26
მარტიდღის ზოგადი ასტროლოგიური პროგნოზი
ავღანელი ქორწილების მომღერალი აბდულ სალამ მაფტუნი სოციალური ქსელების ფავორიტი გახდა. AFP წერს, რომ მაფტუნი ავღანურ ნიჭიერთა შოუში მონაწილეობს და სწორედ იქ, ჟიურისგან შეიტყო, რომ კანადის პრემიერ-მინისტრს ჰგავს.
მაფტუნმა ჯასტინ ტრიუდოს არსებობის შესახებ მანამდე არაფერი იცოდა, ახლა კი იმედოვნებს, რომ ერთ-ერთ ყველაზე სექსუალურ მსოფლიო ლიდერთან მსგავსება კონკურსში მისი გამარჯვების შანსს გაზრდის.
29 წლის ავღანელი მომღერლის თქმით, ახლა ყველა ჯასტინ ტრიუდოს ეძახის.
მაფტუნისა და კანადის პრემიერ-მინისტრის ფოტოები შესადარებლად სოციალურ მედიას ვირუსულად მოედო. ფოტოზე მაფტუნს ტრადიციული აღმოსავლური სამოსი აცვია. გადაცემის "ავღანეთის ვარსკვლავი" „ფეისბუქის“ გვერდზე კი სოციალური ქსელის მომხმარებლები მაფტუნს „ტრიუდოს დაკარგულ ტყუპის ცალს“ უწოდებენ.
კონკურსის ფინალი 21 მარტს გაიმართება, თავად ავღანელი „ვარსკვლავი“ ფიქრობს, რომ კანადის პრემიერთან მსგავსებამ მისი მოგების შანსი 50%-ით გაზარდა.
ბოლო წლების განმავლობაში მაფტუნი ქორწილებსა და დაბადების დღეების წვეულებებზე სხვადასხვა ინსტრუმენტზე უკრავს და მღერის. ის იმედოვნებს, რომ პოპულარობის პარალელურად მასზე მოთხოვნა გაიზრდება და შეძლებს, ცოლსა და ოთხ შვილზე უკეთ იზრუნოს.
იმის მიუხედავად, რომ კანადაში წასვლის შანსი მაფტუნისთვის ძალიან დაბალია, ავღანელი მომღერალი იმედოვნებს, რომ შეძლებს მის კანადელ „ტყუპისცალს“ შეხვდეს.
„სიამოვნებით შევხვდები, თუ მისი სურვილი იქნება. ის საერთაშორისოდ ცნობილი ადამიანია, მე კი უბრალო კაცი ავღანეთის ღარიბი რაიონიდან... ვნახოთ, რა იქნება,“ - ამბობს მაფტუნი.
