"რამდენიმე დღე ძილში გვეყოლება" - როგორ ჩაიარა ცოტნე გამსახურდიას მორიგმა ოპერაციამ

დღეს დილით ცოტნე გამსახურდიას კიდევ ერთი ოპერაცია ჩაუტარდა. როგორც "ფეისბუქზე" დაჭრილის ძმა კონსტანტინე გამსახურდია წერს, მდგომარეობა ჯერ კიდევ მძიმეა:

"ოპერაცია დასრულდა. ექიმი, ბატონი არჩილი თვლის, რომ წარმატებულად, თუმცა ეს ჯერ კიდევ არაფერს ნიშნავსო. მდგომარეობა ზოგადად მძიმეა. ესა თუ ის პრობლემა თავს როდის იჩენს, ამას ვერ ვიტყვითო. სს ინიტომ, რომ საქმე გვაქვს სიცოცხლისთვის სახიფათო მრავლობით ტრავმასთან. უახლოესი რამდენიმე დღე კრიტიკულია, შესაძლოა კვირაც, ასეთ შემთხვევაში პროგნოზი რთულია" - წერს კოკო გამსახურდია.

რაც შეეხება ცოტნე გამსახურდიას ექიმს, ნეიროქირურგმა არჩილ ჯვარშეიშვილმა ჟურნალისტებთან კომენტარი 7-საათიანი ოპერაციის დასრულების შემდეგ, დღეს დილით გააკეთა.

მისი თქმით, გამორიცხული არ არის ცოტნე გამსახურდიას კიდევ დასჭირდეს ოპერაციის ჩატარება როგორც თავზე, ასევე გულმკერდზე.

"პაციენტის მდგომარეობა საკმაოდ მძიმეა: მრავლობითი ტრავმა გულმკერდის, მრავლობითი ტრავმა თავის ტვინის და თავის ქალის. ძალიან ბევრი ჰემატომა იყო თავის ქალის, როგორც მარჯვნივ, ისე მარცხნივ, დაზიანებული იყო ქალა ტვინის ძვლები, შუბლის წილში და თხემის წილში.

7 საათი მოვუნდით ოპერაციას, ჰემატომები ამოღებულია. ტვინის მდგომარეობა, ტვინის რელაქსაცია, ოპერაციის ბოლოს, გემატომის მოშორების შემდეგ, იყო დამაკმაყოფილებელი. პაციენტი გადაყვანილია რეანიმაციაში, ხელოვნურ სუნთქვაზე, სადაც რამდენიმე დღე დარჩება.

მიუხედავად იმისა, რომ ოპერაციამ წარმატებით ჩაიარა, ჰემატომა ამოვიღეთ და თავის ტვინის მდგომარეობა ასე თუ ისე იყო დამაკმაყოფილებელი, მდგომარეობა მაინც რჩება მძიმე. რამდენიმე დღის განმავლობაში გამოიკვეთება პროგნოზი როგორი იქნება. ეს არ ნიშნავს იმას, რომ საფრთხემ უკვე ჩაიარა.

შესაძლოა, დასჭირდეს კიდევ ოპერაცია როგორც თავზე, ისე გულმკერდზე. ამას ყოველდღიური მონიტორინგი გვაჩვენებს. რამდენიმე დღე ძილში გვეყოლება. ყოველდღიური მონიტორინგი იქნება კომპიუტერული ტომოგრაფიით და ყველაფრით, ყველა რესურსით, რაც კლინიკაში გვაქვს და ყველაფერი გვაქვს, რისი საჭიროებაც არის. დანარჩენი გამოჩნდება ყოველდღიური დაკვირვების რეჟიმში,"- განაცხადა არჩილ ჯვარშეიშვილმა.

ხეჩინაშვილის სახელობის კლინიკაში ცოტნე გამსახურდიას პირველი ოპერაცია გულ-მკერდის არეში ჩაუტარდა, რის შემდეგაც ტომოგრაფიულმა გამოკვლევამ აჩვენა, რომ ის ნეიროქირურგიულ ოპერაციას საჭიროებდა.

ცნობისთვის, ცოტნე გამსახურდია 19 დეკემბერს, თბილისში, ვერაზე დაჭრეს. შსს-ს ინფორმაციით,ფაქტზე გამოძიება საქართველოს სისხლის სამართლის კოდექსის 19-108 მუხლით დაიწყო, რაც განზრახ მკვლელობის მცდელობას გულისხმობს.