ქრისტიანულ დღესასწაულზე 5 წლის ბავშვებს სიგარეტს აწევინებენ - გამაოგნებელი პორტუგალიური ტრადიცია

პორტუგალიაში, ერთ-ერთ სოფელში ქრისტიანები ეპიფანიის დღესასწაულზე ბავშვებს სიგარეტს აძლევენ მოსაწევად, ამის შესახებ France 24 წერს. ეპიფანიას (მაცხოვრების განცხადებას) კათოლიკეები 6 იანვარს ნათლისღებასთან ერთად ზეიმობენ.

ბავშვებს შორის, რომლებიც სიგარეტს ეწევიან, ბევრი 5 წლისაა.

„არ ვიცით როდის, ან როგორ დაიწყო ეს ტრადიცია, თუმცა სოფელში მცხოვრები 101 წლის მამაკაცი ამბობს, რომ ჩვეულება მას ბავშვობიდან, მისი მშობლებისგან ახსოვს. ვვარაუდობთ, რომ ეს წესი ბიჭების მოწიფულობის ასაკის აღსანიშნავად დამკვიდრდა,“ - ამბობს სოფლის ხელმძღვანელი კარლოს კადავეზი, რომელმაც თავად საკუთარ ქალიშვილს 9 წლის ასაკში მისცა დღესასწაულზე სიგარეტის მოწევის უფლება.

ადგილობრივი მღვდელი ხულიო გომესი აცხადებს, რომ წარმართული და კათოლიკური რიტუალების ერთდროულად ჩატარება რეგიონში ნორმალურად მიიჩნევა, თუმცა ბავშვებისთვის სიგარეტის მოწევას „უცნაურს“ უწოდებს.

ბოლო წლების განმავლობაში ტრადიციას ხშირად აკრიტიკებენ ადგილობრივ მედიაში, თუმცა სოფლის მოსახლეობა თანხმდება, რომ სხვების აზრს ყურადღება არ უნდა მიაქციონ.

ვალე დე სალგუეიროელი ქალი, რომელსაც პატარა შვილი ჰყავს, ამბობს, რომ დღესასწაულზე მოწევა 5 წლის ასაკში დაიწყო და წელიწადში მხოლოდ 2 დღის განმავლობაში ეწევა - 5-6 იანვარს.

„ეს ჩვეულებრივი ამბავია, ყოველთვის ასე ვზეიმობდით,“ - ამბობს 45 წლის მასწავლებელი, რომელიც სოფელში დაიბადა და გაიზარდა.

ვალე დე სალგუეიროელები, კრიტიკის მიუხედავად, ტრადიციის შეცვლას არ აპირებენ და ამბობენ, რომ მომავალ წლებშიც, როგორც ყოველთვის, ორი დღით შეიკრიბებიან, რომ დალიონ ალკოჰოლი, იცეკვონ და სიგარეტი შვილებთან ერთად მოწიონ.