2 წლის ანიტა ფაცაციას ოპერაცია ჩაუტარდება - რა ინფორმაციას ავრცელებს საგარეო საქმეთა მინისტრი
2 წლის ანიტა ფაცაციას გულის გადანერგვის ოპერაცია ჩაუტარდება.
როგორც საქართველოს საგარეო საქმეთა მინისტრმა, დავით ზალკალიანმა განაცხადა, უწყება ყველაფერს აკეთებს იმისთვის, რომ მცირეწლოვან გოგონას სიცოცხლე შეუნარჩუნონ.
როგორც ზალკალიანმა აღნიშნა, ინდოეთის ერთ-ერთი კლინიკა პაციენტის მისაღებად მზად არის და საქართველოს ელჩი ინდოეთში დღესვე გაემგზავრება საკითხის მოსაგვარებლად.
"ჩვენი ერთ-ერთი მოქალაქე, მცირეწლოვანი ბავშვი, რომელიც მძიმე მდგომარეობაში იმყოფება ერთ-ერთ კლინიკაში, მისი სიცოცხლის გადასარჩენად მთელი ჩვენი დიპლომატიური კორპუსი ჩართულია-შესაბამისი საელჩოები იტალიაში, ბელორუსში, ინდოეთში.
მე ვთხოვე ჩვენს ელჩს ინდოეთში, რომ დღევანდელ ჩვენ შეკრებაზე არ დარჩეს და გაემგზავროს ინდოეთში, რადგანაც ამ ბავშვის გადარჩენა ძალიან მნიშვნელოვანია.
დაგვთანხმდა ინდოეთის ერთ-ერთი კლინიკა, რომ შესაბამისი ოპერაცია ჩატარდეს. ყველა ზომას მივმართავთ იმისთვის, რომ ბავშვს სიცოცხლე შევუნარჩუნოთ“, - განაცხადა ზალკალიანმა.
2 წლის ანიტა ფაცაციას უმძიმესი დაავადება - დილატაციური კარდიომიოპათია დაუდგინდა. მას ესაჭიროება მსოფლიოში ერთ-ერთი ურთულესი ოპერაცია - გულის გადანერგვა. პატარა გოგონას ოჯახს რამდენიმე ქვეყანამ უარი უთხრა ოპერაციის გაკეთებაზე.
საქველმოქმედო გვერდზე, რომელიც "ფეისბუქზე" ანიტას დასახმარებლად შეიქმნა, ვკითხულობთ რომ გოგონას მდგომარეობა შედარებით სტაბილურია. ბავშვი ამჟამად ავსტრიის ერთ-ერთ კლინიკაში იმყოფება:
"ექიმების მოლაპარაკების შედეგად შეთანხმება ვერ მოხერხდა, რადგან ავსტრიელების თქმით, ანიტას მგზავრობა უკიდურესად დიდ რისკთან არის დაკავშირებული. დღეს ავსტრიაში საქართველოს საკონსულოს წარმომადგენლებმა კიდევ ერთხელ სთხოვეს ავსტრიის სახელმწიფოს ე.წ. “ბერლინის გული” ჩაეყენებინათ ანიტასთვის, რის შემდეგაც მოხდებოდა მისი უსაფრთხო ტრანსპორტირება ინდოეთამდე, თუმცა მორიგი უარის მიღების შემდეგ გადაწყდა ამ უდიდეს რისკზე წასვლა.
მივიღეთ ინდოეთამდე გადაფრენის ინვოისი, რომლის მიხედვითაც ანიტას 12-საათიანი მგზავრობის საფასური 110 580 $ შეადგენს.
ამ ეტაპზე სასწრაფოდ გვესაჭიროება ანიტას და მისი მშობლების პასპორტები, რომელიც ჯერ არ დაუბრუნებია ავსტრიის სახელმწიფოს და ინდოეთის ვიზები. ამ ტექნიკური დეტალების მოგვარებაში ჩართულია საქართველოს საგარეო საქმეთა სამინისტო. ვიმედოვნებთ, რომ მათი დახმარებით, ამ საბუთების სრულყოფა მოხდება უახლოეს მომავალში და არაუგვიანეს ოთხშაბათისა, ანიტა უკვე მოახერხებს გამგზავრებას, რადგან როგორც იცით, მისი მდგომარეობა უკვე საკმაოდ მწვავე ფაზაში შევიდა", - ვკითხულობთ ფეისბუქ-ჯგუფში "ანიტასთვის".
დახმარების მსურველებს თანხის გადარიცხვა შეგიძლიათ:
საქართველოს ბანკის ანგარიშის ნომერი:
GE28BG0000000100761966
მიმღები - ლია ჩხაიძე (ანიტას ბებია)
თიბისი ბანკის ანგარიში:
GE38TB7855945064300017
გადახდის აპარატებიდან ჩასარიცხად: პ/ნ 60001030692 ლია ჩხაიძე
რუსთაველის გამზირზე საახალწლო განათებები ჩაირთო (ფოტო)
რომელ რეგიონში რამდენ მოქალაქეს ამოეწურა ქულები მართვის მოწმობაზე - რა ინფორმაციას ავრცელებს შსს
