ვარ, რომ ის აიყვანეს, ვინც უნდა აეყვანათ" - ამის შესახებ დოდო გუგეშაშვილმა მისი დაჭრისა და მისი შვილის მკვლელობის საქმეზე დაკავებულის შესახებ განაცხადა. თუმცა როგორც AMBEBI.GE-სთან საუბარში ამბობს, დაკავებულს არ იცნობს.
"ეს სახელი და გვარი არაფერს მეუბნება. ზაზა მურჯიკნელს არავის ვიცნობ. ეს ადამიანი არის შემსრულებელი. ახლა სხვა რაღაცეებია გამოსაძიებელი. მე დარწმუნებული ვარ, რომ ეს ადამიანია მკვლელი. ორი წლის განმავლობაში ვიყავი ჩართული ამ გამოძიების პროცესში და არასოდეს არც ეჭვი შემპარვია და არც სიჩქარე დამინახავს. გამოძიებას ჰქონდა მყარი მტკიცებულებები და იმის საფუძველზე მოხდა ამ პირის დაკავება. შედეგი უკვე დააყენეს და ახლა მათი საქმეა, თუ დამკვეთის ვინაობასაც გამოიძიებენ. რადგან კონკრეტული პიროვნება აიყვანეს, არ აქვს მნიშვნელობა ეს ვინ არის , დარწმუნებული ვარ, რომ ის აიყვანეს, ვინც უნდა აეყვანათ" - განუცხადა დოდო გუგეშშვილმა AMBEBI.GE - სთან საუბარში.
კითხვაზე, აქვს თუ არა დანახული მკვლელის სახე და შეუძლია თუ არა მას მისი შვილის მკვლელის ამოცნობა, გუგეშაშვილი ასე პასუხობს: "მე არ ვიცოდი ვიზუალურად ვინ იყო ეს ადამიანი, არასოდეს მითქვამს რომ ვიცი მისი ვიზუალი. ვიზუალში თუ ის გამოიხატება როგორ ეცვა, ეს სხვაა. სახეზე დამინახავს თუ არა ამაზე ვერც კის გეტყვით და ვერც - არას. ეს არის ჩემი პირადი თემა და ასეთ დეტალებს არ ვხსნი" - აცხადებს დოდო გუგეშავილი.
შეგახსენებთ, რომ შინაგან საქმეთა სამინისტრომ თადარიგის ყოფილი პოლკოვნიკის, დოდო გუგეშაშვილის დაჭრისა და მისი შვილის, ნოდარ გუგეშაშვილის მკვლელობის საქმე გახსნა.
აღნიშნულთან დაკავშირებით შსს-ში რამდენიმე წუთის წინ ბრიფინგი გაიმართა. უწყების განმარტებით, დაკავებულია 1975 წელს დაბადებული ზ.მ. არაოფიციალური ინფორმაციით, დაკავებული პირი ყოფილი ლეიტენანტი ზაზა მურჯიკნელია.
როგორც "ინტერპრესნიუსისთვის" არაოფიციალურად გახდა ცნობილი, მურჯიკნელი 2009 წელს მომხდარ მუხროვანის ინციდენტთან დაკავშირებულ საქმეზე დაკავებულ პირებს შორის იყო, თუმცა სხვა დაკავებულებთან ერთად 2012 წელს საყოველთაო ამნისტიის შედეგად გათავისუფლდა.
ახმეტის რაიონში 33 წლის მწყემსმა 48 წლის მამაკაცი მოკლა
"გაოგნებულია დაკავებით..." - დოდო გუგეშაშვილის შვილის მკვლელობის საქმეზე დაკავებული ბრალდებას უარყოფს
