"გავიქეცი თავის მოსაკლავად და არა მიმალვისთვის" - რა თქვა პროცესზე ძმის მკვლელობაში ბრალდებულმა, რომელსაც პატიმრობა მიესაჯა

ძმის მკვლელობაში ბრალდებულ 48 წლის ბესიკ არღვლიანს აღკვეთის ღონისძიების სახით პატიმრობა შეეფარდა.

პატიმრობის აუცილებლობა პროკურორმა მირანდა მუმლაძემ იმით ახსნა, რომ არსებობდა მიმალვისა და მტკიცებულებების მოპოვებაში ხელის შეშლის საფრთხე. მისივე განამარტებით, არღვლიანმა დანაშაულის ჩადენის შემდეგ მიმავალვა სცადა.

ბრალდებულმა კი თქვა, რომ მიმალვა არ უცდია, არამედ თავის მოსაკლავად გაქცა. ის აღკვეთის ღონისძიების სახით, გირაოს შეფარდებას ითხოვდა. ბრალდებული ძმის მკვლელობას აღიარებს.

"დანაშაული მაქვს, მანქანა არ მივეცი და ჩემი ბრალია ეს ყველაფერი... რომ დამეთმო, ეს არ მოხდებოდა. არ არსებობს იმის საშიშროება, რომ მე მივიმალო. მაშინაც გავიქეცი იმიტომ, რომ ჩემი ძმის წინაშე თავს დამნაშავედ ვგრძნობდი. გავიქეცი თავის მოსაკლავად და არა იმიტომ, რომ მივმალულიყავი. ისიც ვიცოდი რომ დასაჭერად მოდიოდნენ", - თქვა მან.

პროკურატურის ინფორმაციით, ბესიკ არღვლიანმა ძმას სასიკვდილო ჭრილობა, ცივი იარაღით ყბისა და გულ-მკერდის არეში მიაყენა.

ტრაგედია მესტიის სოფელ ცხუმარში 20 ოქტომბრის საღამოს მოხდა. ბესიკ (ბესო) არღვლიანმა ძმა, 42 წლის ლაშა არღვლიანი ცივი იარაღით მოკლა. როგორც ადგილობრივები ჰყვებიან, ძმები ნასვამ მდგომარეობაში იმყოფებოდნენ. მოკლული მამაკაცი ცხუმარში ფიზიკა-მათემატიკის პედაგოგი იყო.

"არცერთ ძმას არ ჰყავს ოჯახი, ორივეს უწესეერეს ბიჭებად იცნობს მთელი სოფელი. ძმები ერთმანეთზე გადაყოლილები იყვნენ და არ ვიცით, რა ეშმაკი შეუჩნდა ბესოს, რა მოხდა... როცა გააცნობიერა, რაც ჩაიდინა, თავის მოკვლა უნდოდა - ჯერ ვენების გადაჭრა სცადა, მერე ენგურში ხტებოდა, მაგრამ სოფლის ბიჭები დაეწივნენ და მოახერხეს მისი შეჩერება" - ყვება "კვირის პალიტრასთან" საუბარში ერთ-ერთი ადგილობრივი.

ავტორი: თათული როგავა