25
აპრილიდღის ზოგადი ასტროლოგიური პროგნოზი
!["როცა ადამიანს შეუძლია, პატიმარ ქალს [მზია ამაღლობელს] ცილისწამებით შეეხოს, არაკაცობაა" - ანდრო ჭიჭინაძე ირაკლი კობახიძეზე](https://cdn.ambebi.ge/media/__thumbs__/images/2025/04-24/chichinadze10-51179.webp)
ზუგდიდის სოფელ რუხში, ადმინისტრაციულ საზღვართან ახლოს, პირველად საქართველოში ხაჭაპურის ფესტივალი ჩატარდა. ფესტივალის ფარგლებში მომზადდა ყველა სახის ხაჭაპური - მეგრული, იმერული, აჭარული, გურული, რაჭული, სვანური, მესხური, ქისტური, ოსური, თუშური...
ფესტივალი ასევე მოიცავდა რეგიონების მიხედვით ხაჭაპურის სხვადასხვა სახეობის მომზადების კონკურსს. კონკურსის გამარჯვებულები კი სპეციალურმა ჟიურიმ შვიდ ნომინაციაში გამოავლინა.
საუკეთესო მცხობელის სტატუსი იმერელმა დიასახლისმა ნაილი ბოჭორიშვილმა მოიპოვა. ბოჭორიშვილის თქმით, გამარჯვების იმედი არ ჰქონდა, რადგან კონკურსში ცნობილი რესტორნების მზარეულები მონაწილეობდნენ:
"უბრალო, იმერული ოჯახის დიასახლისი ვარ. არ ვაპირებდი ამ კონკურსში მონაწილეობის მიღებას, რადგან ვიცოდი, რომ აქ ცნობილი რესტორნის მზარეულები იყვნენ მოწვეულები, ამიტომ თავს ვიკავებდი... მაგრამ მთხოვეს, რომ უნდა მოვსულიყავი. არ ველოდი ამ გამარჯვებას" - ამბობს ნაილი ბოჭორიშვილი.
კონკურსის ფარგლებში სხვადასხვა სახეობის და ფორმის ხაჭაპურები მომზადდა. მათ შორის, თაფლით, ჭინჭრით, ჭარხლით, მწყრის ხორცით და მაყვლით.
ჟიურის მიერ გამოვლენილი გამარჯვებულების სია კი ასე გამოიყურება: მეგრული სამზარეულოს განუმეორებელი გემო - ბელა კუპრავა, ხაჭაპურის საუკეთესო ვარიაცია - რესტორანი "მენძელი", ყველაზე სწრაფი მცხობელი - დარეჯან ყოლანდარია, საუკეთესო მცხობელი - ნელი ბოჭორიშვილი, ვიზიტორთა რჩეული ხაჭაპური - "ოკო" საცხობი ქუთაისიდან, მომავალის ხაჭაპური - კოლეჯი "ახალი ტალღა", საუკეთესო ხაჭაპური - რესტორანი "შინდაგორი". ფესტივალზე მისულ სტუმრებს 3-მეტრიანი გებჟალიის და 4 მეტრიანი ხაჭაპურის დამზადების პროცესის ნახვა და მათი დაგემოვნება შეეძლოთ.
"ხაჭაპურის ფესტივალი" სამეგრელო-ზემო სვანეთის დანიშნულების ადგილის მართვის ორგანიზაციის (DMO) ორგანიზებით და USAID პროექტი "ზრდას", საქართველოს ტურიზმის ეროვნული ადმინისტრაციის, რუხის სავაჭრო ცენტრის, საქართველოს გასტრონომიის ასოციაციის და რეგიონული ხელისუფლების მხარდაჭერით განხორციელდა. ფესტივალზე ასევე წარმოდგენილი იყო ცნობილი შეფ-მზარეულების მასტერ-კლასები, მათ შორის, გურამ ბაღდოშვილის მესხური ხაჭაპური, ესმა კუნჭულიას გურული ღვეზელის საიდუმლო და ისტორია, დალი ცატავას და გასტრონომიის ასოციაციის კვლევა საქართველოს გასტრონომიული კულტურის შესახებ, ხაჭაპურის გზა UNESCO-მდე და ყველის ასოციაციის ხელმძღვანელის ანა მიქაძის ყველის ამოყვანის მასტერ-კლასი.
