რა ხდებოდა აფხაზეთის ე.წ პრეზიდენტის ადმინისტრაციაში, როცა შენობაში აქციის მონაწილეები შეიჭრნენ

აფხაზეთში 6 იანვარს დაწყებული პროტესტი, ხალხმრავალი აქციით ე.წ. პრეზიდენტის სახლში შეჭრით დასრულდა.

შენობა დატოვა ე.წ პრეზიდენტმა რაულ ხაჯიმბამ, რომლის მიმართაც მოსახლეობას ძალიან ბევრი პრეტენზია დაუგროვდა. მოგვიანებით მან განცხადება გაავრცელა, სადაც ამბობს, რომ სოხუმშია და არსად წასულა.

მან ე.წ. უშიშროების საბჭოს სხდომაც მოიწვია, რომლის დასრულების შემდეგ, მოსახლეობას მიმართა და სიმშვიდისკენ მოუწოდა. ხაჯიმბას თქმით, ე.წ. ძალოვანი სტრუქტურები გადაყვანილია მუშაობის გაძლიერებულ რეჟიმზე.

სოხუმში, უამინდობისა და თავსხმა წვიმის მიუხედავად, ათასობით ადამიანი გამოვიდა აქციაზე. პარტია "ამცახარას" ერთ-ერთი ლიდერის, სერგეი შამბას განცხადებით, დღეს აფხაზეთში ადამიანები დაუცველები არიან.

აქციის მონაწილეები ე.წ. საპრეზიდენტო არჩევნების შედეგების გაბათილებას და დე ფაქტო პრეზიდენტის რაულ ხაჯიმბას გადადგომას ითხოვენ.

ადგილობრივ მედიაში ვრცელდება ფოტოები, რომლებზეც ასახულია, რა ხდებოდა ე.წ პრეზიდენტის ადმინისტრაციაში, როცა იქ აქციის მონაწილეები შეიჭრნენ.

ოკუპირებული აფხაზეთის ე.წ. უშიშროების საბჭოს თავმჯდომარე მუჰამედ კილბამ დღეს განაცხადა, რომ აქციის მონაწილეებმა „პრეზიდენტის ადმინისტრაციაში“ იარაღის შესანახი ოთახი გახსნეს და გარკვეული რაოდენობის იარაღი წაიღეს.

„ყველა კარადა გახსნილია. მოპარულია სახელმწიფო ხელისუფლების სიმბოლოები. ამასთან, გახნილია იარაღის შესანახი ოთახი და იარაღის გარკვეული ნაწილი მომიტინგეების ხელშია“, - განაცხადა კილბამ.