23
მარტიდღის ზოგადი ასტროლოგიური პროგნოზი
ერთი წლის წინ ნიკოლოზ ბიჭიაშვილზე - თვითნასწავლ, ვირტუოზ გიტარისტზე ვწერდით, რომელიც ჯაზს უკრავს და მეოთხე ქართველია, ვინც შარშან ნიუ-იორკის პრესტიჟულ სასწავლებელში, New School-ში ჩააბარა, თუმცა ამერიკაში გამგზავრებას უსახსრობის გამო ვერ ახერხებდა. სწავლისთვის სერიოზული თანხა სჭირდებოდა... ნიკუშა იმედს არ კარგავდა და არც ფარხმალს ჰყრიდა, სჯეროდა, რომ "ნიუ სქულში" აუცილებლად ისწავლიდა. სწავლისათვის საჭირო თანხის ნაწილი "თიბისი ბანკმა" გადაუხადა, თუმცა სრული დაფინანსება თუ როგორ მოახერხა, ამაზე ერთი წლის შემდეგ AMBEBI.GE-ს ისევ თავად მოუყვა. ის ახლა საქართველოშია.
- ერთ წელზე მეტი გავიდა, რაც ნიუ-იორკის ერთ-ერთ პრესტიჟულ სასწავლებელში ჩაირიცხეთ, თუმცა თავის დროზე უსახსრობის გამო ვერ მიდიოდით, რადგანაც სწავლის საფასური საკმაოდ დიდი იყო. საბოლოოდ, ვინ შეძლო თქვენი დაფინანსება?
- ყველაზე პრესტიჟული სასწავლებელია და ამიტომაც ღირს იქ სწავლა ძვირი. პირველი სემესტრის გადასახადის დასაფარად, ჩემმა მშობლებმა ძალიან დიდი კრედიტი აიღეს და ამის შემდეგ მომეცა უფლება, მეორე სემესტრიც დამეხურა, თუმცა სანამ ამ სემესტრის დავალიანებას არ დავფარავ, მესამე სემესტრს ვერ გავაგრძელებ, სწავლა კიდევ სამი წელი მიწევს.
- სწავლის პროცესზე რომ გვესაუბრო, როგორ მიმდინარეობს და რამდენად კმაყოფილი ხარ?
- სწავლის პროცესს რაც შეეხება, ნებისმიერი მუსიკოსისთვის დიდი ბედნიერებაა, როდესაც ცოცხალი ლეგენდები გასწავლიან, თან, ამას ის ემატება, რომ ეს ლეგენდარული მუსიკოსები დიდი პასუხისმგებლობით და ენთუზიაზმით ეკიდებიან მოსწავლეების განვითარებას. არა მხოლოდ საკლასო ოთახში. ცხადია, განსაკუთრებულ ყურადღებას დამსახურება უნდა, მაგრამ იქ წასულს სხვა საფიქრალი წესით, არ გაქვს და შრომას, ფიქრს ყოველთვის შედეგი მოყვება.
იმპროვ ანსამბლის ხელმძღვანელი მეორე სემესტრში მყავდა 2012 წლის NEA JAZZ MASTERS AWARDS-ის მფლობელი ჯიმი ოუენსი, რომელმაც იქ ისეთი ყურადღება მომაქცია და მისგან ისეთი სიყვარული, სითბო ვიგრძენი, მხოლოდ ბაბუა თუ მოიქცევა ასე. მთელი სემესტრის განმავლობაში, კვირაში ორჯერ, დამატებით გაკვეთილებს უფასოდ მიტარებდა ხან სკოლაში, ხან - მასთან სახლში და გაკვეთილის მერე მიყვებოდა თავისი ცხოვრების შესახებ. ჯაზში და ალბათ ყველანაირ მუსიკაში მხოლოდ მეცადინეობით ვერ იზრდები და ეს უფროსი თაობის მუსიკოსებს ძალიან კარგად ესმით. ამიტომ, დაინახავენ თუ არა შენს დამოკიდებულებას, სიხარულით გეხმარებიან, თან, ლეგენდებს დახმარება და შენი ჯაზის ოჯახში გაშინაურება ძალიან კარგად შეუძლიათ. გამაწევრიანა მუსიკოსების ორგანიზაციებში, მის ორ კონცერტზე დამაკვრევინა, სადაც ჯიმის გარდა, კიდევ ერთი ლეგენდა, კენი ბარონი უკრავდა. შემდეგ დამდო პატივი და ჩემს კონცერტზეც დასაკრავად მოვიდა. ამ ყველაფერმა როგორც სკოლაში, ისე სკოლის გარეთ, კარგი რეპუტაცია შემიქმნა, კერძოდ, იმ საზოგადოებაში, სადაც ახალგაზრდა ჯაზმენს სახელი უნდა ჰქონდეს. მისი რეკომენდაციით მივედი ბევრ ჯემსეშენზე, სადაც ძალიან საინტერესო ხალხი გავიცანი, წამოვიდა შემოთავაზებები, მათთან დამეკრა და რამდენიმე კონცერტზე დავუკარი. მოკლედ, რომ არა ჯიმი ოუენსი კიდევ ბევრი წელი დამჭირდებოდა, რომ ნიუ-იორკში და ჯაზის ოჯახში მოვშინაურებულიყავი. დღეს უკვე ჩემი ბენდიც მყავს, რომელიც წარმატებული მუსიკოსებითაა დაკომპლექტებული: Jamael Dean პიანისტი საკმაოდ ცნობილია, Kamasi Washington-თან ერთად უკრავს, ბასისტი Hwansu Kang, Billy Harper-ის კვინტეტის წევრია, Khonds - გიორგი ბერიშვილი ერთ-ერთი საუკეთესო ალტო-საქსაფონისტია ნიუ-იორკში, რომელიც ასევე "ნიუ სქულში" სწავლობდა ისიც ამომავალ ვარსკვლავად ითვლება. ჩემს ბენდს სკოლაში ასე დაარქვეს - Circle და New School Allstars.
- გამოდის, ამერიკაში ცხოვრება არ გიჭირთ და ადვილად შეეგუეთ...
- რაც შეეხება ნიუ-იორკში ცხოვრებას, თავიდან ძალიან გამიჭირდა, თან რომ წავედი, თეორიული განათლება საერთოდ არ მქონდა და პირველი დღეები საკმაოდ დაპანიკებულმა გავატარე, მაგრამ იმან, რომ წნეხში ვიყავი, მშობლების თავდადების პასუხისმგებლობას ვგრძნობდი და კომფორტის ზონას მოვშორდი, ჩემი აფორიაქება გამოიწვია. ჩასვლიდან რამდენიმე თვეში ისეთი შეგრძნება მქონდა, თითქოს ჩემმა ტვინმა მუშაობა "ტურბოზე" დაიწყო... დღესდღეობით ძალიან კმაყოფილი ვარ ჩემი ამერიკული ცხოვრებით, დანარჩენს მომავალი გვიჩვენებს.
